ಪುನರ್ವಸು ಮಳೆಗೆ ನೀರು ನೀರಾದ ಮಹಾನಗರ

ಬೆಳಗಾವಿ : ಸತತವಾಗಿ ಸುರಿಯುತ್ತಿರುವ ಪುನರ್ವಸು ಮಳೆಯಿಂದ ಬೆಳಗಾವಿ ಮಹಾನಗರ ನೀರು ನೀರಾಗಿದೆ. ಗಟಾರು, ನಾಲಾಗಳು ತುಂಬಿ ಹರಿಯುತ್ತಿರುವುದರಿಂದ ಹಲವು ಕಡೆ ರಸ್ತೆಗಳಲ್ಲಿ ನೀರು ಹರಿಯುತ್ತಿವೆ.

ಮಳೆ ನೀರಿನಿಂದ ನೆನೆದು ಅನಗೋಳ ಮತ್ತು ಕ್ಯಾಂಪ್‌ ಪ್ರದೇಶದ ಕೆಲ ಮನೆಗಳ ಗೋಡೆಗಳು ಭಾಗಶಃ ಬಿದ್ದಿವೆ. ನಗರ ಸುತ್ತಲಿನ ಗದ್ದೆಗಳು ಕೆರೆ ರೂಪ ಪಡೆದಿವೆ. ಅಲತಗಾ ಮಾರ್ಗದ ಹಳೆ ಬ್ರಿಜ್‌ ಮಾರ್ಕಂಡೇಯ ನದಿ ನೀರಿನಲ್ಲಿ ಮುಳುಗಿದೆ. ಪಕ್ಕದಲ್ಲೇ ಇರುವ ಹೊಸ ಬ್ರಿಜ್‌ ಎತ್ತರದಲ್ಲಿದ್ದು ಸಂಚಾರಕ್ಕೆ ಸಮಸ್ಯೆಯಾಗಿಲ್ಲ.

ಮಳೆ ಮತ್ತು ಕಳಪೆ ಕಾಮಗಾರಿಯಿಂದ ಹಿಂಡಾಲ್ಕೋ ಬ್ರಿಜ್‌ ಬಳಿ, ಶಾಹುನಗರ ಕ್ರಾಸ್‌ ಸೇರಿದಂತೆ ಅನೇಕ ಕಡೆ ರಸ್ತೆಯ ಡಾಂಬರ್‌ ಕಿತ್ತು ಹೊಂಡಗಳು ನಿರ್ಮಾಣವಾಗಿವೆ. ಬಾಕ್ಸೈಟ್‌ ರಸ್ತೆಯ ಮರಾಠಾ ಮಂಡಳ ಕಾಲೇಜು ಬಳಿ ರಸ್ತೆ ಕುಸಿದು ದೊಡ್ಡ ಹೊಂಡದ ನಿರ್ಮಾಣವಾಗಿದೆ.

ನಗರ ಪರಿಸರದ ಮಳೆ ನೀರು ಕಿರು ನಾಲಾಗಳ ಮೂಲಕ ಬಳ್ಳಾರಿ ನಾಲಾಕ್ಕೆ ಸೇರುತ್ತಿರುವುದರಿಂದ ಬಳ್ಳಾರಿ ನಾಲಾ ತುಂಬಿ ಹರಿಯುತ್ತಿದೆ.