ಖಾನಾಪುರ ತಾಲೂಕಿನಲ್ಲಿ ಸತತ ಮಳೆಯಿಂದಾಗಿ ಮೂರು ಸೇತುವೆಗಳು ಜಖಂ

ಖಾನಾಪುರ: ಪಟ್ಟಣ ಸೇರಿದಂತೆ ತಾಲೂಕಿನಾದ್ಯಂತ ಶುಕ್ರವಾರ ಮಳೆ ಬಹುತೇಕ ತಗ್ಗಿದೆ. ಆದರೆ, ಮಲಪ್ರಭಾ, ಮಹದಾಯಿ ಮತ್ತು ಪಾಂಡರಿ ನದಿಗಳಲ್ಲಿ ಮಾತ್ರ ನೀರಿನ ಹರಿವು ಎಂದಿನಂತೆ ಮುಂದುವರಿದಿದ್ದು, ತಾಲೂಕಿನ ಮೂರು ಸೇತುವೆಗಳು ಜಖಂಗೊಂಡಿವೆ.

ತಾಲೂಕಿನ ತಿವೋಲಿ ಗ್ರಾಮದ ಬಳಿಯ ಸೇತುವೆ ಸತತವಾಗಿ ನಾಲ್ಕನೇ ವರ್ಷವೂ ಅಲಾತ್ರಿ ಹಳ್ಳದ ನೀರಿನ ರಭಸಕ್ಕೆ ಕೊಚ್ಚಿ ಹೋಗಿದೆ. ಮಲಪ್ರಭಾ ನದಿಯ ಚಾಪಗಾಂವ-ಯಡೋಗಾ ಮಾರ್ಗಮಧ್ಯದ ಮತ್ತು ಪಾರಿಶ್ವಾಡ-ಇಟಗಿ ಮಾರ್ಗಮಧ್ಯದ ಸೇತುವೆಗಳಿಗೂ ಹಾನಿಯುಂಟಾಗಿದೆ.

ಸತತ ಮಳೆಯಿಂದಾಗಿ ಜಲಾವೃತಗೊಂಡಿದ್ದ ಬಹುತೇಕ ಸೇತುವೆಗಳು ಶುಕ್ರವಾರ ಬೆಳಗ್ಗೆಯಿಂದ ಸಂಚಾರಕ್ಕೆ ಮುಕ್ತವಾಗಿವೆ. ವಿದ್ಯುತ್‌ ಕಂಬಗಳಿಗೆ ಹಾನಿಯುಂಟಾದ ಕಾರಣ ತಾಲೂಕಿನ 50ಕ್ಕೂ ಗ್ರಾಮಗಳಲ್ಲಿ ವಿದ್ಯುತ್‌ ಸರಬರಾಜು ಸ್ಥಗಿತಗೊಂಡು ಗ್ರಾಮಗಳು ಕತ್ತಲೆಯಲ್ಲಿಮುಳುಗಿವೆ.