ಸಿಂಡಿಕೇಟ್‌ ಸದಸ್ಯತ್ವ ರದ್ದತಿಗೆ ಆಗ್ರಹ

ಬೆಳಗಾವಿ: ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯದ ಸಿಂಡಿಕೇಟ್‌ ಸದಸ್ಯ ರಾಜು ಚಿಕ್ಕನಗೌಡರ ಅವರ ಸದಸ್ಯತ್ವ ರದ್ದುಪಡಿಸುವಂತೆ ಆಗ್ರಹಿಸಿ ಮಾನವ ಬಂಧುತ್ವ ವೇದಿಕೆ ಕಾರ್ಯಕರ್ತರು ನಗರದ ಚನ್ನಮ್ಮ ವೃತ್ತದಿಂದ ಜಿಲ್ಲಾಧಿಕಾರಿ ಕಚೇರಿವರೆಗೆ ಶುಕ್ರವಾರ ಪ್ರತಿಭಟನೆ ನಡೆಸಿ ಮನವಿ ಸಲ್ಲಿಸಿದರು.

ಸಿಂಡಿಕೇಟ್‌ ಸದಸ್ಯ ರಾಜು ಚಿಕ್ಕನಗೌಡರ ಅವರು ರಾಣಿ ಚನ್ನಮ್ಮ ವಿವಿಯಲ್ಲಿ ಕೋಮುವಾದ, ಜಾತೀಯತೆ ಮಾಡುತ್ತಿದ್ದಾರೆ. ವಿವಿಯ ಎಲ್ಲ ವಿಷಯಗಳಲ್ಲೂ ಅನವಶ್ಯಕವಾಗಿ ಭಾಗಿಯಾಗುತ್ತಿದ್ದಾರೆ. ಅವ್ಯವಹಾರಗಳಲ್ಲೂ ಭಾಗಿಯಾಗಿದ್ದಾರೆ. ಅಲ್ಲದೆ, ಚನ್ನಮ್ಮ ವಿವಿಯನ್ನು ಕೇಸರೀಕರಣ ಮಾಡಲು ಹೊರಟಿದ್ದಾರೆ. ಯುಜಿಸಿ ನಿಯಮದ ಪ್ರಕಾರ ಸಿಂಡಿಕೇಟ್‌ ಸದಸ್ಯರಾಗಿ ಒಂದು ಬಾರಿ ಮಾತ್ರ ಕಾರ್ಯನಿರ್ವಹಿಸಬೇಕು. ಆದರೆ, ರಾಜು ಚಿಕ್ಕನಗೌಡರ ಅವರನ್ನು ಎರಡನೇ ಅವಧಿಗೆ ಕಾನೂನು ಬಾಹಿರವಾಗಿ ಆಯ್ಕೆ ಮಾಡಲಾಗಿದೆ ಎಂದು ಆರೋಪಿಸಿದರು.

ಜಿಪಂ ಉಪಾಧ್ಯಕ್ಷ ಅರುಣ ಕಟಾಂಬಳೆ, ನಗರ ಸೇವಕಿ ಜಯಶ್ರೀ ಮಾಳಗಿ, ರವೀಂದ್ರ ನಾಯ್ಕರ್‌, ಮಲ್ಲಗೌಡ ಪಾಟೀಲ, ಕಿರಣ ರಜಪೂತ, ಜಯರಾಜ ಹಲಗೇಕರ್‌, ಯುವರಾಜ ತಳವಾರ, ಅನಿಲ ಪಾವಸಿ, ರಾಮಕೃಷ್ಣ ಪಾನಬುಡೆ, ಬಾಳೇಶ ದಾಸನಟ್ಟಿ ಮತ್ತಿತರರು ಉಪಸ್ಥಿತರಿದ್ದರು.