ರಮೇಶ್‌ ಜಾರಕಿಹೊಳಿ ಕುರಿತು ಅಶ್ಲೀಲ ಪೋಸ್ಟ್‌: ಯೋಧನ ವಿರುದ್ಧ ದೂರು

ಘಟಪ್ರಭಾ (ಬೆಳಗಾವಿ): ಗೋಕಾಕ ಶಾಸಕ ರಮೇಶ್‌ ಜಾರಕಿಹೊಳಿ ಕುರಿತು ವಾಟ್ಸ್‌ಆ್ಯಪ್‌ ಗ್ರೂಪಲ್ಲಿ ಅಶ್ಲೀಲ ಪದ ಬಳಸಿ ಅವಹೇಳನ ಮಾಡಿದ ಆರೋಪದಲ್ಲಿ ಸಿಆರ್‌ಪಿಎಫ್‌ ಯೋಧರೊಬ್ಬರ ವಿರುದ್ಧ ಘಟಪ್ರಭಾ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.

ತಾಲೂಕಿನ ಸಾವಳಗಿ ಬಳಿಯ ಖಾನಾಪುರ ಗ್ರಾಮದ ಚರಣ್‌ ಸಿದ್ಧರಾಮ ಮನಗೂಳಿ ಆರೋಪಿ. ರಾಜ್ಯ ಸರಕಾರ ಪತನವಾದ ಜು.23ರ ಸಂಜೆ 'ಸಾವಳಗಿ ಪ್ರೀಮಿಯರ್‌ ಗ್ರೂಪ್‌' ಹೆಸರಿನ ವಾಟ್ಸ್‌ ಆ್ಯಪ್‌ ಗ್ರೂಪಲ್ಲಿ ವಿವೇಕ್‌ ಪಾಟೀಲ್‌ ಎಂಬುವರು ರಮೇಶ್‌ ಜಾರಕಿಹೊಳಿ ಪರವಾಗಿ ಪೋಸ್ಟ್‌ ಮಾಡಿದ್ದರು. ಇದಕ್ಕೆ ಪ್ರತಿಕ್ರಿಯೆ ನೀಡುವಾಗ ಚರಣ್‌, ರಮೇಶ್‌ ಜಾರಕಿಹೊಳಿ ಕುರಿತು ಅಶ್ಲೀಲ ಪದ ಬಳಸಿದ್ದರು.

ಈ ಹಿನ್ನೆಲೆಯಲ್ಲಿ ವಿವೇಕ್‌ ಪಾಟೀಲ್‌ ಅವರ ತಂದೆ ಸತ್ಯಗೌಡ ಭೀಮಗೌಡ ಪಾಟೀಲ್‌ ಎನ್ನುವವರು ಚರಣ್‌ ವಿರುದ್ಧ ಘಟಪ್ರಭಾ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.