ಸೇತುವೆ ಕುಸಿದು ಟ್ರ್ಯಾಪ್ಟರ್‌ ಪಲ್ಟಿ: ವ್ಯಕ್ತಿ ಸಾವು

ಮೂಡಲಗಿ: ಸಮೀಪದ ಮೂಡಲಗಿ- ಮುಸಗುಪ್ಪಿ ರಸ್ತೆಯ ಧರ್ಮಟ್ಟಿ ಗ್ರಾಮದ ಬಳಿ ಸೋಮವಾರ ಶಿಥಿಲ ಸೇತುವೆ ಭಾರ ತಡೆಯಲಾರದೇ ಕುಸಿದ ಪರಿಣಾಮ ಸೇತುವೆಯಲ್ಲಿ ಸಂಚರಿಸುತ್ತಿದ್ದ ಟ್ರ್ಯಾಕ್ಟರ್‌ ಪಲ್ಟಿಯಾಗಿ ವ್ಯಕ್ತಿಯೊಬ್ಬರು ಮೃತಪಟ್ಟು ಇನ್ನೊಬ್ಬರು ಗಂಭೀರ ಗಾಯಗೊಂಡಿದ್ದಾರೆ.

ಸಿದ್ದಪ್ಪ ಭೀಮಪ್ಪ ವಡೇರಟ್ಟಿ(35) ಮೃತಪಟ್ಟವರು. ಮೂರು ಟ್ರಾಲಿಗಳಲ್ಲಿ ಕಲ್ಲುಗಳನ್ನು ತುಂಬಿಕೊಂಡು ಮುಸಗಪ್ಪಿ ಕಡೆಯಿಂದ ಮೂಡಲಗಿ ಕಡೆಗೆ ಬರುತ್ತಿದ್ದ ಟ್ರ್ಯಾಕ್ಟರ್‌ ಚಾಲಕನ ನಿಯಂತ್ರಣ ತಪ್ಪಿ ಸೇತುವೆ ಮೇಲಿಂದ ಪಲ್ಟಿಯಾಗಿ ಈ ಅವಘಡ ಸಂಭವಿಸಿದೆ. ಅಪಘಾತದಲ್ಲಿ ಗಾಯಗೊಂಡ ವ್ಯಕ್ತಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಕುರಿತು ಮೃತ ಸಿದ್ದಪ್ಪ ಅವರ ಪತ್ನಿ ಸುವರ್ಣ ಅವರು ಮೂಡಲಗಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಅಪಘಾತ ಸಂಭವಿಸಿದ ರಸ್ತೆಯಲ್ಲಿರುವ 3ಧಿ- 4 ಸೇತುವೆಗಳು ಹಳೆಯದಾಗಿದ್ದು ಇವುಗಳ ದುರಸ್ತಿಗೆ ಸಂಬಂಧಿಸಿದ ಇಲಾಖೆ ನಿರ್ಲಕ್ಷ್ಯ ವಹಿಸಿದೆ. ಈ ಹಿಂದೆ ಎರಡು ಬಾರಿ ಇಂತಹ ಅಪಘಾತ ಸಂಭವಿಸಿದ್ದರೂ ಅದೃಷ್ಟವಶಾತ್‌ ಪ್ರಾಣಹಾನಿ ಆಗಿರಲಿಲ್ಲ. ಏತನ್ಮಧ್ಯೆ ಚಾಲನಾ ನಿಯಮಗಳ ಉಲ್ಲಂಘನೆಯೂ ಅವ್ಯಾಹತವಾಗಿ ನಡೆದಿರುವುದು ಇಂಥ ಘಟನೆಗಳಿಗೆ ಕಾರಣವಾಗುತ್ತಿದೆ ಎಂದು ಸಾರ್ವಜನಿಕರು ದೂರಿದ್ದಾರೆ.