ಬೀದಿ ವ್ಯಾಪಾರಿಗಳ ತೆರವು ಖಂಡಿಸಿ ಬೆಳಗಾವಿ ಜಿಲ್ಲಾಧಿಕಾರಿಗೆ ಬೀದಿ ವ್ಯಾಪಾರಿಗಳ ಸಂಘಟನೆ ಕಾರ್ಯಕರ್ತರ ಮನವಿ

ಬೆಳಗಾವಿ: ಪೊಲೀಸರು ಬೀದಿ ಬದಿಯಲ್ಲಿ ವ್ಯಾಪಾರ ನಡೆಸಲು ಅವಕಾಶ ಕೊಡುತ್ತಿಲ್ಲ ಎಂದು ಆರೋಪಿಸಿ ಬೀದಿ ವ್ಯಾಪಾರಿಗಳ ಸಂಘಟನೆ ಕಾರ್ಯಕರ್ತರು ಶನಿವಾರ ಜಿಲ್ಲಾಧಿಕಾರಿ ಕಚೇರಿ ಎದುರು ಧರಣಿ ನಡೆಸಿ ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿದರು.

ಪೊಲೀಸರು ಏಕಾಏಕಿ ಬಂದು ತರಕಾರಿಗಳನ್ನು ಎಸೆದು ಬೀದಿ ವ್ಯಾಪಾರಿಗಳನ್ನು ತೆರವುಗೊಳಿಸಿದ್ದಾರೆ. ಈಗಾಗಲೇ ಪಾಲಿಕೆಯಿಂದ ಅಧಿಕೃತ ನೋಂದಣಿ ಪಡೆದು ಬೀದಿ ಬದಿಯಲ್ಲಿವ್ಯಾಪಾರ ಆರಂಭಿಸಿದ್ದೇವೆ. ಆದರೆ, ಪಾಲಿಕೆ ಹಾಗೂ ಪೊಲೀಸ್‌ ಸಿಬ್ಬಂದಿ ಪದೇ ಪದೆ ವ್ಯಾಪಾರಿಗಳಿಗೆ ಕಿರುಕುಳ ನೀಡುತ್ತಿದ್ದಾರೆ. ಆದ್ದರಿಂದ ಬೀದಿ ವ್ಯಾಪಾರಿಗಳಿಗೆ ಪರ್ಯಾಯ ವ್ಯವಸ್ಥೆ ಕಲ್ಪಿಸಬೇಕು ಎಂದು ಆಗ್ರಹಿಸಿದರು.

ಖಡೇಬಜಾರ್‌, ಶನಿವಾರ್‌ ಕೂಟ, ಸಮಾದೇವಿ ಗಲ್ಲಿಯ ವ್ಯಾಪಾರಿಗಳನ್ನು ಟಾರ್ಗೆಟ್‌ ಮಾಡಲಾಗಿದೆ. ಸಾವಿರಾರು ರೂ. ತರಕಾರಿಯನ್ನು ಬೀದಿಯಲ್ಲಿ ಎಸೆದ ಪೊಲೀಸ್‌ ಸಿಬ್ಬಂದಿ ವಿರುದ್ಧ ಕ್ರಮ ಜರುಗಿಸಬೇಕು ಆಗ್ರಹಿಸಿದರು.

ಸಂಗೀತಾ ಖೋತ್‌, ಸರಸ್ವತಿ ಜಾಧವ, ಸುನಿತಾ ಕಾಂಬಳೆ, ದಯಾ ಪ್ರಕಾಶ ಕಣಬರಕರ್‌, ಜೋತಿಬಾ ಪಾಟೀಲ, ಬಾಳು ಪಾಟೀಲ, ಸಚಿನ್‌ ಕಿಲ್ಲೇಕರ್‌, ಗೋವಿಂದ ಲಾಳಗೆ, ಲಕ್ಷತ್ರ್ಮಣ ಸಾಂಬ್ರೆಕರ್‌, ಯಲಪ್ಪಾ ಸನದಿ, ಅಜಿತ ಸನದಿ ಮತ್ತಿತರರು ಇದ್ದರು.