ರಾಷ್ಟ್ರ ಮಟ್ಟದ ಸ್ಪರ್ಧೆಯಲ್ಲಿ ಪ್ರಾಜೆಕ್ಟ್ ಪ್ರದರ್ಶನ

ಬೆಳಗಾವಿ: ಗೋಗಟೆ ತಾಂತ್ರಿಕ ಮಹಾವಿದ್ಯಾಲಯದ ಮೆಕಾನಿಕಲ್‌ ವಿಭಾಗದ 4ನೇ ಸೆಮಿಸ್ಟರ್‌ ವಿದ್ಯಾರ್ಥಿಗಳ 'ಮೆಕಾಟ್ರೋನ್‌' ತಂಡವು ಬಹುರಾಷ್ಟ್ರೀಯ ಕಂಪೆನಿ ಕೆಪಿಐಟಿ ಹಮ್ಮಿಕೊಂಡಿದ್ದ ರಾಷ್ಟ್ರಮಟ್ಟದ ಪ್ರಾಜೆಕ್ಟ್ ವಿನ್ಯಾಸ ಸ್ಪರ್ಧೆಯಲ್ಲಿ ಉತ್ತಮ 30 ತಂಡಗಳಲ್ಲಿ ಆಯ್ಕೆಯಾಗಿ ಪ್ರಾಜೆಕ್ಟ್ ಪ್ರದರ್ಶನ ನೀಡಿದೆ.

ವಿದ್ಯಾರ್ಥಿಗಳಾದ ಅಬ್ದುಲ್‌ ಜಬ್ಬರ ಖಾನ್‌, ಅಜಯ್‌ ಲೆಂಗಡೆ, ಅಂಕುರ್‌ ಚಿಟ್ನಿಸ್‌, ಅಜಿತ ನವಿ, ಅವನ ಮುನ್ಷಿ ತಂಡದಲ್ಲಿದ್ದರು. ಪ್ರೊ. ಎಸ್‌.ಎಲ್‌. ಗೊಂಬಿ ಮಾರ್ಗದರ್ಶನದಲ್ಲಿ ಇವರು ಪ್ರಾಜೆಕ್ಟ್ ವಿನ್ಯಾಸಗೊಳಿಸಿದ್ದರು. ಕೆಪಿಐಟಿ ಫೆ.22 ರಿಂದ 24ರ ವರೆಗೆ ಪುಣೆಯಲ್ಲಿ ಹಮ್ಮಿಕೊಂಡಿದ್ದ ರಾಷ್ಟ್ರಮಟ್ಟದ ಆಯ್ದ 30 ಪ್ರಾಜೆಕ್ಟ್ ಪ್ರದರ್ಶನದಲ್ಲಿ ಈ ತಂಡವು ತಮ್ಮ ಪ್ರಾಜೆಕ್ಟ್ ಪ್ರದರ್ಶಿಸಿತು.

ಭಾರತದ ಸರಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ ಸಹಯೋಗದೊಂದಿಗೆ ಕೆಪಿಐಟಿ ಟೆಕ್ನಾಲಜೀಸ್‌ ಲಿ. 'ಶಕ್ತಿ ಮತ್ತು ಅದರ ಚಲಶೀಲತೆ' ಎಂಬ ಉದ್ದೇಶದೊಂದಿಗೆ ಮುಂದಿನ ಪೀಳಿಗೆಯ ತಂತ್ರಜ್ಞಾನಗಳನ್ನು ಅಭಿವೃದ್ಧಿ ಪಡಿಸಲು ವಿದ್ಯಾರ್ಥಿಗಳಿಂದ ಹೊಸ ತಂತ್ರಜ್ಞಾನ ಯೋಜನೆಗಳನ್ನು ಆಹ್ವಾನಿಸಿತ್ತು. ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದ 1915 ತಂಡಗಳ ಪೈಕಿ ಶ್ರೇಷ್ಠ 30 ತಂಡಗಳನ್ನು ಪ್ರದರ್ಶನ ಸುತ್ತಿಗೆ ಆಯ್ಕೆ ಮಾಡಲಾಗಿತ್ತು. 30ರಲ್ಲಿ ಜಿಐಟಿ ತಂಡ ಕೂಡ ಇತ್ತು. ಈ ತಂಡ ವಿದ್ಯುತ್‌ ಉತ್ಪಾದನೆ ಮೇಲೆ ಪ್ರಾಜೆಕ್ಟ್ ವಿನ್ಯಾಸ ಮಾಡಿತ್ತು ಎಂದು ಕಾಲೇಜಿನ ಪ್ರಕಟಣೆ ತಿಳಿಸಿದೆ.