ಬಿಲ್ಲು- ಬಾಣ ಬಳಸಿ ಕೋತಿ ಬೇಟೆ

ಎಂ.ಕೆ.ಹುಬ್ಬಳ್ಳಿ: ಸಮೀಪದ ಪಾರಿಶ್ವಾಡ ರಸ್ತೆ ಪಕ್ಕದ ಜೋಡು ಕೆರೆ ಬಳಿ ಕೋತಿಯೊಂದನ್ನು ಹತ್ಯೆ ಮಾಡಿದ ದುಷ್ಕರ್ಮಿಗಳ ತಂಡವೊಂದು ಸುತ್ತಲಿನ ರೈತರು, ಯುವಕರು ಬರುತ್ತಿದ್ದಂತೆ ಕೃತ್ಯಕ್ಕೆ ತಂದಿದ್ದ ವಾಹನ ಬಿಟ್ಟು ಪರಾರಿಯಾಗಿದ್ದಾರೆ.

ಟ್ರ್ಯಾಕ್ಸ್‌ನಲ್ಲಿ ಬಂದಿದ್ದ ಮೂವರು ಮಹಿಳೆಯರು ಹಾಗೂ ಒಬ್ಬ ಪುರುಷನಿದ್ದ ತಂಡದಿಂದ ಈ ಕೃತ್ಯ ನಡೆದಿದೆ. ಬೆಳಗ್ಗೆ ಬಂದಿದ್ದ ದುಷ್ಕರ್ಮಿಗಳು ಬಿಲ್ಲು-ಬಾಣ ಬಳಸಿ ಕೋತಿಗಳನ್ನು ಹತ್ಯೆ ಮಾಡಿ ಒಯ್ಯಲು ಯತ್ನಿಸುತ್ತಿದ್ದರು ಎನ್ನಲಾಗಿದೆ.

ಬಾಣ ತಗುಲಿ ಗಂಭೀರ ಗಾಯಗೊಂಡ ಕೋತಿ ಚೀರಾಡುತ್ತಿದ್ದಂತೆ ಗಮನಿಸಿದ ಅಕ್ಕಪಕ್ಕದ ಜಮೀನಿನಲ್ಲಿದ್ದ ರೈತರು, ಯುವಕರು ಘಟನಾ ಸ್ಥಳಕ್ಕೆ ಬಂದು ಬೇಟೆಯಲ್ಲಿ ತೊಡಗಿದ್ದವರನ್ನು ಪ್ರಶ್ನಿಸುತ್ತಿದ್ದಂತೆ ಆರೋಪಿತರು ತಾವು ತಂದಿದ್ದ ವಾಹನ ಬಿಟ್ಟು ಪಕ್ಕದಲ್ಲಿದ್ದ ಕಬ್ಬಿನ ಗದ್ದೆಯ ಮೂಲಕ ಪರಾರಿಯಾಗಿದ್ಧಾರೆ. ಅವರು ಬಿಟ್ಟು ಹೋಗಿದ್ದ ವಾಹನ ಒಯ್ಯಲು ಬರಬಹುದೆಂದು ಸ್ಥಳೀಯರು ಮೃತ ಕೋತಿ ಇಟ್ಟುಕೊಂಡು ಕಾಯುತ್ತ ಸಂಜೆ ತನಕ ಕುಳಿತಿದ್ದರು.

ಆದರೆ, ಅವರು ಇತ್ತ ಸುಳಿಯದ ಕಾರಣ ಸಂಜೆ ವೇಳೆಗೆ ತಾವೆ ಗುಂಡಿ ತೆಗೆದು ಪೂಜೆ ನೆರವೇರಿಸಿ ಮೃತ ಕೋತಿಯ ಅಂತ್ಯ ಸಂಸ್ಕಾರ ನೆರವೇರಿಸಿದ್ದಾರೆ. ಸಾರ್ವಜನಿಕರು ನೀಡಿದ ಮಾಹಿತಿ ಮೇರೆಗೆ ಸ್ಥಳಕ್ಕೆ ಪೊಲೀಸರು ಕೂಡ ಭೇಟಿ ನೀಡಿ ಪರಿಶೀಲಿಸಿದ್ದಾರೆ.