ಚಿಕ್ಕೋಡಿ: ಮೊಬೈಲ್ ಬ್ಯಾಟರಿಗಳು ಸಾಮಾನ್ಯವಾಗಿ ಚಾರ್ಜಿಗೆ ಹಾಕಿದಾಗಲೋ ಅಥವಾ ಬಿಸಿಯಾಗಿ ಜೇಬಿನಲ್ಲೇ ಸ್ಫೋಟಗೊಂಡ ಪ್ರಕರಣಗಳು ಸಾಕಷ್ಟು ನಡೆದಿದೆ. ಆದರೆ ಚಿಕ್ಕೋಡಿಯಲ್ಲೊಂದು ವಿಚಿತ್ರ ಘಟನೆ ನಡೆದಿದೆ. ನೀರು ಕಾಯಿಸಲು ಒಲೆಗೆ ಹಳೆ ಬ್ಯಾಟರಿ ಹಾಕಿದ ಕಾರಣ ಅದು ಸ್ಫೋಟಗೊಂಡು ಬಾಲಕಿಯೊಬ್ಬರು ತೀವ್ರವಾಗಿ ಗಾಯಗೊಂಡಿದ್ದಾಳೆ.
ತಾಲೂಕಿನ ಬೆಳಕೂಡ ಗ್ರಾಮದಲ್ಲಿಗುರುವಾರ ಬೆಳಗ್ಗೆ ಹಳೇ ಮೊಬೈಲ್ ಬ್ಯಾಟರಿ ಸ್ಫೋಟಗೊಂಡು 5 ವರ್ಷದ ಬಾಲಕಿ ತೀವ್ರವಾಗಿ ಗಾಯಗೊಂಡಿದ್ದಾಳೆ. ಸುಪ್ರಿಯಾ ನಾವಿ ಗಾಯಗೊಂಡ ಬಾಲಕಿ.
ಈಕೆ ಬೆಳಗ್ಗೆ ನೀರು ಕಾಯಿಸುವ ಒಲೆ ಬಳಿ ಆಟವಾಡುತ್ತಿರುವಾಗ ಏನಾಗುತ್ತದೆ ಎಂದು ಅರಿಯದೆ ಒಲೆಗೆ ಮೊಬೈಲ್ ಬ್ಯಾಟರಿ ಹಾಕಿದ್ದಾಳೆ. ಆಗ ಬ್ಯಾಟರಿ ಸ್ಫೋಟಗೊಂಡಿದ್ದು ಬಾಲಕಿಯ ಕಣ್ಣಿಗೆ ತೀವ್ರ ಗಾಯವಾಗಿದೆ. ಆಕೆಗೆ ಚಿಕ್ಕೋಡಿ ಸಾರ್ವಜನಿಕ ಆಸ್ಪತ್ರೆಯಲ್ಲಿಚಿಕಿತ್ಸೆ ನೀಡಲಾಗುತ್ತಿದ್ದು , ಈಗ ಆರೋಗ್ಯವಾಗಿದ್ದಾಳೆ ಎಂದು ವೈದ್ಯರು ತಿಳಿಸಿದ್ದಾರೆ.