ಕಾಲುಬಾಯಿ ಬೇನೆಯ ಜಾನುವಾರುಗಳಲ್ಲಿ ಚೇತರಿಕೆ

ಪಾಲಬಾವಿ : ಗ್ರಾಮದ ವಾರ್ಡ್‌ ನಂ.4ರ ದರ್ಗಾ ವ್ಯಾಪ್ತಿಯಲ್ಲಿ ಕಾಲುಬೇನೆ, ಬಾಯಿಬೇನೆ ರೋಗದಿಂದ ಹೆಚ್ಚಿನ ಜಾನುವಾರುಗಳು ಶಕ್ತಿಹೀನವಾಗಿವೆ ಎಂದು ಮುಗಳಖೋಡ ಪಶು ಆಸ್ಪತ್ರೆಯ ಡಾ. ಎಂ.ಕೆ. ಕಂಕಣವಾಡಿ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ.

ಕಳೆದ 15 ದಿನಗಳ ಹಿಂದೆ ಗ್ರಾಮದ ಜಾನುವಾರುಗಳಲ್ಲಿ ಕಾಣಿಸಿಕೊಂಡ ಕಾಲುಬೇನೆ, ಬಾಯಿಬೇನೆ ರೋಗದಿಂದ ಬಹುತೇಕ ಹಸು, ಎಮ್ಮೆ, ದನ-ಕರುಗಳು ತತ್ತರಿಸಿ ಹೋಗಿವೆ. ಮುಗಳಖೋಡ ಪಶು ಆಸ್ಪತ್ರೆ ಸಿಬ್ಬಂದಿ ಜಾನುವಾರುಗಳಿಗೆ ಸೂಕ್ತ ಚಿಕಿತ್ಸೆ ಹಾಗೂ ಔಷಧೋಪಚಾರ ನೀಡಿ ಭಾರಿ ಅನಾಹುತವನ್ನು ತಪ್ಪಿಸಿದ್ದಾರೆ. ಆದರೆ ಕೆಲವು ಜಾನವಾರುಗಳು ಚಿಕಿತ್ಸೆ ಫಲಕಾರಿ ಆಗದೆ ಸಾವಿಗೀಡಾಗಿವೆ. ಗ್ರಾಮದ ಇನ್ನೂ ಕೆಲವು ಜಾನುವಾರುಗಳು ಬೇರೆ ಬೇರೆ ಕಾಯಿಲೆಯಿಂದ ಬಳಲುತ್ತಿದ್ದು, 1 ಹಸು, 2 ಎಮ್ಮೆಗಳು ಸಾವಿಗೀಡಾಗಿವೆ ಎಂದರು.

ಆಸ್ಪತ್ರೆಗೆ ಬಂದ ಮಾಹಿತಿ ಪ್ರಕಾರ ಆಸ್ಪತ್ರೆಯಿಂದ ಔಷಧೋಪಚಾರ ಮಾಡಿಸಿಕೊಂಡ ಜಾನುವಾರುಗಳು ಆರೋಗ್ಯವಾಗಿವೆ. ಇನ್ನೂ ಕೆಲವು ಚೇತರಿಸಿಕೊಳ್ಳುತ್ತಿವೆ ಎಂದರು.