ಬೆಳಗಾವಿ ಮಹಾನಗರದ ದಾಹ ನೀಗಿಸಲು ತಿಲಾರಿ ಡ್ಯಾಂ ನೀರು

ಬೆಳಗಾವಿ : ನಗರದ ಕುಡಿಯುವ ನೀರಿನ ಬೇಡಿಕೆ ಗಮನದಲ್ಲಿಟ್ಟುಕೊಂಡು ತಿಲಾರಿ ಡ್ಯಾಂನಿಂದ ನೀರು ತರಬಹುದಾದ ಸಾಧ್ಯತೆ ಕುರಿತು ಪರಿಶೀಲನೆ ನಡೆಸಲು ಅಧಿಕಾರಿಗಳಿಗೆ ಉತ್ತರ ಕ್ಷೇತ್ರದ ಶಾಸಕ ಅನಿಲ ಬೆನಕೆ ಸೂಚಿಸಿದ್ದಾರೆ.

ಗುರುವಾರ ಪಾಲಿಕೆಯ ತಮ್ಮ ಕಚೇರಿಯಲ್ಲಿ ಜಲ ಮಂಡಳಿ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ ಶಾಸಕರು ಈ ಕುರಿತು ಚರ್ಚಿಸಿದರು.

''ನಗರಕ್ಕೆ ಕುಡಿಯುವ ನೀರು ಪೂರೈಸುವ ಕುರಿತು ಮುಂದಿನ 20 ವರ್ಷಗಳನ್ನು ಗಮನದಲ್ಲಿಟ್ಟುಕೊಂಡು ಕೆಲಸ ಮಾಡಬೇಕಿದೆ. ಮಹಾರಾಷ್ಟ್ರದ ತಿಲಾರಿ ಡ್ಯಾಂ ಬೆಳಗಾವಿ ಸಮೀಪದಲ್ಲಿದೆ. ಆ ಡ್ಯಾಂನಿಂದ ಹರಿದು ಹೋಗುವ ಹೆಚ್ಚುವರಿ ನೀರನ್ನು ಬಳಸಿಕೊಳ್ಳುವ ನಿಟ್ಟಿನಲ್ಲಿ ಮುಂದಿನವಾರ ಮಹಾರಾಷ್ಟ್ರದ ನೀರಾವರಿ ಇಲಾಖೆಯ ಕಾರ್ಯಕಾರಿ ಅಭಿಯಂತರನ್ನು ಡ್ಯಾಂ ಪ್ರದೇಶಕ್ಕೆ ಆಹ್ವಾನಿಸಿ ಚರ್ಚಿಸಲಾಗುವುದು'', ಎಂದು ಅವರು ಹೇಳಿದರು.

''ತಿಲಾರಿ ಡ್ಯಾಂಗೆ ಕರ್ನಾಟಕದ ಮಾರ್ಕಂಡೇಯ ನದಿ 2 ಕಿಮೀ ದೂರದಲ್ಲಿದೆ. ಅಲ್ಲಿಂದ ನದಿಗೆ ನೀರು ಹರಿಸಿದರೆ ವರ್ಷವಿಡೀ ನೀರು ಸಿಗುತ್ತದೆ. ತಿಲಾರಿ ಡ್ಯಾಂ ಪ್ರದೇಶದ ಸರ್ವೆ ಮಾಡಿದರೆ ಅನೇಕ ಸಂಭಾವ್ಯತೆಗಳು ಸಿಗುತ್ತವೆ. ಅಧಿಕಾರಿಗಳು ಈ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳಬೇಕು. ಕರ್ನಾಟಕ, ಮಹಾರಾಷ್ಟ್ರ ಮತ್ತು ಕೇಂದ್ರದಲ್ಲಿ ಬಿಜೆಪಿ ಸರಕಾರ ಇರುವುದರಿಂದ ಇದು ಸಾಧ್ಯವಿದೆ'', ಎಂದು ತಿಳಿಸಿದರು.

''ಹಿಡಕಲ್‌ ಜಲಾಶಯದಿಂದ ಹೆಚ್ಚುವರಿಯಾಗಿ ನೀರು ಪಡೆಯಲು ಉದ್ದೇಶಿಸಿದ 20 ಕೋಟಿ ರೂ. ವೆಚ್ಚದ ಮಶಿನ್‌ ಅಳವಡಿಸುವ ಕೆಲಸವೂ ತ್ವರಿತವಾಗಿ ನಡೆಯಬೇಕು. ಬರುವ ಡಿಸೆಂಬರ್‌ ಅಥವಾ ಜನವರಿ ತಿಂಗಳಿನಲ್ಲಿ ಹೆಚ್ಚುವರಿ ನೀರು ಸಿಗುವಂತಾಗಬೇಕು'', ಎಂದು ಶಾಸಕರು ತಾಕೀತು ಮಾಡಿದರು.

ಬೆಳಗಾವಿ ನಗರಕ್ಕೆ ಕೇವಲ 15 ಕಿಮೀ ದೂರದಲ್ಲಿರುವ ಶಿರೂರ ಡ್ಯಾಂನಲ್ಲೂ ನೀರಿದೆ. ಅಲ್ಲಿಂದ ನೀರು ಪಡೆದುಕೊಳ್ಳುವ ವಿಚಾರವಾಗಿ ಆ ಕ್ಷೇತ್ರದ ಶಾಸಕ ಉಮೇಶ್‌ ಕತ್ತಿ ಅವರೊಂದಿಗೆ ಮಾತನಾಡಿದ್ದೇನೆ.
-ಅನಿಲ ಬೆನಕೆ, ಶಾಸಕ