ಗೋವಾ ಸಕ್ಕರೆ ಕಾರ್ಖಾನೆಗೆ ರಾಜ್ಯದ ರೈತರ ಮುತ್ತಿಗೆ

ಪಣಜಿ: ಕಬ್ಬಿನ ಬಾಕಿ ಬಿಲ್‌ ನೀಡುವಂತೆ ಒತ್ತಾಯಿಸಿ ಕರ್ನಾಟಕದ ಕಬ್ಬು ಬೆಳೆಗಾರರು ಮಂಗಳವಾರ ಇಲ್ಲಿನ ಸಂಜೀವಿನಿ ಸಕ್ಕರೆ ಕಾರ್ಖಾನೆಗೆ ಮುತ್ತಿಗೆ ಹಾಕಿ ಪ್ರತಿಭಟಿಸಿದ್ದಾರೆ.

ಸಂಜೀವಿನಿ ಸಕ್ಕರೆ ಕಾರ್ಖಾನೆ ಈ ವರ್ಷ ಇನ್ನೂ ಹಂಗಾಮು ಆರಂಭಿಸಿಲ್ಲ. ಹೀಗಾಗಿ ಗೋವಾದಲ್ಲಿಬೆಳೆದ ಕಬ್ಬನ್ನು ಕರ್ನಾಟಕದ ಕಾರ್ಖಾನೆಗಳಿಗೆ ಸಾಗಿಸಲು ಗೋವಾ ಸರಕಾರ ಒಪ್ಪಿಗೆ ನೀಡಿದೆ. ಆದರೆ, ಹಿಂದಿನ ವರ್ಷ ಸಂಜೀವಿನಿ ಕಾರ್ಖಾನೆಗೆ ಕಬ್ಬು ಪೂರೈಸಿದ ಕರ್ನಾಟಕದ ರೈತರಿಗೆ ಬಾಕಿ ಬಿಲ್‌ ಪಾವತಿಸದೇ ಇದ್ದರೆ ಗೋವಾದಿಂದ ಕರ್ನಾಟಕಕ್ಕೆ ಆಗಮಿಸುವ ಕಬ್ಬಿನ ಲಾರಿಗಳನ್ನು ತಡೆದು ಪ್ರತಿಭಟಿಸಲಾಗುವುದು ಎಂದು ಪ್ರತಿಭಟನೆ ನಿರತ ರೈತರು ಎಚ್ಚರಿಸಿದರು.

ಕಳೆದ ವರ್ಷ ಸಂಜೀವಿನಿ ಸಕ್ಕರೆ ಕಾರ್ಖಾನೆಗೆ ಕರ್ನಾಟಕದ ಬೆಳಗಾವಿ ಜಿಲ್ಲೆಯ ರೈತರು ಸುಮಾರು 17,000 ಟನ್‌ ಕಬ್ಬು ಪೂರೈಸಿದ್ದಾರೆ. ಒಂದು ಟನ್‌ ಕಬ್ಬಿಗೆ 3,100 ರೂ. ದರ ನೀಡುವುದಾಗಿ ಕಾರ್ಖಾನೆಯವರು ಹೇಳಿದ್ದರು. ಅಂದರೆ, ಟನ್‌ಗೆ ಕೇವಲ 1,500 ರೂ. ಮಾತ್ರ ಪಾವತಿಸಲಾಗಿದೆ. ಬಾಕಿ ಹಣವನ್ನೂ ಇನ್ನೂ ಪಾವತಿಸಿಲ್ಲ.ಕಬ್ಬಿನ ಬಾಕಿ ಹಣವನ್ನು ಡಿಸೆಂಬರ್‌ 1ರ ಒಳಗೆ ಪಾವತಿಸಬೇಕು ಎಂದು ಒತ್ತಾಯಿಸಿದರು.