ಈರುಳ್ಳಿ ಬೆಳೆಗಾರರ ಪ್ರತಿಭಟನೆ

ಬೆಳಗಾವಿ : ನಗರದ ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿರುವ ದಲ್ಲಾಳಿಗಳ ಕುತಂತ್ರದಿಂದ ಈರುಳ್ಳಿ ದರ ಕುಸಿತ ಕಂಡಿದೆ ಎಂದು ಆರೋಪಿಸಿದ ರೈತರು ಎಪಿಎಂಸಿ ಎದುರಿನ ಬೆಳಗಾವಿ-ಕಂಗ್ರಾಳಿ ರಸ್ತೆ ತಡೆದು ಶನಿವಾರ ಪ್ರತಿಭಟನೆ ನಡೆಸಿದರು.

''800 ರೂ.ನಿಂದ 1600 ರೂ.ವರೆಗೆ ಇದ್ದ ಈರುಳ್ಳಿ ದರ ಏಕಾಏಕಿ 150ರಿಂದ 500 ರೂ.ವರೆಗೆ ಕುಸಿತ ಕಂಡಿದೆ. ಬೆವರು ಸುರಿಸಿ ಬೆಳೆದ ಬೆಳೆ ಕೈಗೆ ಬಂದಿರುವಾಗ ದರ ಕುಸಿತ ರೈತರ ಆತ್ಮಸ್ಥೈರ್ಯ ಕುಸಿಯುವಂತೆ ಮಾಡುತ್ತಿದೆ. ಇಂತಹ ಬೆಳವಣಿಗೆಗಳಿಗೆ ದಲ್ಲಾಳಿಗಳ ಕುತಂತ್ರ ಕಾರಣ. ದರ ಕುಸಿತ ತಡೆಯುವಲ್ಲಿ ರಾಜ್ಯ ಸರಕಾರವೂ ವಿಫಲವಾಗುತ್ತಿದೆ. ತಕ್ಷಣ ದರ ಕುಸಿತ ತಡೆದು ರೈತರ ಹಿತ ರಕ್ಷಣೆ ಮಾಡಬೇಕು'', ಎಂದು ಆಗ್ರಹಿಸಿದ ರೈತರು ಕೆಲ ಹೊತ್ತು ರಸ್ತೆ ತಡೆದು ಪ್ರತಿಭಟನೆ ನಡೆಸಿದರು.

ರೈತರ ಪ್ರತಿಭಟನೆಯಂದ ಎಪಿಎಂಸಿ ಮಾರುಕಟ್ಟೆಯಲ್ಲಿ ಕೆಲ ಗಂಟೆಗಳ ಕಾಲ ವ್ಯಾಪಾರ ವಹಿವಾಟು ಸ್ಥಗಿತಗೊಂಡಿತ್ತು. ಸ್ಥಳಕ್ಕಾಗಮಿಸಿದ ಎಪಿಎಂಸಿ ಠಾಣೆ ಪೊಲೀಸರು ರೈತರ ಮನವೊಲಿಸಿ ಪ್ರತಿಭಟನೆ ಹಿಂಪಡೆಯುವಂತೆ ಮಾಡಿದರು.