ಬೆಳಗಾವಿಯಲ್ಲಿ ರೋಲ್‌ಬಾಲ್‌ ಸ್ಕೇಟಿಂಗ್‌ ಚಾಂಪಿಯನ್‌ಶಿಪ್‌

ಬೆಳಗಾವಿ: ನಗರದ ಶಿವಗಂಗಾ ರೋಲರ್‌ ಸ್ಕೇಟಿಂಗ್‌ ಅಕಾಡೆಮಿಯಲ್ಲಿ ಗುರುವಾರದಿಂದ ಫೆ.24ರ ವರೆಗೆ 3ನೇ ಏಷ್ಯನ್‌ ರೋಲ್‌ಬಾಲ್‌ ಸ್ಕೇಟಿಂಗ್‌ ಚಾಂಪಿಯನ್‌ ಶಿಪ್‌ ಹಮ್ಮಿಕೊಳ್ಳಲಾಗಿದೆ.

ಭಾರತೀಯ ರೋಲ್‌ಬಾಲ್‌ ಸ್ಕೇಟಿಂಗ್‌ ಸಂಘಟನೆ ಅಧ್ಯಕ್ಷ ಮನೋಜ್‌ಕುಮಾರ್‌ ಯಾದವ್‌ ಸುದ್ದಿಗೋಷ್ಠಿಯಲ್ಲಿ ಬುಧವಾರ ಈ ವಿಷಯ ತಿಳಿಸಿದರು. ''ಗುರುವಾರ ಸಂಜೆ 6 ಗಂಟೆಗೆ ಸ್ಪರ್ಧೆಗೆ ಚಾಲನೆ ನೀಡಲಾಗುವುದು. ಈ ಕಾರ‍್ಯಕ್ರಮದಲ್ಲಿ ಅರಣ್ಯ ಸಚಿವ ಸತೀಶ್‌ ಜಾರಕಿಹೊಳಿ, ಅಂತಾರಾಷ್ಟ್ರೀಯ ಕ್ರೀಡಾಪಟು ಮಲಪ್ರಭಾ ಜಾಧವ್‌, ಡಿಸಿಪಿ ಸೀಮಾ ಲಾಟ್ಕರ್‌ ಭಾಗವಹಿಸುವರು'', ಎಂದರು.

''ಭಾರತೀಯ ರೋಲ್‌ಬಾಲ್‌ ಸ್ಕೇಟಿಂಗ್‌ ಸಂಘಟನೆ ಹಾಗೂ ಕರ್ನಾಟಕ ರಾಜ್ಯ ರೋಲ್‌ಬಾಲ್‌ ಸ್ಕೇಟಿಂಗ್‌ ಸಂಘಟನೆಯ ಸಹಯೋಗದಲ್ಲಿ ನಡೆಯುತ್ತಿರುವ ಈ ಚಾಂಪಿಯನ್‌ಶಿಪ್‌ನಲ್ಲಿ ಭಾರತ, ಬಾಂಗ್ಲಾದೇಶ, ಸೌದಿ ಅರೇಬಿಯಾ, ಭೂತಾನ್‌, ಮಯನ್ಮಾರ್‌, ಮಾಲ್ಡೀವ್ಸ್‌, ಜಪಾನ್‌, ಶ್ರೀಲಂಕಾ, ನೇಪಾಳ, ಯುಎಇ, ಓಮಾನ್‌ ಮತ್ತು ಮಲೇಷ್ಯಾ ದೇಶಗಳ ಸ್ಕೇಟಿಂಗ್‌ ಪಟುಗಳು ಭಾಗವಹಿಸಲಿದ್ದಾರೆ'', ಎಂದು ಮಾಹಿತಿ ನೀಡಿದರು.

ಶಿವಗಂಗಾ ಸ್ಕೇಟಿಂಗ್‌ ಅಕಾಡೆಮಿ ಅಧ್ಯಕ್ಷೆ ಜ್ಯೋತಿ ಚಿಂಡಕ್‌, ನಿಖಿಲ್‌ ಚಿಂಡಕ್‌, ತರಬೇತಿದಾರರಾದ ಮಧು ಶರ್ಮಾ, ಸೂರ್ಯದತ್ತಾ, ಚೇತನ್‌ ತ್ರಿವೇದಿ, ಜ್ಯೋತಿ ಸಾಹು ಮತ್ತಿತರರು ಉಪಸ್ಥಿತರಿದ್ದರು.

ಪಾಕ್‌ ತಂಡ ಇಲ್ಲ: ''ಕರ್ನಾಟಕದಲ್ಲಿ ಮೊದಲ ಬಾರಿಗೆ ನಡೆಯುತ್ತಿರುವ ಈ ಚಾಂಪಿಯನ್‌ ಶಿಪ್‌ ಸ್ಪರ್ಧೆಗೆ ಪಾಕಿಸ್ತಾನ ತಂಡವನ್ನೂ ಆಹ್ವಾನಿಸಲಾಗಿತ್ತು. ಆದರೆ, ವೀಸಾ ಸಮಸ್ಯೆಯಾಗಿದ್ದರಿಂದ ಪಾಕ್‌ ತಂಡ ಆಗಮಿಸುತ್ತಿಲ್ಲ. ಕಳೆದ ಬಾರಿ ನಡೆದ 2ನೇ ರೋಲ್‌ಬಾಲ್‌ ಸ್ಕೇಟಿಂಗ್‌ ಚಾಂಪಿಯನ್‌ ಶಿಪ್‌ನಲ್ಲಿ ಭಾರತ ಚಾಂಪಿಯನ್‌ ಸ್ಥಾನಕ್ಕೇರಿದ್ದರೆ ಪಾಕಿಸ್ತಾನ ತಂಡ ರನ್ನರ್‌ ಅಪ್‌ ಆಗಿತ್ತು'', ಎಂದು ಮನೋಜ್‌ಕುಮಾರ್‌ ಯಾದವ್‌ ತಿಳಿಸಿದರು.