ಶಿಬಿರಕ್ಕೆ ಬಾರದ ವೈದ್ಯರು: ವಿಶೇಷಚೇತನರ ಪ್ರತಿಭಟನೆ

ರಾಯಬಾಗ : ಪ್ರತಿ ತಿಂಗಳ ಮೂರನೇ ಗುರುವಾರ ಹಮ್ಮಿಕೊಳ್ಳುವ ಶಿಬಿರಕ್ಕೆ ಸಂಬಂಧಿಸಿದ ವೈದ್ಯರು ಸತತ ನಾಲ್ಕನೇ ಬಾರಿ ಗೈರು ಹಾಜರಾದ ಹಿನ್ನೆಲೆಯಲ್ಲಿ ಸ್ಥಳೀಯ ಸಾರ್ವಜನಿಕ ಆಸ್ಪತ್ರೆಗೆ ಆಗಮಿಸಿದ್ದ ವಿಶೇಷಚೇತನರು ಆಕ್ರೋಶಗೊಂಡು ಗುರುವಾರ ಪ್ರತಿಭಟನೆ ನಡೆಸಿದರು.

ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಪ್ರತಿ ತಿಂಗಳು ಮೂರನೇ ಗುರುವಾರ ವಿಶೇಷಚೇತನರಿಗಾಗಿ ವೈದ್ಯಕೀಯ ಶಿಬಿರ ಹಮ್ಮಿಕೊಳ್ಳಲಾಗುತ್ತಿದೆ. ಆದರೆ ಸತತ ನಾಲ್ಕು ತಿಂಗಳಿಂದ ಯಾವುದೇ ವೈದ್ಯರು ನಿಗದಿತ ದಿನದಂದು ಶಿಬಿರಕ್ಕೆ ಆಗಮಿಸುತ್ತಿಲ್ಲ. ತಾಲೂಕಿನ ವಿವಿಧ ಗ್ರಾಮಗಳಿಂದ ಆಗಮಿಸುವ ವಿಶೇಷಚೇತನರು ತಜ್ಞ ವೈದ್ಯರ ದಾರಿ ನೋಡಿ ಸಂಜೆವರೆಗೆ ಕಾದು ವಾಪಸ್‌ ತೆರಳುತ್ತಿದ್ದಾರೆ. ಗುರುವಾರ ಆಸ್ಪತ್ರೆಗೆ ಬಂದ ವಿಶೇಷಚೇತನರು ವೈದ್ಯರು ಬಾರದ್ದರಿಂದ ರೊಚ್ಚಿಗೆದ್ದು ಪ್ರತಿಭಟನೆಗೆ ಇಳಿದರು.

ಸಾರ್ವಜನಿಕ ಆಸ್ಪತ್ರೆಯ ಮುಖ್ಯ ವೈದ್ಯಾಧಿಕಾರಿ ಡಾ. ರಮೇಶ ರಂಗನ್ನವರ ಕೂಡಲೇ ಮೇಲಧಿಕಾರಿಗಳ ಜತೆ ಮಾತನಾಡಿ ಸಮಸ್ಯೆ ಬಗೆಹರಿಸುವ ಭರವಸೆ ನೀಡಿದರು.

ಸಾಗರ ಝೆಂಡೆನ್ನವರ, ಆದಿನಾಥ ದತ್ತವಾಡ, ವೈ.ಪಿ.ಬೆಳಗಲಿ, ಪರಶುರಾಮ ಉಪ್ಪಾರ, ಇಂದುಮತಿ ಕದಮ, ವಿಷ್ಣು ಮಾಳಿ, ಮಹಾದೇವ ಉಪ್ಪಾರ, ಮೋನಪ್ಪ ಬಡಿಗೇರ, ಸಂಜಯ ಕಾಂಬಳೆ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.