ಖಾನಾಪುರದಲ್ಲಿ ನಳನಳಿಸುತ್ತಿರುವ ಸೃಷ್ಟಿಯ ಸೊಬಗು

ಖಾನಾಪುರ: ಈ ವರ್ಷದ ಸಾಂದರ್ಭಿಕ ವರ್ಷಧಾರೆಗೆ ಸೃಷ್ಟಿಯ ಸೊಬಗು ಇಮ್ಮಡಿಗೊಂಡಿದೆ. ಖಾನಾಪುರ ತಾಲೂಕಿನ ಎಲ್ಲೆಡೆ ಉತ್ತಮ ಮಳೆಯ ಕಾರಣದಿಂದಾಗಿ ವಾತಾವರಣ ನಯನ ಮನೋಹರವಾಗಿ ಗೋಚರಿಸುತ್ತಿದೆ.

ತಾಲೂಕಿನ ಪ್ರಮುಖ ಬೆಳೆಯಾದ ಭತ್ತ ಈಗಾಗಲೇ ಮೊಳಕಾಲೆತ್ತರಕ್ಕೆ ಬೆಳೆದು ನಿಂತಿದ್ದು, ಗದ್ದೆಗಳು ಹಚ್ಚ ಹಸುರಿನಿಂದ ಕಂಗೊಳಿಸುತ್ತಿವೆ. ಕಳೆದ ಕೆಲ ದಿನಗಳಿಂದ ಸುರಿದ ಭಾರೀ ಮಳೆಯಿಂದಾಗಿ ಜಲಾವೃತಗೊಂಡಿದ್ದ ಭತ್ತದ ಗದ್ದೆಗಳಲ್ಲಿ ನೀರಿನ ಸಂಗ್ರಹ ಕಡಿಮೆಯಾಗಿದೆ. ಪರಿಣಾಮ ಗದ್ದೆಗಳಲ್ಲಿ ಭತ್ತದ ಪೈರು ನಿಧಾನವಾಗಿ ಚಿಗುರೊಡೆಯಲಾರಂಭಿಸಿದೆ. ಮಳೆಗಾಲದ ವೈಭವದಿಂದಾಗಿ ತಾಲೂಕಿನ ಬೆಟ್ಟ ಗುಡ್ಡಗಳಲ್ಲೂ ಹಚ್ಚ ಹಸಿರಿನ ವಾತಾವರಣ ನಿರ್ಮಾಣಗೊಂಡಿದೆ. ತಾಲೂಕಿನ ಕೌಂದಲ್‌, ಲಾಲವಾಡಿ, ನಂದಗಡ, ಹಲಸಿ, ಹಲಗಾ, ನಾಗರಗಾಳಿ, ಲೋಂಡಾ, ಗುಂಜಿ ಮತ್ತಿತರ ಭಾಗದ ಗದ್ದೆಗಳಲ್ಲಿ ಭತ್ತದ ಬೆಳೆ ಉತ್ತಮವಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ಮಳೆಯ ಅಭಾವದಿಂದ ಸತತ ಬರಗಾಲ ಆವರಿಸಿ ಕಂಗೆಟ್ಟಿದ್ದ ರೈತರ ಮೊಗದಲ್ಲಿ ಈ ವರ್ಷದ ಮಳೆ ಮತ್ತು ಬೆಳೆ ಆಶಾಭಾವನೆ ಮೂಡಿಸಿದೆ.