ನೇಸರಗಿ ವ್ಯಕ್ತಿ ಕೊಲೆ ಪ್ರಕರಣ; ಐವರು ಆರೋಪಿಗಳ ಬಂಧನ

ಘಟಪ್ರಭಾ : ನೇಸರಗಿ ವ್ಯಕ್ತಿ ಕೊಲೆ ಪ್ರಕರಣದ ಐವರು ಆರೋಪಿಗಳನ್ನು ಘಟಪ್ರಭಾ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಗೋಕಾಕದ ನಿವಾಸಿಗಳಾದ ಮನೋಜಕುಮಾರ ವಾಲಿಕಾರ, ಜ್ಯೋತಿಬಾ ರವಳೋಜಿ, ರಾಹುಲ್‌ ಎಂಟಗೌಡರ, ಮಂಜುನಾಥ ಕಲ್ಲೋಳಿ, ಸಾಗರ ತಾನಾಜಿ ಬಂಧಿತ ಆರೋಪಿಗಳು.

ಬೈಲಹೊಂಗಲ ತಾಲೂಕಿನ ನೇಸರಗಿಯ ನಿವಾಸಿ ಜಗದೀಶ ತಿಪ್ಪಣ್ಣ ಕರಾಳಿ (35) ಅವರ ಶವ ಏ.16ರಂದು ಘಟಪ್ರಭಾ ಎಡದಂಡೆ ಕಾಲುವೆಯಲ್ಲಿ ಪತ್ತೆಯಾಗಿತ್ತು. ಈ ಕುರಿತು ತನಿಖೆ ಕೈಗೊಂಡ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಘಟನೆಯ ಹಿನ್ನೆಲೆ: ಜಗದೀಶ ತಿಪ್ಪಣ್ಣ ಕರಾಳಿ ಬಳಿ ಇರುವ ಹಣ ದೋಚುವ ಸಲುವಾಗಿ ಅವರನ್ನು ಆರೋಪಿಗಳು ಗೋಕಾಕದ ಸಂಗೊಳ್ಳಿ ರಾಯಣ್ಣನ ಸರ್ಕಲ್‌ನಿಂದ ರಿಕ್ಷಾದಲ್ಲಿ ಅಪಹರಿಸಿದ್ದರು. ಬಳಿಕ ಶಿಂಗ್ಳಾಪುರ ಹತ್ತಿರ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು ಹಣ ಕಸಿದುಕೊಂಡು ಕೊಲೆ ಮಾಡಿದ್ದರು. ಪುರಾವೆ ನಾಶ ಮಾಡುವ ಉದ್ದೇಶದಿಂದ ತುಂಬಿ ಹರಿಯುತ್ತಿರುವ ಘಟಪ್ರಭಾ ಎಡದಂಡೆ ಕಾಲುವೆಗೆ ಶವ ಎಸೆದು ಪರಾರಿಯಾಗಿದ್ದರು. ವಿಚಾರಣೆ ವೇಳೆ ಇದನ್ನು ಆರೋಪಿಗಳು ಒಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿಗಳಿಂದ ರಿಕ್ಷಾ, ಮೋಟಾರ್‌ ಸೈಕಲ್‌ ಮತ್ತು ಮೊಬೈಲ್‌ ಪೋನ್‌ ವಶಪಡಿಸಿಕೊಳ್ಳಲಾಗಿದೆ. ಮೂಡಲಗಿ ಸಿಪಿಐ ವೆಂಕಟೇಶ ಮುರನಾಳ, ಘಟಪ್ರಭಾ ಪಿಎಸ್‌ಐ ವೈ.ಆರ್‌.ಬಿಳಿಗಿ ಹಾಗೂ ಸಿಬ್ಬಂದಿ ತನಿಖೆ ಕೈಗೊಂಡಿದ್ದರು.