ಡಿಸಿಸಿ ಬ್ಯಾಂಕ್‌ ಫೈಟ್‌ಗೆ ಆರ್‌ಎಸ್‌ಎಸ್‌ ಪ್ರವೇಶ; ಬೆಳಗಾವಿ ಬಿಜೆಪಿ ಬಣಗಳನ್ನು ಒಗ್ಗೂಡಿಸಲು ಯತ್ನ

ಬೆಳಗಾವಿ: ಬೆಳಗಾವಿ ಜಿಲ್ಲಾ ರಾಜಕಾರಣದ ಪ್ರತಿಷ್ಠೆಯ ಕಣವಾಗಿರುವ ಡಿಸಿಸಿ ಬ್ಯಾಂಕ್‌ ಚುನಾವಣೆಯಲ್ಲಿಇದೇ ಮೊದಲ ಬಾರಿಗೆ ಆರ್‌ಎಸ್‌ಎಸ್‌ ಪ್ರವೇಶವಾಗಿದೆ.

ವ್ಯಕ್ತಿ ಪ್ರತಿಷ್ಠೆಯ ಕಣವಾಗಿರುವ ಡಿಸಿಸಿ ಬ್ಯಾಂಕ್‌ನಲ್ಲಿಪ್ರತಿ ವರ್ಷ ಬಿಜೆಪಿಯಲ್ಲಿಯೇ ಬಣಗಳು ಸೃಷ್ಟಿಯಾಗಿ ಪೈಪೋಟಿ ನಡೆಯುತ್ತಿದ್ದವು. ಇದೇ ಮೊದಲ ಬಾರಿಗೆ ಬಿಜೆಪಿಗರ ನಡುವೆ ಸಂಧಾನ ಏರ್ಪಡಿಸಲು ಆರ್‌ಎಸ್‌ಎಸ್‌ ಯತ್ನ ನಡೆಸಿದೆ. ಅದರ ಪರಿಣಾಮ ಗುರುವಾರ ಅಥಣಿಯಲ್ಲಿಡಿಸಿಎಂ ಲಕ್ಷ್ಮಣ ಸವದಿ, ಶಾಸಕ ಉಮೇಶ್‌ ಕತ್ತಿ, ಮಾಜಿ ಸಂಸದ ರಮೇಶ್‌ ಕತ್ತಿ, ಕೆಎಂಎಫ್‌ ಅಧ್ಯಕ್ಷ ಬಾಲಚಂದ್ರ ಜಾರಕಿಹೊಳಿ, ವಿಧಾನ ಪರಿಷತ್‌ ಮುಖ್ಯ ಸಚೇತಕ ಮಹಾಂತೇಶ್‌ ಕವಟಗಿಮಠ, ಸಂಸದ ಅಣ್ಣಾಸಾಹೇಬ ಜೊಲ್ಲೆ, ರಾಜ್ಯ ಸಭಾ ಸದಸ್ಯ ಈರಣ್ಣ ಕಡಾಡಿ ಸಭೆ ನಡೆಸಿದ್ದಾರೆ.

ಹೊಂದಾಣಿಕೆ ಮೇಲೆ ಚುನಾವಣೆ ನಡೆಸುವ ಸಂಬಂಧ ಚರ್ಚೆ ನಡೆಸಲಾಗಿದೆ. ಈ ವಿಚಾರವಾಗಿ ಮತ್ತೊಂದು ಸುತ್ತಿನ ಸಭೆ ನಡೆಯುವ ಸಾಧ್ಯತೆ ಇದೆ.

ಮೂರು ಬಣ:
ಇಷ್ಟು ವರ್ಷ ಡಿಸಿಸಿ ಬ್ಯಾಂಕ್‌ ಚುನಾವಣೆಯಲ್ಲಿಉಮೇಶ್‌ ಕತ್ತಿ, ಲಕ್ಷ್ಮಣ ಸವದಿ, ರಮೇಶ್‌ ಜಾರಕಿಹೊಳಿ ಮೂರು ಬಣಗಳಾಗಿ ಪೈಪೋಟಿ ನಡೆಸುತ್ತಿದ್ದರು. ಈ ಪೈಕಿ ಒಂದಾಗುವ ಎರಡು ಬಣಗಳು ಅಧಿಕಾರ ಹಿಡಿಯುತ್ತಿದ್ದವು. ಹಾಗಾಗಿ ಡಿಸಿಸಿ ಬ್ಯಾಂಕ್‌ ಚುನಾವಣೆ ವ್ಯಕ್ತಿ ಪ್ರತಿಷ್ಠೆಯ ಕಣವಾಗಿ ಮಾರ್ಪಟ್ಟಿತ್ತು. ಈ ಮೂವರು ಬಿಜೆಪಿಗರಾಗಿದ್ದರಿಂದ ಒಕ್ಕಟ್ಟಿಗೆ ಪೆಟ್ಟು ಬೀಳಬಹುದು ಎನ್ನುವುದು ಬಿಜೆಪಿಯ ಆತಂಕವಾಗಿತ್ತು.

ಈ ಹಿನ್ನೆಲೆಯಲ್ಲಿಬಿಜೆಪಿ ಮತ್ತು ಆರ್‌ಎಸ್‌ಎಸ್‌ ಮುಖಂಡರು ಈ ಹಿಂದಿನಿಂದಲೂ ಡಿಸಿಸಿ ಬ್ಯಾಂಕ್‌ ಚುನಾವಣೆ ಬಗ್ಗೆ ಮಾಹಿತಿ ಸಂಗ್ರಹಿಸುತ್ತಿದ್ದರು. ಬಣಗಳಾಗಿ ಚುನಾವಣೆ ಸ್ಪರ್ಧೆ ಮಾಡುವುದಕ್ಕಿಂತ ಬಿಜೆಪಿಗರೆಲ್ಲಒಂದಾಗಿ ಚುನಾವಣೆ ಎದುರಿಸಬೇಕು ಎನ್ನುವ ನಿಟ್ಟಿನಲ್ಲಿಆರ್‌ಎಸ್‌ಎಸ್‌ ಉತ್ತರ ಪ್ರಾಂತದ ಸಹ ಸಂಘ ಸಹಚಾಲಕ ಅರವಿಂದ ದೇಶಪಾಂಡೆ ಅವರು ಹಲವು ದಿನಗಳಿಂದ ಮುಖಂಡರೊಂದಿಗೆ ಸಭೆ ನಡೆಸಿದ್ದರು. ಕೆಲ ದಿನಗಳ ಹಿಂದೆ ಅಥಣಿಯಲ್ಲಿಬೈಠಕ್‌ ಕೂಡ ನಡೆದಿತ್ತು.

ಅದಾದ ಬಳಿಕ ಜಿಲ್ಲಾ ಮುಖಂಡರಲ್ಲಿಯೇ ಹೊಂದಾಣಿಕೆ ಮಾಡಿಕೊಳ್ಳುವಂತೆ ಸಂಧಾನದ ಹೊಣೆಯನ್ನು ರಾಜ್ಯಸಭಾ ಸದಸ್ಯ ಈರಣ್ಣ ಕಡಾಡಿ, ಸಂಸದ ಅಣ್ಣಾಸಾಹೇಬ ಜೊಲ್ಲೆ ಅವರಿಗೆ ವಹಿಸಲಾಗಿದೆ. ಆ ಹಿನ್ನೆಲೆಯಲ್ಲಿಯೇ ಅಥಣಿಯ ಶಿಕ್ಷಣ ಸಂಸ್ಥೆಯೊಂದರಲ್ಲಿಸಭೆ ಕರೆದು ಚರ್ಚಿಸಲಾಗಿದೆ. ಉಸ್ತುವಾರಿ ಸಚಿವ ರಮೇಶ್‌ ಜಾರಕಿಹೊಳಿ ಕೂಡ ಬೆಳಗ್ಗೆಯೇ ಮುಖಂಡರನ್ನು ಭೇಟಿಯಾಗಿ ಹೋಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಒಂದು ನಾಮಪತ್ರ
ಬೆಳಗಾವಿ ಡಿಸಿಸಿ ಬ್ಯಾಂಕ್‌ ಚುನಾವಣೆಗೆ ಮೊದಲ ದಿನ ಒಂದು ನಾಮಪತ್ರ ಸಲ್ಲಿಕೆಯಾಗಿದೆ. ರಾಮದುರ್ಗ ಪಿಕೆಪಿಎಸ್‌ನಿಂದ ಶ್ರೀಕಾಂತ್‌ ಢವಣ ಎನ್ನುವವರು ನಾಮಪತ್ರ ಸಲ್ಲಿಸಿದ್ದಾರೆ ಎಂದು ಚುನಾವಣಾಧಿಕಾರಿ ಅಫ್ರೀದಬಾನು ಬಳ್ಳಾರಿ ತಿಳಿಸಿದ್ದಾರೆ.