ಸುಫಿಯಾ 'ರನ್‌'ಗೆ ಪೊಲೀಸರ ಸಾಥ್‌

ಬೆಳಗಾವಿ : ಶಾಂತಿ ಮತ್ತು ಸೌಹಾರ್ದದ ಸಂದೇಶ ನೀಡುವ ನಿಟ್ಟಿನಲ್ಲಿ ಕಾಶ್ಮೀರದಿಂದ ಕನ್ಯಾಕುಮಾರಿ ವರೆಗೆ 'ರನ್‌ ಫಾರ್‌ ಹೋಪ್‌' ಅಭಿಯಾನ ಹಮ್ಮಿಕೊಂಡಿರುವ ದೆಹಲಿ ಮೂಲದ ಯುವತಿ ಸುಫಿಯಾ ಖಾನ್‌ ಅವರನ್ನು ಶುಕ್ರವಾರ ಬೆಳಗ್ಗೆ ನಗರ ಪೊಲೀಸ್‌ ಅಧಿಕಾರಿಗಳು ಸ್ವಾಗತಿಸಿದರು.

ಒಟ್ಟು 4035 ಕಿಮೀ. ಓಟದ ಅಭಿಯಾನ ಆರಂಭಿಸಿರುವ ಸುಫಿಯಾ ಶುಕ್ರವಾರ ಮಹಾರಾಷ್ಟ್ರ ಮೂಲಕ ಬೆಳಗಾವಿ ಪ್ರವೇಶಿಸಿದ್ದರು. ಅವರಿಗೆ ಸುವರ್ಣ ವಿಧಾನಸೌಧ ದವರೆಗೂ ಸಾಥ್‌ ನೀಡಿದ ಮಾಳಮಾರುತಿ ಠಾಣೆ ಪಿಐ ಬಿ.ಆರ್‌.ಗಡ್ಡೇಕರ್‌, ಮಾರಿಹಾಳ ಠಾಣೆ ಪಿಐ ವಿಜಯ ಸಿನ್ನೂರ, ಸಂಚಾರ ಠಾಣೆ ಪಿಐ ಆರ್‌.ಆರ್‌.ಪಾಟೀಲ ಮತ್ತಿತರರು ಪ್ರೋತ್ಸಾಹಿಸಿ ಬೀಳ್ಕೊಟ್ಟರು.