ಅಕ್ರಮ ಮದ್ಯ ಸಾಗಿಸುತ್ತಿದ್ದ ಇಬ್ಬರ ಬಂಧನ

ಬೆಳಗಾವಿ: ಇಲ್ಲಿನ ಸಿಸಿಐಬಿ ಪೊಲೀಸರು ಶುಕ್ರವಾರ ಅಕ್ರಮವಾಗಿ ಮದ್ಯ ಸಾಗಿಸುತ್ತಿದ್ದ ಇಬ್ಬರನ್ನು ಬಂಧಿಸಿ, ಗೋವಾ ರಾಜ್ಯದ 11,820 ರೂ. ಮೌಲ್ಯದ ಮದ್ಯ ಹಾಗೂ 1,250 ರೂ. ನಗದು ವಶಪಡಿಸಿಕೊಂಡಿದ್ದಾರೆ.

ಗೋವಾ ಕದಂಬ ಸಾರಿಗೆ ಸಂಸ್ಥೆಯ ಕಂಡಕ್ಟರ್‌ ವಿಶ್ವಾಸ ಶಾಂಬಾ ತಾರಿ (57) ಮತ್ತು ಬೆಳಗಾವಿಯ ಅರುಣ ಚಂದ್ರಕಾಂತ ಮಾರದೋಳಕರ್‌ (59) ಬಂಧಿತರಾಗಿದ್ದು, ಇವರಿಂದ ಗೋವಾ ರಾಜ್ಯದಲ್ಲಿ ಮಾತ್ರ ಮಾರಾಟಕ್ಕೆ ಅನುಮತಿ ಇರುವ ರಾಯಲ್‌ ಚಾಲೆಂಜ್‌, ರಾಯಲ್‌ ಸ್ಟ್ರಾಂಗ್‌, ಬ್ಲೆಂಡರ್ಸ ಪ್ರೈಡ್‌, ಮ್ಯಾಕ್‌ಡಾಲ್‌ ವಿಸ್ಕಿ, ರಿಯಲ್ಸ ವಿಸ್ಕಿ ಒಳಗೊಂಡು ನಾನಾ ಕಂಪನಿಗಳ ಒಟ್ಟು 40 ಲೀಟರ್‌ ಮದ್ಯ ಜಪ್ತಿ ಮಾಡಲಾಗಿದೆ.

ಖಚಿತ ಮಾಹಿತಿ ಆಧರಿಸಿ ಇನ್ಸ್‌ಪೆಕ್ಟರ್‌ ಎ.ಎಸ್‌. ಗುದಿಗೊಪ್ಪ ಸಿಬ್ಬಂದಿಯೊಂದಿಗೆ ಶುಕ್ರವಾರ ಮಧ್ಯಾಹ್ನ ಕಾರ್ಯಾಚರಣೆ ನಡೆಸಿದ್ದರು. ಬಸ್‌ ಕಂಡಕ್ಟರ್‌ ಗೋವಾ ರಾಜ್ಯದಿಂದ ಮದ್ಯ ತಂದು ಬೆಳಗಾವಿ ಕೇಂದ್ರ ಬಸ್‌ ನಿಲ್ದಾಣದಲ್ಲಿ ಅರುಣ ಮಾರದೋಳಕರ್‌ಗೆ ದುಪ್ಪಟ್ಟು ಬೆಲೆಗೆ ನೀಡುತ್ತಿದ್ದಾಗ ವಶಕ್ಕೆ ಪಡೆಯಲಾಗಿದೆ. ಪೊಲೀಸ್‌ ಸಿಬ್ಬಂದಿ ಬಿ.ಆರ್‌. ಮುತ್ನಾಳ, ಎಸ್‌.ಆರ್‌. ಮೇತ್ರಿ, ಎಸ್‌.ಸಿ. ಕೋರೆ, ಬಿ.ಎನ್‌. ಬಳಗನ್ನವರ, ಸಿ.ಜೆ. ಚಿನ್ನಪ್ಪಗೋಳ, ಅರುಣ ಕೆ. ಕಾಂಬಳೆ, ಎಂ.ಎಂ. ಒಡೆಯರ, ಎಸ್‌.ಎಸ್‌. ಪಾಟೀಲ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು. ಪ್ರಕರಣ ದಾಖಲಾಗಿದ್ದು, ತನಿಖೆ ನಡೆದಿದೆ.