‘ದಿ ಯಂಗ್‌ ಸ್ಪಿರಿಟ್‌’ ಕೃತಿ ಬಿಡುಗಡೆ

ಉಗರಗೋಳ : ಶಾಲಾ ಹಂತದಲ್ಲಿ ಗಳಿಸುವ ವಿದ್ಯೆಗೆ ಮೇಲು, ಕೀಳು ಎನ್ನುವ ಭೇದವಿಲ್ಲ. ಬಡವನಾಗಲೀ, ಶ್ರೀಮಂತನಾಗಲೀ ಸತತ ಅಧ್ಯಯನದಿಂದ ವಿದ್ಯೆಯನ್ನು ತನ್ನದಾಗಿಸಿಕೊಳ್ಳಲು ಸಾಧ್ಯವಿದೆ. ಅದು ಮುಂದೆ ಶ್ರೀಮಂತವಾಗಿಯೇ ಇರುತ್ತದೆ ಎಂದು ಯಲ್ಲಮ್ಮ ದೇವಸ್ಥಾನ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ರಾಮನಗೌಡ ತಿಪರಾಶಿ ಹೇಳಿದರು.

ಅವರು, ಗ್ರಾಮದ ರೇಣುಕಾ ದೇವಿ ಹೈಸ್ಕೂಲ್‌ ಸಭಾಭವನದಲ್ಲಿ ಗುರುವಾರ ಹಮ್ಮಿಕೊಂಡಿದ್ದ ರಾಷ್ಟ್ರಮಟ್ಟದ ಕ್ರೀಡಾಪಟು ಹಾಗೂ ಯುವ ಬರಹಗಾರ ನದೀಮ ಬಾಬುಸಾಬ ಮುಲ್ಲಾ ಅವರ 'ದಿ ಯಂಗ್‌ ಸ್ಪಿರಿಟ್‌' ಕೃತಿ ಬಿಡುಗಡೆ ಸಮಾರಂಭದ ಅಧ್ಯಕ್ಷ ತೆ ವಹಿಸಿ ಮಾತನಾಡಿದರು.

ಐಎಎಸ್‌ ಹಾಗೂ ಕೆಎಎಸ್‌ ಓದುವ ವಿದ್ಯಾರ್ಥಿಗಳಿಗೆ ದೇವಸ್ಥಾನ ಟ್ರಸ್ಟ್‌ ವತಿಯಿಂದ ಸಹಾಯ ಹಾಗೂ ತಮ್ಮಿಂದ ಪ್ರತಿ ಸಾರಿ 10 ಸಾವಿರ ರೂ. ಧನಸಹಾಯ ನೀಡುವ ಭರವಸೆ ನೀಡಿದರು.

ಉಗರಗೋಳದ ನೂರಾನಿ ಚಾಮಿಯಾ ಮಜೀದ್‌ನ ಮೌಲ್ವಿ ಮೌಲಾನಾ ಶರೀಫ್‌ ಬುಡನಖಾನ ಮಾತನಾಡಿದರು. ಕಾರ್ಯಕ್ರಮದಲ್ಲಿ ಯುವ ಬರಹಗಾರ ನದೀಮ ಬಾಬುಸಾಬ ಮುಲ್ಲಾ ಅವರ 'ದಿ ಯಂಗ್‌ ಸ್ಪಿರಿಟ್‌' ಇಂಗ್ಲಿಷ್‌ ಕೃತಿಯನ್ನು ಗಣ್ಯರು ಬಿಡುಗಡೆ ಮಾಡಿದರು.

ನಿವೃತ್ತ ಮುಖ್ಯಶಿಕ್ಷಕ ವೈ.ಆರ್‌. ಚನ್ನಪ್ಪಗೌಡ್ರ, ನಿವೃತ್ತ ಉಪಪ್ರಾಚಾರ್ಯ ಪ್ರಭಾವತಿ ತುರಮರಿ, ಗ್ರಾಪಂ ಉಪಾಧ್ಯಕ್ಷೆ ಬಸಮ್ಮ ಗುಡೆನ್ನವರ ಮುಖ್ಯಶಿಕ್ಷಕಿ ಆರ್‌.ಪಿ. ಪವಾರ, ಆನಂದ ಬೋವಿ, ಪಿಡಿಒ ಮಹೇಶ ತೇಗೂರ, ಪಿಡಿಒ ಪ್ರಶಾಂತ ತೋಟಗಿ ಇತರರು ಉಪಸ್ಥಿತರಿದ್ದರು.