ಪಾಟಾ ತುಂಡಾಗಿ ಕಬ್ಬಿನ ಗದ್ದೆಗೆ ನುಗ್ಗಿದ ಬಸ್‌

ಮೋಳೆ: ಗ್ರಾಮದ ಹಳ್ಳದ ಸೇತುವೆ ಬಳಿ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ ಬಸ್‌ ಗುರುವಾರ ಅಪಘಾತಕ್ಕೀಡಾಗಿದ್ದು ಚಾಲಕನ ಸಮಯ ಪ್ರಜ್ಞೆಯಿಂದ ಭಾರೀ ಅವಘಡ ತಪ್ಪಿದ್ದು ಅದರಲ್ಲಿದ್ದ 13 ಜನ ಪ್ರಯಾಣಿಕರು ಸಣ್ಣಪುಟ್ಟ ಗಾಯಗಳಿಂದ ಪಾರಾಗಿದ್ದಾರೆ.

ಅಥಣಿ ಘಟಕಕ್ಕೆ ಸೇರಿದ ಅಥಣಿ-ಉಗಾರ ಬಸ್‌ ಗ್ರಾಮದ ಸಮೀಪ ಪಾಟಾ ತುಂಡಾಗಿದ್ದರಿಂದ ಚಾಲಕನ ನಿಯಂತ್ರಣ ತಪ್ಪಿ ರಸ್ತೆ ಪಕ್ಕದಲ್ಲಿಯ ಕಬ್ಬಿನ ಹೊಲಕ್ಕೆ ನುಗ್ಗಿದ ಪರಿಣಾಮ ಅದರಲ್ಲಿದ ಕುಡಚಿ ಗ್ರಾಮದ ಸುಶೀಲಾ ಅಂಬಿ, ಕೃಷ್ಣಾ ಕಿತ್ತೂರ ಗ್ರಾಮದ ಲತಾ ಕಶೆಟ್ಟಿ, ಅಥಣಿಯ ಮಹಾದೇವಿ ಬಾಗಡಿ, ಭೀಮವ್ವ ಬಾಗಡಿ ಎಂಬ ಪ್ರಯಾಣಿಕರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಅಥಣಿ ತಾಲೂಕು ಆಸ್ಪತ್ರೆಗೆ ದಾಖಲಿಸಲಾಗಿದ್ದು ಇನ್ನುಳಿದ ಪ್ರಯಾಣಿಕರು ಮೋಳೆ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಚಿಕಿತ್ಸೆ ಪಡೆದು ಮನೆಗೆ ತೆರಳಿದ್ದಾರೆ.

ಇಲ್ಲಿಯ ಕವಲಗುಡ್ಡ ದಿಂದ ಮೋಳೆ ರಸ್ತೆಯು ಸಂಪೂರ್ಣ ಹಾಳಾಗಿದ್ದು ಅವಘಡಕ್ಕೆ ಕಾರಣ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದರು. ಘಟನೆ ನಂತರ ಅಥಣಿ ಘಟಕದ ಹಿರಿಯ ಸಾರಿಗೆ ಅಧಿಕಾರಿಗಳು ಭೇಟಿ ನೀಡಿ ಚಾಲಕ ಜೆ.ಎಸ್‌. ಚಾಕರಿ ಹಾಗೂ ನಿರ್ವಾಹಕ ಸುನೀಲ ಗಾಡಿವಡ್ಡರರಿಂದ ಮಾಹಿತಿ ಪಡೆದರು.