‘ಪಿಎಲ್‌ಡಿ ಬ್ಯಾಂಕ್‌ ರಾದ್ಧಾಂತಕ್ಕೆ ಮಾಜಿ ಅಧ್ಯಕ್ಷರೊಬ್ಬರ ಹಠ ಕಾರಣ’

ಬೆಳಗಾವಿ: ಪಿಎಲ್‌ಡಿ ಬ್ಯಾಂಕ್‌ ಚುನಾವಣೆ ವಿಚಾರವಾಗಿ ಬ್ಯಾಂಕ್‌ನ ಮಾಜಿ ಅಧ್ಯಕ್ಷರೊಬ್ಬರು ಬಾಪುಗೌಡರೇ ಅಧ್ಯಕ್ಷರಾಗಬೇಕು ಎಂದು ಹಠ ಹಿಡಿದಿರುವುದೇ ಇಷ್ಟೆಲ್ಲ ರಾದ್ಧಾಂತಕ್ಕೆ ಕಾರಣ ಎಂದು ಬ್ಯಾಂಕ್‌ ನಿರ್ದೇಶಕ ಬಾಪುಗೌಡ ಪಾಟೀಲ ಹೇಳಿದ್ದಾರೆ. ''ಅಧ್ಯಕ್ಷ-ಉಪಾಧ್ಯಕ್ಷ ಚುನಾವಣೆಯಲ್ಲಿ ನಾನು ಅಧ್ಯಕ್ಷನಾಗಬೇಕು ಎಂದು ಯಾವ ಬಣಕ್ಕೂ ಅರ್ಜಿ ಹಾಕಿರಲಿಲ್ಲ. ಆ ಆಸೆಯೂ ನನಗಿರಲಿಲ್ಲ'', ಎಂದಿರುವ ಅವರು, ''ಗೋಕಾಕ ಮತ್ತು ಯಮಕನಮರಡಿ ವಿಧಾನಸಭಾ ಕ್ಷೇತ್ರಗಳ ಚುನಾವಣೆ ಸಂದರ್ಭದಲ್ಲಿ ಲಿಂಗಾಯತ ವೋಟುಗಳನ್ನು ಜಾರಕಿಹೊಳಿ ಸಹೋದರರ ವಿರುದ್ಧವಾಗಿ ಹಾಕಿಸಿದ್ದೇನೆ ಎನ್ನುವ ಆರೋಪ ಸತ್ಯಕ್ಕೆ ದೂರವಾದುದು. ಶಾಸಕಿ ಲಕ್ಷ್ಮಿ ಹೆಬ್ಬಾಕರ್‌ಗೆ ನೀಡುವಷ್ಟೆ ಗೌರವವನ್ನು ಜಾರಕಿಹೊಳಿ ಸಹೋದರರಿಗೂ ನೀಡುತ್ತೇನೆ. ಈ ಬಾರಿ ಚುನಾವಣೆಯಲ್ಲಿ ಒಂದು ಬಾರಿ ಅಧ್ಯಕ್ಷರಾದವರು ಮತ್ತೊಂದು ಬಾರಿಗೆ ಸ್ಪರ್ಧಿಸುವುದು ಬೇಡ ಎಂಬುದಾಗಿ ನಾನೇ ಸಲಹೆ ನೀಡಿದ್ದೆ'', ಎಂದು ಅವರು ತಿಳಿಸಿದ್ದಾರೆ.