ಗೋಕಾಕ ಜಿಲ್ಲಾಕೇಂದ್ರಕ್ಕೆ ಆಗ್ರಹಿಸಿ ಹೋರಾಟಕ್ಕೆ ಸಿದ್ಧ

ಗೋಕಾಕ: ಆಯೋಗಗಳ ವರದಿ ಮತ್ತು ಜಿಲ್ಲೆಗೆ ಬೇಕಾದ ಎಲ್ಲಮೂಲ ಸೌಲಭ್ಯಗಳನ್ನು ಹೊಂದಿರುವ ಪ್ರಮುಖ ವಾಣಿಜ್ಯ ಮತ್ತು ಕೈಗಾರಿಕಾ ಕೇಂದ್ರವಾಗಿರುವ ಗೋಕಾಕನ್ನು ಜಿಲ್ಲಾಕೇಂದ್ರವನ್ನಾಗಿ ಘೋಷಿಸಬೇಕೆಂದು ಸರಕಾರಕ್ಕೆ ಆಗ್ರಹಿಸಿ ನ್ಯಾಯವಾದಿಗಳ ಸಂಘದ ಕಾರ್ಯಾಲಯದಲ್ಲಿಸೋಮವಾರ ನಡೆದ ಸಭೆಯಲ್ಲಿಗೋಕಾಕ ನ್ಯಾಯವಾದಿಗಳ ಸಂಘ ಸರ್ವಾನುಮತದ ನಿರ್ಣಯ ಕೈಗೊಂಡಿತು.

ನ್ಯಾಯವಾದಿಗಳ ಸಂಘದ ಅಧ್ಯಕ್ಷ ಯು.ಬಿ. ಸಿಂಪಿ ಅವರ ಅಧ್ಯಕ್ಷತೆಯಲ್ಲಿಸಂಘದ ಪದಾಧಿಕಾರಿಗಳ ಮತ್ತು ನ್ಯಾಯವಾದಿಗಳ ಸಭೆ ಜರುಗಿತು. ನ್ಯಾಯವಾದಿ ಮತ್ತು ಬಿಜೆಪಿ ಮುಖಂಡ ಅಶೋಕ ಪೂಜಾರಿ ಮಾತನಾಡಿ, ''ಆಯೋಗಗಳ ವರದಿಗೆ ಪೂರಕವಾಗಿ ಗೋಕಾಕ ಎಂದೋ ಜಿಲ್ಲೆಯಾಗಿ ಘೋಷಣೆಯಾಗಬೇಕಾಗಿತ್ತು. ಆದರೆ ರಾಜಕೀಯ ಕಾರಣಗಳಿಂದಾಗಿ ಈ ಪ್ರಕ್ರಿಯೆ ತಾರ್ಕಿಕ ಅಂತ್ಯ ಕಂಡಿಲ್ಲ. ಇನ್ನು ಮುಂದೆ ಗೋಕಾಕ ಜಿಲ್ಲಾರಚನೆಯ ಹೋರಾಟ ತೀವ್ರ ಸ್ವರೂಪ ಪಡೆಯಲಿದೆ'', ಎಂದರು.

ಯು.ಬಿ. ಸಿಂಪಿ ಮಾತನಾಡಿ, ''ಗೋಕಾಕ ವಿಧಾನಸಭಾ ಕ್ಷೇತ್ರ ಉಪಚುನಾವಣೆ ಘೋಷಣೆಯಾಗಿರುವುದರಿಂದ ಹೋರಾಟದ ರೂಪರೇಷೆಗಳನ್ನು ಚುನಾವಣೆ ಮುಗಿಯುವವರೆಗೆ ತಾತ್ಕಾಲಿಕವಾಗಿ ಮುಂದೂಡಲಾಗಿದೆ. ಚುನಾವಣೆಯ ನಂತರ ಶ್ರೀ ಮುರುಘರಾಜೇಂದ್ರ ಸ್ವಾಮಿಗಳ ನೇತೃತ್ವದಲ್ಲಿಗೋಕಾಕ ನ್ಯಾಯವಾದಿಗಳ ಸಂಘ ಹೋರಾಟವನ್ನು ಮುಂದುವರಿಸಲಿದೆ'', ಎಂದು ಹೇಳಿದರು.

ದಸ್ತಗೀರ ಪೈಲವಾನ, ಬಿ.ಆರ್‌. ಕೊಪ್ಪ, ಶಾಮಾನಂದ ಪೂಜೇರಿ, ಶಶಿಧರ ದೇಮಶಟ್ಟಿ, ಎಸ್‌.ಎಸ್‌. ಪಾಟೀಲ, ಜಿ.ಎಮ್‌. ಬಟ್ಟಿ, ಎಸ್‌.ಜಿ. ಹಿರಟ್ಟಿ, ಎಮ್‌.ಕೆ. ಪೂಜೇರಿ, ಜಿ.ಎಸ್‌. ನಂದಿ, ಜಿ.ಕೆ. ಪೂಜೇರಿ, ಬಿ.ಟಿ. ಬೀರನಗಡ್ಡಿ, ಸಿ.ಬಿ. ಗಿಡ್ಡನ್ನವರ, ಜಿ.ಆರ್‌. ಪೂಜೇರಿ, ಪ್ರೇಮಾ ಚಿಕ್ಕೋಡಿ ಸೇರಿದಂತೆ ಅನೇಕ ವಕೀಲರು ಉಪಸ್ಥಿತರಿದ್ದರು.