ಬೇಸಗೆ: ಮಡಿಕೆಗಳ ಬೆಲೆ ಶೇ.40ರಷ್ಟು ಏರಿಕೆ

ಇಂಗಳಿ : ಹೆಚ್ಚುತ್ತಿರುವ ಬಿಸಿಲಿನ ಬೇಗೆಯನ್ನು ತಣಿಸುವ ಬಡವರ, ಮಧ್ಯಮ ವರ್ಗದವರ ಫ್ರಿಡ್ಜ್‌ ಎಂದೇ ಖ್ಯಾತಿ ಪಡೆದಿರುವ ಮಣ್ಣಿನ ಮಡಿಕೆಗಳ ಬೆಲೆ ಶೇ.40ರಷ್ಟು ಏರಿಕೆಯಾಗಿದೆ.

ಗಡಿಭಾಗದಲ್ಲಿ 35ರಿಂದ 37 ಡಿಗ್ರಿ ಸೆಲ್ಸಿಯಸ್‌ ತಾಪಮಾನದ ದಾಖಲೆ ಸಾಮಾನ್ಯವಾಗಿದೆ. ಇದರಿಂದ ಪದೇ ಪದೇ ಆಗುವ ಬಾಯಾರಿಕೆಗೆ ನೈಸರ್ಗಿಕವಾದ ತಂಪಾದ ನೀರು ನೀಡುವ ಮಡಿಕೆಯೊಂದರ ಬೆಲೆ ಸದ್ಯ ಸರಾಸರಿ 150 ರಿಂದ 300 ರೂಪಾಯಿ. ಹಿಂದಿನ ಕಾಲದಲ್ಲಿದ್ದ ಮಡಿಕೆ, ಗಡಿಗೆಗಳು ಸದ್ಯ ಹೊಸ ರೂಪ, ವಿನ್ಯಾಸಗಳೊಂದಿಗೆ ಮಾರುಕಟ್ಟೆಗೆ ಬರುತ್ತಿವೆ. ಸ್ವಚ್ಛತೆ ನಿರ್ವಹಣೆಗೆ ಮಡಿಕೆಗಳಿಗೆ ನಲ್ಲಿಗಳನ್ನು ಅಳವಡಿಸಲಾಗಿರುತ್ತದೆ. ಕೆಲವರು ಗ್ರಾಮೀಣ ಭಾಗದಲ್ಲಿ ಕಡಿಮೆ ಬೆಲೆಯಲ್ಲಿ ಸಿಗುವ ಮಡಿಕೆಗಳನ್ನು ಖರೀದಿಸುತ್ತಿದ್ದಾರೆ. ಇನ್ನೂ ಕೆಲವರು ಪಟ್ಟಣ ಪ್ರದೇಶಗಳಲ್ಲಿ ಸಿಗುವ ತರಹೇವಾರಿ ವಿನ್ಯಾಸಗಳ ಮಡಿಕೆಗಳನ್ನು ಮನೆಗೆ ಒಯ್ಯುತ್ತಿರುವುದು ಸಾಮಾನ್ಯವಾಗಿದೆ.