ರಸ್ತೆ ಬಂದ್‌ಗೆ ಸಾರ್ವಜನಿಕರು, ರೈತರ ಆಕ್ಷೇಪ

ಯಮಕನಮರಡಿ: ಹುಕ್ಕೇರಿ ತಾಲೂಕಿನ ಪಾಶ್ಚಾಪುರದಿಂದ ಅಂಕಲಗಿ-ಬೆಳಗಾವಿ ಹೋಗುವ ಮುಖ್ಯ ರಸ್ತೆಗೆ ಗೋಕಾಕ ತಾಲೂಕಿನ ಕುಂದರಗಿ ಕೆಲವರು ಮಣ್ಣು ಹಾಕಿ ಬಂದ್‌ ಮಾಡಿರುವುದರಿಂದ ವಾಹನಗಳು ಪರದಾಡುವಂತಾಗಿದೆ.

ಪಾಶ್ಚಾಪುರ ಗ್ರಾಮದ ಬಹಳಷ್ಟು ರೈತರ ಹೊಲಗದ್ದೆಗಳು ಕುಂದರಗಿ ಪ್ರದೇಶದಲ್ಲಿಬರುತ್ತಿದ್ದು ಅಲ್ಲಿಹೋಗಲು ಅನಾನುಕೂಲವಾಗುತ್ತಿದೆ. ಜತೆಗೆ ಆಹಾರ ಸಾಮಗ್ರಿ ಸಾಗಾಟ, ಅಂಬ್ಯುಲೆನ್ಸ್‌, ಅಗ್ನಿಶಾಮಕ ವಾಹನಗಳಿಗೆ ತುರ್ತು ಸ್ಥಿತಿಯಲ್ಲಿಓಡಾಟ ತೊಂದರೆಯಾಗಲಿದೆ ಎಂದು ರೈತರು, ಸಾರ್ವಜನಿಕರು ದೂರಿದ್ದಾರೆ. ಈಗಾಗಲೇ ಜಿಲ್ಲಾಧಿಕಾರಿ ಡಾ. ಎಸ್‌.ಬಿ. ಬೊಮ್ಮನಹಳ್ಳಿಯವರು ಜಿಲ್ಲೆಯ ಮುಖ್ಯ ರಸ್ತೆಗಳನ್ನು ಬಂದ್‌ ಮಾಡದಂತೆ ಆದೇಶಿಸಿದ್ದಾರೆ. ಶಾಸಕ ಸತೀಶ ಜಾರಕಿಹೊಳಿ ಅವರು ಸಹ ಕುಂದರಗಿ ಗ್ರಾಪಂನವರಿಗೆ ರಸ್ತೆ ತಡೆ ತೆರವುಗೊಳಿಸಲು ತಿಳಿಸಿದ್ದಾರೆ.