ಹೊಸ ರೀತಿಯಲ್ಲಿ ಜೀವ ಪಡೆದ ರಮೇಶ್‌-ಲಕ್ಷ್ಮಿ ರಾಜಕೀಯ ಸಂಘರ್ಷ

ಬೆಳಗಾವಿ: ಪಿಎಲ್‌ಡಿ ಬ್ಯಾಂಕ್‌ ಅಧ್ಯಕ್ಷ ಸ್ಥಾನದ ಚುನಾವಣೆ ಗದ್ದಲದ ಬಳಿಕ ತಣ್ಣಗಾಗಿದ್ದ ಶಾಸಕಿ ಲಕ್ಷ್ಮಿ ಹೆಬ್ಬಾಳಕರ್‌ ಮತ್ತು ಉಸ್ತುವಾರಿ ಸಚಿವ ರಮೇಶ್‌ ಜಾರಕಿಹೊಳಿ ನಡುವಿನ ರಾಜಕೀಯ ಸಂಘರ್ಷ ಈಗ ಹೊಸ ರೀತಿಯಲ್ಲಿಜೀವ ಪಡೆದಿದೆ.

ಬೆಳಗಾವಿ ಎಪಿಎಂಸಿ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ, ಲಕ್ಷ್ಮಿ ಹೆಬ್ಬಾಳಕರ್‌ ಬಣದ ಕಾಂಗ್ರೆಸ್‌ ಅಭ್ಯರ್ಥಿಯನ್ನು ಆಯ್ಕೆ ಮಾಡಿದ್ದು ತಾನೇ ಎಂಬರ್ಥದ ರಮೇಶ್‌ ಜಾರಕಿಹೊಳಿ ಅವರ ಮಾತು ಜಿಲ್ಲಾರಾಜಕಾರಣದಲ್ಲಿಕುತೂಹಲ ಕೆರಳಿಸಿದೆ. ಜತೆಗೆ ಇದೇ ವಿಚಾರದಲ್ಲಿಇಬ್ಬರೂ ನಾಯಕರು 'ಕಾಣದ ಕೈ'ಗೆ ಕೊಟ್ಟಿರುವ ಉತ್ತರ ಎಪಿಎಂಸಿ ರಾಜಕಾರಣದ ಬಗ್ಗೆ ಟ್ವಿಸ್ಟ್‌ ಕೊಟ್ಟಿದೆ.

ಈಚೆಗೆ ನಡೆದ ಬೆಳಗಾವಿ ಎಪಿಎಂಸಿ ಚುನಾವಣೆಯಲ್ಲಿಲಕ್ಷ್ಮಿ ಹೆಬ್ಬಾಳಕರ್‌ ಬಣದ ಯುವರಾಜ್‌ ಕದಂ ಅಧ್ಯಕ್ಷರಾಗಿ ಅವಿರೋಧ ಆಯ್ಕೆಯಾಗಿದ್ದರು. ಅದು ಅಚ್ಚರಿಗೆ ಕಾರಣವಾಗಿತ್ತು. ಇದಾದ ಬಳಿಕ ಕೆಲ ದಿನಗಳ ಹಿಂದೆ ಸುದ್ದಿಗಾರರೊಂದಿಗೆ ಮಾತನಾಡಿದ್ದ ಶಾಸಕಿ ಲಕ್ಷ್ಮಿ ಹೆಬ್ಬಾಳಕರ್‌, ''ಈ ಚುನಾವಣೆಯಿಂದ ರಮೇಶ್‌ ಜಾರಕಿಹೊಳಿ ಅವರಿಗೆ ಹಿನ್ನಡೆಯಾಗಿದ್ದು ನಿಜ'', ಎಂದು ಒಪ್ಪಿಕೊಂಡಿದ್ದರು. ಅಲ್ಲದೆ, ಈ ಆಯ್ಕೆ ಹಿಂದೆ ಕಾಣದ ಕೈ ಕೆಲಸ ಮಾಡಿದೆ ಎಂದು ಹೇಳಿದ್ದರು.

ಇದೇ ವಿಚಾರವಾಗಿ ಸೋಮವಾರ ಬೆಳಗ್ಗೆ ಬೆಳಗಾವಿಯಲ್ಲಿಸುದ್ದಿಗಾರರ ಪ್ರಶ್ನೆಗೆ ಉತ್ತರಿಸಿದ ರಮೇಶ್‌ ಜಾರಕಿಹೊಳಿ, ''ಆ ಕಾಣದ ಕೈ ನಾನೇ. ಏನೀಗ?'' ಎಂದು ಗುಟ್ಟು ಹೊರಹಾಕಿದ್ದಾರೆ. ಅಲ್ಲದೆ, 'ಲಕ್ಷ್ಮಿ ಹೆಬ್ಬಾಳಕರ್‌ ಸವಾಲು ಹಾಕಿದರೆ ಓಡಿ ಹೋಗಲು ಆಗುತ್ತದೆಯೇ?'' ಎಂದೆಲ್ಲಹೇಳಿ ತಿರುಗೇಟು ನೀಡಿದ್ದಾರೆ.

ಇದೇ ಮಾತಿಗೆ ಸುದ್ದಿಗಾರರಿಗೆ ಪ್ರತಿಕ್ರಿಯೆ ನೀಡಿರುವ ಲಕ್ಷ್ಮಿ ಹೆಬ್ಬಾಳಕರ್‌, ''ಇಂಥ ಚೈಲ್ಡಿಶ್‌ ಹೇಳಿಕೆಗಳಿಗೆ ನಾನು ಪ್ರತಿಕ್ರಿಯೆ ನೀಡುವುದಿಲ್ಲ. ನಾನು ನನ್ನ ಕ್ಷೇತ್ರದಲ್ಲಿ ಬ್ಯುಸಿ ಇದ್ದೇನೆ. ಈ ರೀತಿಯ ಹೇಳಿಕೆಗಳಿಗೆ ಉತ್ತರ ಕೊಡಲು ನನ್ನ ಹತ್ತಿರ ಸಮಯವೂ ಇಲ್ಲ. ಆಸಕ್ತಿ ಕೂಡ ಇಲ್ಲ'' ಎಂದು ಟಾಂಗ್‌ ಕೊಟ್ಟಿದ್ದಾರೆ.

'ಯುವರಾಜ್‌ ಕದಂ ಅವರನ್ನು ಅಧ್ಯಕ್ಷ ಮಾಡುತ್ತೇವೆಂದು ಸತೀಶ್‌ ಜಾರಕಿಹೊಳಿ ಅವರು ಕಳೆದ ಬಾರಿಯೇ ಮಾತು ಕೊಟ್ಟಿದ್ದರು. ಅದರಂತೆ ಅಧ್ಯಕ್ಷರಾಗಿದ್ದಾರೆ. ಅದಕ್ಕೆ ಎಂಇಎಸ್‌‍ನವರೂ ಸಾಥ್‌ ಕೊಟ್ಟಿದ್ದಾರೆ. ಈ ಬಗ್ಗೆ ಸತೀಶ್‌ ಜಾರಕಿಹೊಳಿ ಅವರನ್ನು ಕೇಳಿ'' ಎಂದರು.

ಸಚಿವರೊಂದಿಗೆ ಅಧ್ಯಕ್ಷರ ಭೋಜನ!
ಇಷ್ಟೆಲ್ಲನಡೆದ ಕೆಲವೇ ಹೊತ್ತಿನಲ್ಲಿಯೇ ಎಪಿಎಂಸಿ ಅಧ್ಯಕ್ಷ ಯುವರಾಜ್‌ ಕದಂ ಅವರು ಎಪಿಎಂಸಿಯಲ್ಲಿಸಚಿವರಾಗಿ ಭೋಜನ ವ್ಯವಸ್ಥೆ ಮಾಡಿದ್ದರು. ಬೆಳಗಾವಿ ಪಾಲಿಕೆ ಸಭೆ ಬಳಿಕ ಸಚಿವ ರಮೇಶ್‌ ಜಾರಕಿಹೊಳಿ ಎಪಿಎಂಸಿಗೆ ಹೋಗಿ ಯುವರಾಜ್‌ ಕದಂ ಅವರೊಂದಿಗೆ ಊಟ ಮಾಡಿದ್ದಾರೆ. ಅಲ್ಲದೆ, ಇಬ್ಬರೂ ಒಂದೇ ಕಾರಿನಲ್ಲಿಎಪಿಎಂಸಿಯಿಂದ ಪ್ರವಾಸಿ ಮಂದಿರಕ್ಕೆ ಬಂದಿದ್ದಾರೆ. ಹಾಗಾಗಿ ಈ ಎಲ್ಲಬೆಳವಣಿಗೆಗಳು ಕಾಂಗ್ರೆಸ್‌ ಮತ್ತು ಬಿಜೆಪಿ ಕಾರ್ಯಕರ್ತರಲ್ಲಿಕುತೂಹಲ ಸೃಷ್ಟಿಸಿದೆ. ಅಸಲಿಗೆ ಕಾಂಗ್ರೆಸ್‌ನ ಯುವರಾಜ್‌ ಕದಂ ಅವರನ್ನು ಅಧ್ಯಕ್ಷರನ್ನಾಗಿ ಮಾಡಿದ್ದು ಸಚಿವ ರಮೇಶ್‌ ಜಾರಕಿಹೊಳಿ ಅವರೇ? ಅಥವಾ ಯುವರಾಜ್‌ ಕದಂ ಅವರೇ ಬಿಜೆಪಿ ಗಾಳಕ್ಕೆ ಕಚ್ಚಿಕೊಂಡರೆ ಎನ್ನುವ ಹತ್ತಾರು ರೀತಿಯ ಚರ್ಚೆಗಳು ಗರಿಗೆದರಿವೆ.