ಟಿಕೆಟ್‌ ತಪಾಸಣಾಧಿಕಾರಿಗೆ ವಿದ್ಯಾರ್ಥಿಗಳ ಘೇರಾವ್‌

ಗೋಕಾಕ : ಶಾಲಾ ವಿದ್ಯಾರ್ಥಿಗಳು ಬಸ್‌ ಪಾಸ್‌ ಹೊಂದಿದ್ದರೂ ಕೆಎಸ್‌ಆರ್‌ಟಿಸಿ ತಪಾಸಣಾಧಿಕಾರಿ ದಂಡ ವಸೂಲಿ ಮಾಡುತ್ತಿದ್ದುದನ್ನು ಖಂಡಿಸಿ ಸಮೀಪದ ಸಂಗನಕೇರಿ ಕ್ರಾಸ್‌ನಲ್ಲಿ ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ಅಧಿಕಾರಿ ಕಾರನ್ನು ತಡೆಗಟ್ಟಿ ಘೇರಾವ್‌ ಹಾಕಿದರು.

ಗುರುವಾರ ಇಂಡಿಕಾ ವಾಹನದಲ್ಲಿ ಬಂದ ಅಧಿಕಾರಿ ಏಕಾಏಕಿ ವಿದ್ಯಾರ್ಥಿಗಳ ಪಾಸ್‌ಗಳನ್ನು ಪರಿಶೀಲಿಸದೇ ದಂಡದ ಪಾವತಿ ನೀಡಿ ಒತ್ತಾಯಪೂರ್ವಕ ಹಣ ವಸೂಲಿ ಮಾಡುತ್ತಿದ್ದುದನ್ನು ಪ್ರಶ್ನಿಸಿ ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸಿದರು.

ಪಾಸ್‌ ನೋಡಿದ ಅಧಿಕಾರಿಗಳು ಪಾವತಿ ವಾಪಸ್‌ ಪಡೆದು ವಿದ್ಯಾರ್ಥಿಗಳಿಗೆ ಹಣ ವಾಪಸ್‌ ನೀಡಿದ್ದಾರೆ. ಅಧಿಕಾರಿ ವಿದ್ಯಾರ್ಥಿಗಳಿಗೆ ದಿನನಿತ್ಯ ಕಿರುಕುಳ ನೀಡುತ್ತಿರುವುದಾಗಿ ಸಾರ್ವಜನಿಕರು ಆರೋಪಿಸಿದ್ದಾರೆ. ಬಸ್‌ ಕಂಡಕ್ಟರ್‌ ಕೂಡ ವಿದ್ಯಾರ್ಥಿಗಳ ಪಾಸ್‌ಗಳು ಸರಿಯಾಗಿರುವುದನ್ನು ದೃಢೀಕರಿಸಿ ಅಧಿಕಾರಿ ಜತೆ ವಾದ ಮಾಡಿದಾಗ ಕೋಪಗೊಂಡ ತಪಾಸಣಾಧಿಕಾರಿ ಕಂಡಕ್ಟರ್‌ಗೂ ಮೆಮೋ ನೀಡಿದರೆನ್ನಲಾಗಿದೆ.

ಈ ಬಗ್ಗೆ ಕಂಡಕ್ಟರ್‌ ಬಿ.ಎಸ್‌. ಬಾಗಡಿ, ಚಿಕ್ಕೋಡಿ ವಿಭಾಗದ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ ಅಧಿಕಾರಿಗಳಾದ ಎಸ್‌.ಎಚ್‌. ನಾಯಿಕ ಹಾಗೂ ಸಿ.ಬಿ. ಪಾರಶೆಟ್ಟಿ ವಿರುದ್ಧ ಘಟಪ್ರಭಾ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಲು ಹೋಗಿದ್ದರು. ಆದರೆ ಪೊಲೀಸರು ದೂರು ದಾಖಲಿಸಿಕೊಳ್ಳದೇ ಇಲಾಖೆ ಮುಖ್ಯಸ್ಥರಲ್ಲಿಯೇ ದೂರು ದಾಖಲಿಸಲು ಹೇಳಿ ವಾಪಸ್‌ ಕಳಿಸಿದ್ದಾರೆ.