ಪೌರಕಾರ್ಮಿಕರ ಸಮಸ್ಯೆಗೆ ಶಾಸಕರು ಪ್ರಾಮಾಣಿಕವಾಗಿ ಸ್ಪಂದಿಸಲಿ

ಉಗಾರ : ಪಟ್ಟಣದಲ್ಲಿ ನಿತ್ಯ ಶ್ರಮ ವಹಿಸಿ ದುಡಿಯುವುದರ ಜತೆಗೆ ಪಟ್ಟಣದ ಅಂದ ಹೆಚ್ಚಿಸಿ ಆರೋಗ್ಯ ಕಾಪಾಡುವ ಪೌರಕಾರ್ಮಿಕರಿಗೆ ಸಹ ಸರಕಾರಿ ನೌಕರರ ಸೌಲಭ್ಯಗಳನ್ನು ಕೊಡಿಸುವ ನಿಟ್ಟಿನಲ್ಲಿ ಶಾಸಕರು ಪ್ರಾಮಾಣಿಕ ಪ್ರಯತ್ನ ಮಾಡಬೇಕು ಎಂದು ಉಗಾರ ಪುರಸಭೆ ಉಪಾಧ್ಯಕ್ಷೆ ಸ್ವಾತಿ ಯೋಗೇಶ ಕುಂಬಾರ ಹೇಳಿದರು.

ಅವರು ಬುಧವಾರ ಪೌರಕಾರ್ಮಿಕರ ಸಮಸ್ಯೆಗಳನ್ನು ಆಲಿಸಿ ದೀಪಾವಳಿಗಿಂತ ಪೂರ್ವದಲ್ಲಿ ಉಗಾರ ಪುರಸಭೆಗೆ ಆಗಮಿಸಿದ್ದ ಶಾಸಕ ಶ್ರೀಮಂತ ಪಾಟೀಲರು ಪೌರಕಾರ್ಮಿಕರಿಗೆ ಕಳೆದ 9 ತಿಂಗಳುಗಳಿಂದ ಸಂಬಳವಿಲ್ಲದೆ ದುಡಿಯುತ್ತಿರುವ ಬಗ್ಗೆ ಗಮನ ಸೆಳೆದಾಗ ತಾವು ತಮ್ಮ ಸ್ವಂತ 10 ಲಕ್ಷ ರೂ. ದೀಪಾವಳಿಗೆ ಉಡುಗೊರೆಯಾಗಿ ಕೊಡುವುದಾಗಿ ಭರವಸೆ ನೀಡಿದ್ದರು. ಆದರೆ ಈಗ ದೀಪಾವಳಿ ಮುಗಿದು ಒಂದು ತಿಂಗಳು ಗತಿಸಿದರೂ ಕೊಟ್ಟ ಭರವಸೆ ಈಡೇರಿಸಿಲ್ಲ ಎಂದು ಆರೋಪಿಸಿದರು.

ಪುರಸಭೆಯ ಅಭಿವೃದ್ಧಿ ಕಾಮಗಾರಿಗಳನ್ನು ಉದ್ಘಾಟಿಸಲು ಬಂದಾಗ ಪೌರ ಕಾರ್ಮಿಕರನ್ನು ಶಾಸಕರು ಸನ್ಮಾನ ಮಾಡುತ್ತಾರೆ. ಸನ್ಮಾನದಿಂದ ಪೌರ ಕಾರ್ಮಿಕರ ಹೊಟ್ಟೆ ತುಂಬುವುದಿಲ್ಲ. ಬೆಳಗಾವಿಯಲ್ಲಿ ನಡೆಯಲಿರುವ ಚಳಿಗಾಲದ ಅಧಿವೇಶನದಲ್ಲಿ ಬಡ ಪೌರ ಕಾರ್ಮಿಕರಿಗೆ ಸಂಬಳ ಕೊಡಿಸುವಂತೆ ಶಾಸಕರು ಪ್ರಶ್ನೆ ಮಾಡಿ ಅವರ ಶ್ರಮದ ಸಂಬಳ ಸಿಗುವಂತೆ ಮಾಡಲಿ ಎಂದು ಸ್ವಾತಿ ಕುಂಬಾರ ಹೇಳಿದರು.