ಸಂತ್ರಸ್ತ ಮಹಿಳೆಯರ ನೆರವಿಗೆ 'ಒನ್‌ ಸ್ಟಾಪ್‌ ಸರ್ವಿಸ್‌ ಸೆಂಟರ್‌'

ಬೆಳಗಾವಿ : ದೌರ್ಜನ್ಯಕ್ಕೊಳಗಾದ ಮಹಿಳೆಯರಿಗೆ ಒಂದೇ ಸೂರಿನಲ್ಲಿ ಪೊಲೀಸ್‌ ನೆರವಿನೊಂದಿಗೆ ಚಿಕಿತ್ಸೆ, ಕಾನೂನು ನೆರವು ಮತ್ತು ಆಪ್ತಸಮಾಲೋಚನೆ ಸೇವೆ ಒದಗಿಸಲು ನಗರದಲ್ಲಿ 'ಒನ್‌ಸ್ಟಾಪ್‌ ಸರ್ವಿಸ್‌ ಸೆಂಟರ್‌' ಆರಂಭಿಸಲಾಗಿದೆ.

ನಗರದ ಮಹಿಳಾ ಪೊಲೀಸ್‌ ಠಾಣೆಯಲ್ಲಿ ನಿರ್ಮಾಣಗೊಂಡಿರುವ ಏಕ ನಿಲುಗಡೆ ಸೇವಾ ಕೇಂದ್ರ (ಒನ್‌ಸ್ಟಾಪ್‌ ಸರ್ವಿಸ್‌ ಸೆಂಟರ್‌)ವನ್ನು ಶನಿವಾರ ಲೋಕಾರ್ಪಣೆಗೊಳಿಸಿದ ನಗರ ಪೊಲೀಸ್‌ ಆಯುಕ್ತ ಡಾ.ಡಿ.ಸಿ.ರಾಜಪ್ಪ ಈ ವಿಷಯ ತಿಳಿಸಿದರು.

''ಬೆಳಗಾವಿ ಪೊಲೀಸ್‌ ಕಮಿಷನರೇಟ್‌ ಅಡಿಯ ಯಾವುದೇ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ನೊಂದ ಮಹಿಳೆಯರು ನೇರವಾಗಿ ಈ ಕೇಂದ್ರಕ್ಕೆ ಬಂದು, ಮಹಿಳಾ ಪೊಲೀಸರಿಗೆ ಲಿಖಿತ ದೂರು ಸಲ್ಲಿಸಬಹುದು. ಸಂತ್ರಸ್ತ ಮಹಿಳೆಗೆ ಅಗತ್ಯ ಎಲ್ಲ ರೀತಿಯ ಸೌಲಭ್ಯಗಳು ಇಲ್ಲಿ ಸಿಗಲಿವೆ'', ಎಂದರು.

''ರಾಜ್ಯ ಸರಕಾರ 2018-19ನೇ ಸಾಲಿನ ಬಜೆಟ್‌ನಲ್ಲಿ ಮಾನಸಿಕವಾಗಿ ನೊಂದ ಮಹಿಳೆಯರಿಗೆ ಸಾಂತ್ವನದ ಜತೆಗೆ ಬಟ್ಟೆ, ಆಹಾರ, ಔಷಧೋಪಚಾರ, ಕೌನ್ಸೆಲಿಂಗ್‌, ಉಚಿತ ಕಾನೂನು ಸಲಹೆ ಸೇರಿದಂತೆ ಎಲ್ಲ ಸೌಲಭ್ಯಗಳು ಒಂದೇ ಸ್ಥಳದಲ್ಲಿ ಸಿಗುವ ಉದ್ದೇಶದಿಂದ ಮಹಿಳಾ ಪೊಲೀಸ್‌ ಠಾಣೆಗಳನ್ನು ಒನ್‌ಸ್ಟಾಪ್‌ ಸರ್ವಿಸ್‌ ಸೆಂಟರ್‌ಗಳನ್ನಾಗಿ ಉನ್ನತೀಕರಿಸುವುದಾಗಿ ಘೋಷಿಸಿತ್ತು. ಅದರಂತೆ ನಗರದಲ್ಲಿ ಕೇಂದ್ರ ಆರಂಭಿಸಲಾಗಿದೆ. ಸಂತ್ರಸ್ತರು ಸದುಪಯೋಗ ಪಡಿಸಿಕೊಳ್ಳಬೇಕು'', ಎಂದು ವಿನಂತಿಸಿದರು.

ಡಿಸಿಪಿ ಮಹಾನಿಂಗ ನಂದಗಾಂವಿ, ಮಾರ್ಕೆಟ್‌ ಎಸಿಪಿ ನಾರಾಯಣ ಬರಮಣಿ ಇನ್ನಿತರರ ಅಧಿಕಾರಿಗಳು ಉಪಸ್ಥಿತರಿದ್ದರು.

24 ಗಂಟೆ ಸೇವೆ :
ಮಹಿಳಾ ಪೊಲೀಸ್‌ ಠಾಣೆಯಲ್ಲಿ ಆರಂಭಗೊಂಡಿರುವ ಒನ್‌ಸ್ಟಾಪ್‌ ಸರ್ವಿಸ್‌ ಸೆಂಟರ್‌ನಲ್ಲಿ ಓರ್ವ ವೈದ್ಯ, ಇಬ್ಬರು ಸಮಾಲೋಚಕರು, ಇಬ್ಬರು ಕಾನೂನು ಸಲಹೆಗಾರರು ಹಾಗೂ ಓರ್ವ ಮಹಿಳಾ ಮತ್ತು ಮಕ್ಕಳ ಅಧಿಕಾರಿಗಳನ್ನೊಳಗೊಂಡ ತಂಡ ದಿನದ 24 ಗಂಟೆಗಳ ಕಾಲ ಸೇವೆಯಲ್ಲಿರುತ್ತದೆ. ಮಹಿಳಾ ಪೊಲೀಸ್‌ ಠಾಣೆ ದೂ. 0831-2405253 ಅಥವಾ ಮಹಿಳಾ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಅವರ ಮೊ. 9480804049 ಗೆ ಸಂತ್ರಸ್ತ ಮಹಿಳೆಯರು ನೇರವಾಗಿ ಸಂಪರ್ಕಿಸಬಹುದು.