ನೇಸರಗಿ: ಐಟಿಐ ಸ್ಥಳಾಂತರಕ್ಕೆ ವಿರೋಧ

ನೇಸರಗಿ: ಸ್ಥಳೀಯ ಸರಕಾರಿ ಪಿಯು ಕಾಲೇಜಿನಲ್ಲಿನಡೆಸಲಾಗುತ್ತಿರುವ ಗ್ರಾಮದ ಸರಕಾರಿ ಕೈಗಾರಿಕಾ ತರಬೇತಿ ಸಂಸ್ಥೆ(ಐಟಿಐ)ಯನ್ನು ಜಾಗದ ಕೊರತೆಯಿಂದ ಬೇರೆ ಗ್ರಾಮಕ್ಕೆ ಸ್ಥಳಾಂತರಿಸುವುದಕ್ಕೆ ವಿರೋಧ ವ್ಯಕ್ತಪಡಿಸಿರುವ ಸ್ಥಳೀಯ ಮುಖಂಡರು, ಗ್ರಾಮದಲ್ಲೇ ಸೂಕ್ತ ಸ್ಥಳ ಪಡೆದು ಕಟ್ಟಡ ನಿರ್ಮಿಸುವಂತೆ ಶಾಸಕ ಮಹಾಂತೇಶ ದೊಡಗೌಡರ ಅವರನ್ನು ಒತ್ತಾಯಿಸಿದ್ದಾರೆ.

ಈ ವಿಷಯವಾಗಿ ಸ್ಥಳೀಯ ಐಟಿಐ ಕಾಲೇಜಿನಲ್ಲಿಶುಕ್ರವಾರ ನಡೆದ ಸಭೆಯಲ್ಲಿಪಾಲ್ಗೊಂಡಿದ್ದ ಮುಖಂಡರಾದ ಪಿಕೆಪಿಎಸ್‌ ಅಧ್ಯಕ್ಷ ಆರ್‌.ಎಂ. ಯತ್ತಿನಮನಿ, ಬಾಳಪ್ಪ ಮಾಳಗಿ, ಡಾ. ಚನಗೌಡ ಪಾಟೀಲ ಮಾತನಾಡಿ, ಗ್ರಾಮದ ಎಪಿಎಂಸಿ ಕಾಲೇಜು ನಿರ್ಮಾಣಕ್ಕೆ ಸೂಕ್ತ ಸ್ಥಳವಾಗಿದೆ. ಇದರಿಂದ ವಿದ್ಯಾರ್ಥಿಗಳಿಗೆ ವಾಹನ ಸೌಕರ್ಯದ ಜತೆಗೆ ಉತ್ತಮ ಸ್ಥಳವೂ ಸಿಕ್ಕಂತಾಗುತ್ತದೆ. ಇಲ್ಲಿಜಾಗ ಸಿಗದಿದ್ದರೆ ಪದವಿ, ಪಿಯು ಕಾಲೇಜಿನ ಪ್ರಾಂಗಣದ ಖಾಲಿ ಸ್ಥಳದಲ್ಲಾದರೂ ಐಟಿಐ ಕಾಲೇಜು ಕಟ್ಟಡ ನಿರ್ಮಿಸಬಹುದು ಎಂದು ಸಲಹೆ ನೀಡಿದರು.

ಪ್ರಸ್ತುತ ಸಭೆಯಲ್ಲಿಒಂದು ನಿರ್ಧಾರಕ್ಕೆ ಬರಲಾಗದೆ ಮತ್ತೊಮ್ಮೆ ಮುಖಂಡರೆಲ್ಲಸೇರಿ ಕಾಲೇಜು ಕಟ್ಟಡ ಸ್ಥಳದ ಬಗ್ಗೆ ಚರ್ಚಿಸಿ ನಿರ್ಧಾರ ಕೈಗೊಂಡು ಶಾಸಕರಿಗೆ ತಿಳಿಸುವುದಾಗಿ ನಿರ್ಧರಿಸಿದರು.

ಕಾಲೇಜಿನ ಪ್ರಾಚಾರ್ಯ ಎನ್‌.ಬಿ. ದಾಸ್ತಿಕೊಪ್ಪ ಅವರು ಕಾಲೇಜು ಕಟ್ಟಡಕ್ಕೆ ಅಗತ್ಯವಾದ ಜಮೀನಿನ ಕುರಿತು ವಿವರಗಳನ್ನು ನೀಡಿದರು.

ಈ ವೇಳೆ ಮುಖಂಡರಾದ ಕೆಂಚಪ್ಪ ಕಳ್ಳಿಬಡ್ಡಿ, ಮಲ್ಲೇಶಪ್ಪ ಮಾಳನ್ನವರ, ಸೋಮಪ್ಪ ಸೋಮನ್ನವರ, ಗ್ರಾಪಂ ಅಧ್ಯಕ್ಷ ಸತಾರಸಾಬ ಮೊಕಾಶಿ, ಗಿರಿಜಾ ಗಲಬಿ, ಸದಸ್ಯರಾದ ನಿಂಗಪ್ಪ ತಳವಾರ, ದೇಮಣ್ಣ ಗುಜನಟ್ಟಿ, ಪ್ರಕಾಶ ತೋಟಗಿ, ಉಮೇಶ ಅಗಸಿಮನಿ, ಅಡಿವೆಪ್ಪ ಮಾಳನ್ನವರ, ಶಂಕರ ತಿಗಡಿ ಮತ್ತಿತರರು ಪಾಲ್ಗೊಂಡಿದ್ದರು.