ಮಹಿಳೆಯರಿಗೆ ಸೌಕರ್ಯ ಕಲ್ಪಿಸಲು ಮನವಿ

ಬೆಳಗಾವಿ : ಮಹಿಳಾ ಸೌಕರ್ಯಗಳಿಗೆ ಒತ್ತಾಯಿಸಿ ನ್ಯಾಶನಲ್‌ ಫೆಡರೇಶನ್‌ ಆಫ್‌ ಇಂಡಿಯನ್‌ ವುಮನ್‌ ಸಂಘಟನೆಯವರು ಶುಕ್ರವಾರ ಜಿಲ್ಲಾಧಿಕಾರಿಗಳ ಮೂಲಕ ಪ್ರಧಾನ ಮಂತ್ರಿಗೆ ಮನವಿ ರವಾನಿಸಿದರು.

ಒಂಟಿ ಮಹಿಳೆ ರಾತ್ರಿ ಸಂಚರಿಸುವುದು ಹಾಗೂ ಒಬ್ಬಳೇ ಪ್ರಯಾಣ ಮಾಡುವುದು ಅಪಾಯಕಾರಿಯಾಗಿದೆ. ಅವಿವಾಹಿತ ಹಾಗೂ ಮದುವೆಯಾಗಲು ತಡವಾದ ಮಹಿಳೆಯರೂ ಸಮಸ್ಯೆಯ ಸುಳಿಯಲ್ಲಿ ಇರುತ್ತಾರೆ. ಉದ್ಯೋಗ ಕ್ಷೇತ್ರದಲ್ಲಿ ಲೈಂಗಿಕ ಶೋಷಣೆಯ ಅಪಾಯ ಇರುತ್ತದೆ. ಮಹಿಳೆ ಇಂಥ ಭಯದಿಂದ ಮುಕ್ತವಾಗುವಂತೆ ಕಾನೂನಾತ್ಮಕ ಸೂಕ್ತ ಕ್ರಮಗಳನ್ನು ಕೈಗೊಳ್ಳಬೇಕು. ಗುಡಿಸಲಿನಲ್ಲಿ ವಾಸಿಸುವ ಬಡ ಹೆಣ್ಣು ಮಕ್ಕಳಿಗೆ ವಸತಿ ವ್ಯವಸ್ಥೆ ಕಲ್ಪಿಸಬೇಕು. ಉದ್ಯೋಗ ಖಾತ್ರಿ ಯೋಜನೆಯಲ್ಲಿ ಕೆಲಸ ಮಾಡುವ ಮಹಿಳೆಯರಿಗೆ ಸೌಲಭ್ಯಗಳು ಸಿಗಬೇಕು ಎಂದು ಒತ್ತಾಯಿಸಿದರು.

ಪಾಕಿಸ್ತಾನದ ಉಗ್ರ ಚಟುವಟಿಕೆಗಳನ್ನು ಕಟುವಾಗಿ ಖಂಡಿಸಿರುವ ಸಂಘಟನೆಯವರು, ಭಾರತೀಯ ಯೋಧರ ತ್ಯಾಗಬಲಿದಾನದ ಬಗ್ಗೆ ಹೆಮ್ಮೆ ಪಟ್ಟಿದ್ದಾರೆ. ಆದರೂ ಯುದ್ಧ ಬೇಡ ಶಾಂತಿ ಬೇಕೆಂದು ಪ್ರಧಾನಿಗೆ ವಿನಂತಿಸಿಕೊಂಡಿದ್ದಾರೆ. ರಾಣಿ ಚನ್ನಮ್ಮ ವೃತ್ತದಿಂದ ಮೆರವಣಿಗೆ ಹೊರಟ ಮಹಿಳೆಯರು ಜಿಲ್ಲಾಧಿಕಾರಿ ಕಚೇರಿ ತಲುಪಿ ಧರಣಿ ನಡೆಸಿದರು. ನಂತರ ಮನವಿ ಅರ್ಪಿಸಿದರು.