ತೆರಿಗೆ ಪಾವತಿಸದೆ ಬೆಳ್ಳಿ ಸಾಗಣೆ: 2.64 ಲಕ್ಷ ರೂ. ದಂಡ

ಬೆಳಗಾವಿ: ತೆರಿಗೆ ಪಾವತಿಸದೆ ಭಾರಿ ಪ್ರಮಾಣದ ಬೆಳ್ಳಿ ಸಾಗಿಸುತ್ತಿದ್ದ ಐವರನ್ನು ವಶಕ್ಕೆ ಪಡೆದ ಹಿರೇಬಾಗೇವಾಡಿ ಠಾಣೆ ಪೊಲೀಸರು ದಂಡ ಪಾವತಿಸಿಕೊಂಡು ಬಿಡುಗಡೆಗೊಳಿಸಿದ್ದಾರೆ.

ಮಹಾರಾಷ್ಟ್ರದ ಉಸ್ಮಾನಾಬಾದ್‌ ಪಟ್ಟಣದ ದತ್ತಾತ್ರೇಯ ಬಲಿರಾಂ ಮಾಳಿ (29), ತಮಿಳುನಾಡಿನ ಸೇಲಂ ನಗರದ ಶಾಜಿ ಪ್ರಕಾಶರಾವ್‌ ದೇಶಮುಖ (35), ಕೃಷ್ಣಮೂರ್ತಿ ಉಪಿರಮಳ ಪರಮಳ (49), ಮಹಾರಾಷ್ಟ್ರದ ಸಾತಾರ ಜಿಲ್ಲೆಯ ಅಂಬೆವಾಡಿ ಗ್ರಾಮದ ವಿಕಾಸ ರಾಮಚಂದ್ರ ನಲವಡೆ (45) ಹಾಗೂ ರಾಮಚಂದ್ರ ನಲವಡೆ (45) ಬೆಳ್ಳಿ ಸಾಗಿಸುತ್ತಿದ್ದರು.

ಇವರು ಬೆಳಗಾವಿ ಮೂಲಕ ಹುಬ್ಬಳ್ಳಿ ಕಡೆಗೆ ಕಾರಿನಲ್ಲಿ ಅಕ್ರಮವಾಗಿ ಅಪಾರ ಪ್ರಮಾಣದ ಬೆಳ್ಳಿ ಸಾಗಿಸುತ್ತಿದ್ದ ಮಾಹಿತಿ ದೊರತೆ ಹಿನ್ನೆಲೆಯಲ್ಲಿ ಪೊಲೀಸರು ಅವರನ್ನು ತಡೆದು ತಪಾಸಣೆ ಕೈಗೊಂಡಿದ್ದರು. ಕಾರಿನ ಸೀಟಿನ ಹಿಂಭಾಗದಲ್ಲಿ 153 ಕೆಜಿ ಕಚ್ಚಾ ಬೆಳ್ಳಿಯ ಗಟ್ಟಿಗಳು ಪತ್ತೆಯಾಗಿದ್ದವು. ಈ ಕುರಿತು ವಿಚಾರಿಸಿದಾಗ ಮಹಾರಾಷ್ಟ್ರದ ಹುಪರಿಯ ಅಂಗಡಿಗಳಲ್ಲಿ ಬೆಳ್ಳಿ ಖರೀದಿಸಿರುವುದಾಗಿ ಹೇಳಿದ್ದರು.

ಬೆಳ್ಳಿ ಖರೀದಿಸಿದ ಕುರಿತು ಕಚ್ಚಾ ಬಿಲ್‌ ಹಾಗೂ ಬೆಳ್ಳಿಗಟ್ಟಿಗಳ ಸರ್ಟಿಫಿಕೇಟ್‌ ಹಾಜರುಪಡಿಸಿದ್ದರಾದರೂ ತೆರಿಗೆ ಪಾವತಿಸಿರುವ ಕುರಿತು ದಾಖಲೆ ಇರಲಿಲ್ಲ. ಈ ಕುರಿತು ವಾಣಿಜ್ಯ ತೆರಿಗೆ ಇಲಾಖೆಗೆ ಪೊಲೀಸರು ಮಾಹಿತಿ ನೀಡಿದ್ದರು. ತೆರಿಗೆ ಇಲಾಖೆ ಅಧಿಕಾರಿಗಳು 2.64 ಲಕ್ಷ ರೂ.ದಂಡ ವಿಧಿಸಿದ್ದಾರೆ. ದಂಡ ಪಾವತಿಸಿದ ನಂತರ ವಾಹನ ಸಹಿತ ಬೆಳ್ಳಿ ಗಟ್ಟಿಗಳನ್ನು ಪೊಲೀಸರು ಮರಳಿಸಿದ್ದಾರೆ.