ಕಸನಾಳ ಗ್ರಾಮಸ್ಥರಿಂದ ಜಿಪಂ ಸಿಇಒಗೆ ಮನವಿ

ಖಡಕಲಾಟ : ಬೇಸಿಗೆಯ ತಾಪ ದಿನದಿಂದ ದಿನಕ್ಕೆ ಏರುತ್ತಿರುವ ಸಂದರ್ಭದಲ್ಲಿ ಪ್ರತ್ಯೇಕ ನೀರು ಸರಬರಾಜು ಯೋಜನೆ ಮೂಲಕ ಗ್ರಾಮಕ್ಕೆ ನೀರು ಪೂರೈಕೆ ಮಾಡಲು ಆಗ್ರಹಿಸಿ ಸಮೀಪದ ಕಸನಾಳ ಗ್ರಾಮಸ್ಥರು ಜಿಪಂ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗೆ ಮನವಿ ಸಲ್ಲಿಸಿದರು.

ಈ ಕುರಿತು ಕಳೆದ ಏ.30 ರಂದು ಮಾಣಕಾಪುರ-ಕಸನಾಳ ಬಹುಗ್ರಾಮ ಕುಡಿಯುವ ನೀರು ಯೋಜನೆ ಕಾಮಗಾರಿ ತಡೆದು ಗ್ರಾಮಸ್ಥರು ಪ್ರತಿಭಟನೆ ನಡೆಸಿದ್ದರು. ಆಗ ಸ್ಥಳಕ್ಕೆ ಯಾವುದೇ ಜನಪ್ರತಿನಿಧಿಗಳು ಅಥವಾ ಅಧಿಕಾರಿಗಳು ಬಂದು ಸ್ಪಂದಿಸದ ಹಿನ್ನಲೆಯಲ್ಲಿ ಮತ್ತೊಮ್ಮೆ ಮನವಿ ಮಾಡಿಕೊಂಡಿದ್ದಾರೆ.

ಬಹುಗ್ರಾಮ ಕುಡಿಯುವ ನೀರು ಯೋಜನೆಗೆ 2.90ಕೋಟಿ ರೂ. ಅನುದಾನ ಮಂಜೂರಾಗಿದೆ. ಗ್ರಾಮಕ್ಕೆ ಮಾಣಕಾಪುರದಿಂದ ನೀರು ಸರಬರಾಜು ಮಾಡುವುದಾಗಿ ಗುತ್ತಿಗೆದಾರರು ಹಾಗೂ ಅಧಿಕಾರಿಗಳು ಹೇಳುತ್ತಿದ್ದಾರೆ. ಈ ಯೋಜನೆಯು ಸಮೀಪದ ದೂಧಗಂಗಾ ನದಿ ಕಸನಾಳ ಗ್ರಾಮದಿಂದಲೇ ಹಾದು ಹೋಗುತ್ತಿರುವಾಗ ಮುಂದಿನ ಗ್ರಾಮದಿಂದ ನೀರು ಸರಬರಾಜು ಮಾಡುವ ಸಾಹಸ ಅಗತ್ಯವಿಲ್ಲ ಎಂದು ಮನವಿಯಲ್ಲಿ ತಿಳಿಸಲಾಗಿದೆ.

ಸುಖದೇವ ನಾಯಿಕ, ಗ್ರಾಪಂ ಸದಸ್ಯರಾದ ತುಳಸಿದಾಸ ನಾಯಿಕ, ಪಿಂಟು ಕಾಂಬಳೆ, ಕಿರಣ ಜಾಧವ, ಡಾ.ಅಜಿತ್‌ ಪಾಟೀಲ, ವಿಶ್ವಾಸ ನಾಯಿಕ್‌, ಅಶೋಕ ನಾಯಿಕ, ಅಜಿತ್‌ ಖೋತ್‌, ಪಂಡಿತ್‌ ನಾಯಿಕ್‌ ಮತ್ತಿತರು ಉಪಸ್ಥಿತರಿದ್ದರು.