ಆಸ್ತಿ ತೆರಿಗೆ ಪಾವತಿ ಇನ್ನಷ್ಟು ಸುಲಭ

ಬೆಳಗಾವಿ : ನಗರದ 58 ವಾರ್ಡ್‌ಗಳ ನಿವಾಸಿಗಳಿಗೆ ಆಸ್ತಿ ತೆರಿಗೆ ಪಾವತಿಸುವ ಪ್ರಕ್ರಿಯೆಯನ್ನು ಸುಲಭ ಮತ್ತು ಸರಳವಾಗಿಸಲು ಮಹಾನಗರ ಪಾಲಿಕೆ ತಂತ್ರಜ್ಞಾನ ಆಧಾರಿತ ಇನ್ನೊಂದು ಸೇವೆ ಆರಂಭಿಸಿದ್ದು, ಪ್ರಾದೇಶಿಕ ಆಯುಕ್ತರೂ ಆಗಿರುವ ಆಡಳಿತಾಧಿಕಾರಿ ಪಿ.ಎ. ಮೇಘಣ್ಣವರ್‌ ಗುರುವಾರ ಇದನ್ನು ನಾಗರಿಕರ ಸೇವೆಗೆ ಸಮರ್ಪಣೆ ಮಾಡಿದರು.

'ಇಡಿಟಿಸಿ' ಮಶಿನ್‌ ಮೂಲಕ ಇದು ಕಾರ‍್ಯ ನಿರ್ವಹಿಸಲಿದ್ದು ಪಾಲಿಕೆ ಕಂದಾಯ ವಿಭಾಗದ ಸಿಬ್ಬಂದಿ ಮನೆ ಮನೆಗೆ ಹೋಗಿ ಅವರ ಆಸ್ತಿ ತೆರಿಗೆಯ ಬಿಲ್‌ ನೀಡುವ ಮೂಲಕ ಕರ ಸ್ವೀಕಾರ ಮಾಡಲಿದ್ದಾರೆ. ಕಾರ್ಡ್‌ ಬಳಸಿ ಇಲ್ಲವೆ ನಗದು ರೂಪದಲ್ಲಿ ತೆರಿಗೆ ಭರಿಸಬಹುದಾಗಿದೆ. ಈ ಮಶಿನ್‌ಗಳನ್ನು ಎಚ್‌ಡಿಎಫ್‌ಸಿ ಬ್ಯಾಂಕ್‌ನವರು ದೇಣಿಗೆ ರೂಪದಲ್ಲಿ ಪಾಲಿಕೆಗೆ ನೀಡಿದ್ದಾರೆ.

ಈ ವರೆಗೆ ಆನ್‌ಲೈನ್‌ ಮತ್ತು ಬೆಳಗಾವಿ ಒನ್‌ ಮೂಲಕ ಆಸ್ತಿ ತೆರಿಗೆ ಪಾವತಿಸಲು ಅವಕಾಶವಿತ್ತು. ಹೊಸ ವ್ಯವಸ್ಥೆ ಮೂಲಕ ಮನೆಯಲ್ಲೇ ಕುಳಿತು ಕೆಲ ನಿಮಿಷಗಳಲ್ಲಿ ತೆರಿಗೆ ಪಾವತಿಸುವ ಪ್ರಕ್ರಿಯೆ ಪೂರ್ಣಗೊಳಿಸಬಹುದಾಗಿದೆ.

ಹೊಸ ತಂತ್ರಜ್ಞಾನದ ಮೂಲಕ ಆಸ್ತಿ ತೆರಿಗೆ ಪಾವತಿಸಿದ ಗ್ರಾಹಕರನ್ನು ಇದೇ ಸಂದರ್ಭದಲ್ಲಿ ಅಭಿನಂದಿಸಲಾಯಿತು. ಪಾಲಿಕೆ ಆಯುಕ್ತ ಶಶಿಧರ ಕುರೇರ ತಂತ್ರಜ್ಞಾನ ಆಧಾರಿತ 'ಇಡಿಟಿಸಿ' ಮಶಿನ್‌ನ ಮಾಹಿತಿ ನೀಡಿದರು.

ಪಾಲಿಕೆಯ ಮುಖ್ಯಲೆಕ್ಕಾಧಿಕಾರಿ ರಾಮಪ್ಪ ಹಟ್ಟಿ, ನಗರ ಯೋಜನಾಧಿಕಾರಿ ಎ.ಎಸ್‌.ಕಾಂಬಳೆ, ದಕ್ಷಿಣ ಭಾಗದ ಮುಖ್ಯಅಭಿಯಂತರ ಲಕ್ಷ್ಮೇ ನಿಪ್ಪಾಣಿಕರ್‌, ಆರೋಗ್ಯಾಧಿಕಾರಿ ಡಾ. ಶಶಿಧರ ನಾಡಗೌಡ, ಪರಿಸರ ಅಭಿಯಂತ ಉದಯಕುಮಾರ ಹಾಗೂ ಇತರೆ ಅಧಿಕಾರಿಗಳು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.