ಕಲ್ಲಿನಿಂದ ಹೊಡೆದು ಸಹೋದರನ ಕೊಲೆ

ಬೆಳಗಾವಿ: ಅರಣ್ಯ ಇಲಾಖೆಯ ಅತಿಕ್ರಮಿತ ಭೂಮಿ ವಿಷಯವಾಗಿ ಸಹೋದರನನ್ನೇ ಕೊಲೆ ಮಾಡಿದ ಘಟನೆ ತಾಲೂಕಿನ ಹಾಲಭಾವಿ ಗ್ರಾಮದಲ್ಲಿ ನಡೆದಿದೆ. ಹಾಲಭಾವಿಯ ಲಗಮಪ್ಪ ಶೆಟ್ಟೆಪ್ಪ ನಾಯಿಕ್‌(50) ಕೊಲೆಯಾದ ವ್ಯಕ್ತಿ.

ಕಾಕತಿ ಅರಣ್ಯ ವ್ಯಾಪ್ತಿಯ ಅತಿಕ್ರಮಿತ ಭೂಮಿಯಲ್ಲಿ ಒಡ್ಡು ನಿರ್ಮಿಸುವ ವಿಷಯವಾಗಿ ಲಗಮಪ್ಪ ನಾಯಿಕ್‌ ಸಹೋದರರ ನಡುವೆ ಜಗಳ ನಡೆದಿತ್ತು. ಇದೇ ಕಾರಣಕ್ಕೆ ಸೋಮವಾರ ಬೆಳಗ್ಗೆ ಈರಪ್ಪ ಶೆಟ್ಟೆಪ್ಪ ನಾಯಿಕ್‌, ಸಚಿನ್‌ ಲಗಮಪ್ಪ ನಾಯಿಕ್‌, ಪರಪ್ಪ ಮಲ್ಲಪ್ಪ ಕಟಬಾಳ ಎನ್ನುವವರು ಲಗಮಪ್ಪ ನಾಯಿಕ್‌ ಮತ್ತು ಆತನ ಸಹೋದರ ರಾಮಪ್ಪ ಶೆಟ್ಟೆಪ್ಪ ನಾಯಿಕ್‌ ಮೇಲೆ ಹಲ್ಲೆ ನಡೆಸಿದ್ದಾರೆ. ಈ ವೇಳೆ ತಲೆ ಹಿಂಭಾಗಕ್ಕೆ ಕಲ್ಲಿನಿಂದ ಹೊಡೆದಿದ್ದರಿಂದ ತೀವ್ರ ರಕ್ತಸ್ರಾವಗೊಂಡ ಲಗಮಪ್ಪ ಮೃತಪಟ್ಟಿದ್ದಾರೆ.

ಈ ಕುರಿತು ರಾಮಪ್ಪ ನಾಯಿಕ್‌ ಕಾಕತಿ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ದೂರಿನ ಹಿನ್ನೆಲೆಯಲ್ಲಿ ಕಾಕತಿ ಠಾಣೆ ಪೊಲೀಸರು ಈರಪ್ಪ ನಾಯಿಕ್‌, ಸಚಿನ್‌ ನಾಯಿಕ್‌, ಪರಪ್ಪ ಕಟಬಾಳ ಅವರನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.