ಆ್ಯಪ್ನಗರ

ಏಕಾಏಕಿ ನರೇಗಾ ಕೆಲಸ ಸ್ಥಗಿತ :ಕೂಲಿಕಾರರಿಂದ ಸ್ಥಳದಲ್ಲೇ ಪ್ರತಿಭಟನೆ

ದೊಡವಾಡ : ಸಮೀಪದ ಗುಡಿಕಟ್ಟಿ ಗ್ರಾಮದ ಹಳ್ಳದಲ್ಲಿ ಗೋವನಕೊಪ್ಪ ...

Vijaya Karnataka 29 Jun 2019, 5:00 am
ದೊಡವಾಡ : ಸಮೀಪದ ಗುಡಿಕಟ್ಟಿ ಗ್ರಾಮದ ಹಳ್ಳದಲ್ಲಿ ಗೋವನಕೊಪ್ಪ ಗ್ರಾಮ ಪಂಚಾಯಿತಿಯಿಂದ ನರೇಗಾ ಯೋಜನೆಯಡಿ ಆರಂಭಿಸಲಾಗಿರುವ ಬರಗಾಲ ಕಾಮಗಾರಿ ಕೆಲಸದಲ್ಲಿ ನಿರತರಾಗಿದ್ದ ರೈತರಿಗೆ ಗ್ರಾಪಂ ಸಿಬ್ಬಂದಿ ಯಾವುದೇ ಮುನ್ಸೂಚನೆ ನೀಡದೆ ಕೆಲಸ ಸ್ಥಗಿತಗೊಳಿಸುವಂತೆ ತಿಳಿಸಿದ್ದರಿಂದ ಕಂಗಾಲಾದ ರೈತರು, ಕೂಲಿಕಾರ್ಮಿಕರು ಧಿಡೀರ್‌ ಪ್ರತಿಭಟನೆ ನಡೆಸಿ ಪಂಚಾಯಿತಿ ಕ್ರಮಕ್ಕೆ ಆಕ್ರೋಶ ವ್ಯಕ್ತ ಪಡಿಸಿದರು.
Vijaya Karnataka Web BEL-28 DWDP 2


ಕೆಲಸ ಬಿಟ್ಟು ತೆರಳದೆ ಸ್ಥಳದಲ್ಲೇ ತಮ್ಮ ಕೂಲಿ ಸಾಮಗ್ರಿಗಳೊಂದಿಗೆ ಗ್ರಾಪಂ ಧೋರಣೆ ವಿರುದ್ಧ ಧಿಕ್ಕಾರ ಕೂಗಿದರು.

ಪ್ರತಿಭಟನೆ ಸುದ್ದಿ ತಿಳಿದು ಸ್ಥಳಕ್ಕೆ ಭೇಟಿ ನೀಡಿದ ಗ್ರಾಪಂ ಕಾರ್ಯದರ್ಶಿ ಬಿ.ಎಸ್‌. ಹುಂಬಿ ಅವರು ಕೂಲಿಕಾರರನ್ನುದ್ದೇಶಿಸಿ ಮಾತನಾಡಿ, ''ಗುಡಿಕಟ್ಟಿ ಗ್ರಾಮದಲ್ಲಿ ನರೇಗಾ ಕೆಲಸಕ್ಕೆ ಮೊದಲ ಕ್ರಿಯಾಯೋಜನೆಯಲ್ಲಿ ಬಿಡುಗಡೆಯಾಗಿದ್ದ 3 ಲಕ್ಷ ರೂ. ಅನುದಾನದಲ್ಲಿ ಈಗಾಗಲೇ 1.60 ಲಕ್ಷ ರೂ. ಖರ್ಚಾಗಿದೆ. ಉಳಿದ ಹಣದ ಬಿಡುಗಡೆಗೆ ತಾಂತ್ರಿಕ ತೊಂದರೆ ಎದುರಾಗಿದ್ದು, ಶೀಘ್ರ ಸರಿಪಡಿಸಲಾಗುವುದು. ಹೆಚ್ಚುವರಿಯಾಗಿ 5 ಲಕ್ಷ ರೂ.ಗಳ ಕೆಲಸವನ್ನು ತುರ್ತಾಗಿ ಆರಂಭಿಸಿ ಕಾರ್ಮಿಕರಿಗೆ ಕೆಲಸ ನೀಡಲಾಗುವುದು. ರೈತರು ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ'' ಎಂದು ಅಭಯ ನೀಡಿ ಪ್ರತಿಭಟನಾ ನಿರತರನ್ನು ಸಮಾಧಾನ ಪಡಿಸಲು ಯತ್ನಿಸಿದರು.

ಈ ವೇಳೆ ರೈತರಾದ ಶ್ರೀಶೈಲ ಮಠಪತಿ, ಬಸಯ್ಯ ನೂರಂದಯ್ಯನವರ, ಮಾರುತಿ ಪಟಾತ, ನಿಂಗಯ್ಯ ಚನ್ನಮ್ಮನವರ ಮತ್ತಿತರರು ಸ್ಥಳಕ್ಕಾಗಮಿಸಿದ್ದ ಕಾರ್ಯದರ್ಶಿಯನ್ನು ತರಾಟೆಗೆ ತೆಗೆದುಕೊಂಡರು. ''ಸರಿಯಾಗಿ ಮಳೆ ಬಾರದೆ ಕೈಗಳಿಗೆ ದುಡಿಯಲು ಕೆಲಸವಿಲ್ಲದೆ ದಿಕ್ಕು ತೋಚದಂತಾಗಿದೆ. ರೈತರಿಗೆ ಸರಕಾರ ನರೇಗಾದಡಿ ಕೆಲಸ ನೀಡುತ್ತಿದ್ದರೂ ಗ್ರಾಪಂ ನವರು ಕೆಲಸ ನಿಲ್ಲಿಸುತ್ತಿದ್ದೀರಿ. ತಾಂತ್ರಿಕ ತೊಂದರೆ ಇದ್ದರೆ ಮೊದಲೆ ಡಂಗುರ ಸಾರಿ ಕೆಲಸಕ್ಕೆ ಹೋಗಬೇಡಿ ಎಂದು ತಿಳಿಸಬೇಕಿತ್ತು. ಈಗ ಬೇರೆ ಕೆಲಸವೂ ಇಲ್ಲದೆ ಉಪ ಜೀವನ ಹೇಗೆ ಸಾಗಿಸುವುದು'' ಎಂದು ತಮ್ಮ ಆಕ್ರೋಶ ಹೊರಹಾಕಿದರು. ''ಈ ಅನ್ಯಾಯ ಸರಿಪಡಿಸದಿದ್ದರೆ ಪಂಚಾಯಿತಿ ಮುಂದೆ ಪ್ರತಿಭಟನೆ ನಡೆಸುತ್ತೇವೆ'' ಎಂದು ಎಚ್ಚರಿಸಿ ತಾತ್ಕಾಲಿಕವಾಗಿ ಪ್ರತಿಭಟನೆ ಹಿಂಪಡೆದರು.

ಗ್ರಾಮಸ್ಥರಿಗಾಗುತ್ತಿರುವ ಅನ್ಯಾಯದ ಬಗ್ಗೆ ಮಾಧ್ಯಮದವರು ಮತ್ತು ಮೇಲಧಿಕಾರಿಗಳಿಗೆ ತಿಳಿಸಿದರೆ ಕೆಲವರು ಮನೆಗೆ ಬಂದು ಧಮಕಿ ಹಾಕುತ್ತಿದ್ದಾರೆ. ಇನ್ನು ಮುಂದೆ ಊರಲ್ಲಿ ಇರು ಎಂದು ಹೆದರಿಸುತ್ತಿದ್ದಾರೆ.
- ಕಲ್ಲಪ್ಪ ಮುತ್ತೆನ್ನವರ, ಗುಡಿಕಟ್ಟಿ ಗ್ರಾಮದ ರೈತ

ಎನ್‌ಎಂಆರ್‌ ಹಾಜರಿ ದಾಖಲೆ ಇಲ್ಲದೆ ಕಾರ್ಮಿಕರು ಕೆಲಸ ಮಾಡಿದರೆ ಅವರು ಗೈರೆಂದು ನಮೂದಾಗಿ ಕೆಲಸದ ವೇತನ ಪಾವತಿಯಾಗುವುದಿಲ್ಲ. ತಾಂತ್ರಿಕ ತೊಂದರೆಯಿಂದ ಸ್ವಲ್ಪ ಸಮಸ್ಯೆಯಾಗಿದೆ. ಕೆಲಸ ಮಾಡಿದರೂ ಗೈರು ಎಂದು ನಮೂದಾಗಬಾರದು ಎಂಬ ಉದ್ದೇಶದಿಂದ ಕೆಲಸ ಸ್ಥಗಿತಗೊಳಿಸಿದ್ದೇವೆ ಅಷ್ಟೇ ಬೇರೆನಿಲ್ಲ. ಶನಿವಾರದ ಹೊತ್ತಿಗೆ ತೊಂದರೆ ಸರಿಪಡಿಸಿ ರೈತರಿಗೆ ನರೇಗಾ ಕೆಲಸ ಆರಂಭಿಸಲಾಗುವುದು.
- ಎಂ.ಆರ್‌. ದೇಶಪಾಂಡೆ, ಗೋವನಕೊಪ್ಪ ಪಿಡಿಒ

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ