ಸುಗಮ ಚುನಾವಣೆಗೆ ಪೊಲೀಸ್‌ ಆಯುಕ್ತಾಲಯ ಸಿದ್ಧತೆ

ಬೆಳಗಾವಿ : ಲೋಕಸಭೆ ಚುನಾವಣೆ ಸಂದರ್ಭದಲ್ಲಿ ಸಂಭವನೀಯ ಅಕ್ರಮ ತಡೆಯಲು ನಗರ ಪೊಲೀಸ್‌ ಆಯುಕ್ತಾಲಯ ಸಿದ್ಧತೆ ಮಾಡಿಕೊಳ್ಳುತ್ತಿದ್ದು, ಈ ನಿಟ್ಟಿನಲ್ಲಿ ಮುಂಜಾಗೃತೆ ಕ್ರಮಗಳನ್ನು ಕೈಗೊಳ್ಳುತ್ತಿದೆ.

ಬೆಳಗಾವಿ ತಾಲೂಕಿನಾದ್ಯಂತ ಈಗಾಗಲೇ ಮತಗಟ್ಟೆ ಹಂತದವರೆಗೂ ಪರಿಶೀಲನೆ ಮಾಡಲಾಗಿದ್ದು, ಹಿಂದಿನ ಚುನಾವಣೆಗಳ ಸಂದರ್ಭ ಹಾಗೂ ಈಗಿನ ಸ್ಥಿತಿಯ ಆಧಾರದ ಮೇಲೆ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ.

ರೌಡಿಶೀಟರ್‌ಗಳಿಂದ ಮುಚ್ಛಳಿಕೆ ಬರೆಯಿಸಿಕೊಳ್ಳಲಾಗಿದ್ದು ಇತರೆ ಅಪರಾಧ ಹಿನ್ನೆಲೆಯವರಿಗೆ ಎಚ್ಚರಿಕೆ ನೀಡಿದೆ. ಅಕ್ರಮ ಸಾರಾಯಿ ತಾಲೂಕು ಪ್ರವೇಶಿಸದಂತೆ ತಡೆಯಲು ಮಹಾರಾಷ್ಟ್ರದ ಕಡೆಯ ಗಡಿಯಲ್ಲಿ ಎರಡು ಹಾಗೂ ನೆರೆಯ ತಾಲೂಕಿನ ಗಡಿಯಲ್ಲಿ 7 ಸೇರಿದಂತೆ ಒಟ್ಟು 9 ಚೆಕ್‌ಪೋಸ್ಟ್‌ಗಳನ್ನು ತೆರೆದು ಸಿಸಿಟಿವಿ ಕ್ಯಾಮರಾ ಅಳವಡಿಕೆ ಮಾಡಲಾಗಿದೆ. ಚುನಾವಣೆಗೆ ಸಂಬಂಧಿಸಿದಂತೆ ಆಡಳಿತಾತ್ಮಕ ಕೆಲಸಗಳಿಗೆ ಸಿಂಗಲ್‌ವಿಂಡೋ ವ್ಯವಸ್ಥೆ ತೆರೆಯಲಾಗಿದೆ.

ಕಾನೂನು ಬಾಹಿರ ಚಟುವಟಿಕೆಗಳಿಗೆ ಕಡಿವಾಣ ಬಿಗಿದು ಲೋಕಸಭೆ ಚುನಾವಣೆ ಶಾಂತಿಯುತ ಹಾಗೂ ಸಾಂಗವಾಗಿ ನಡೆಯಲು ಬೇಕಿರುವ ಎಲ್ಲ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಕಾನೂನು ಸುವ್ಯವಸ್ಥೆಯ ಡಿಸಿಪಿ ಸೀಮಾ ಲಾಟ್ಕರ್‌ ತಿಳಿಸಿದ್ದಾರೆ.