ಎರಡು ದೇವಾಲಯಗಳು ಜಲಾವೃತ

ಖಾನಾಪುರ: ಭೀಮಗಡ, ಕಣಕುಂಬಿ, ಲೋಂಡಾ ಮತ್ತು ಜಾಂಬೋಟಿ ಅರಣ್ಯ ಪ್ರದೇಶದಲ್ಲಿ ಬುಧವಾರ ರಾತ್ರಿಯಿಡೀ ಸತತವಾಗಿ ಮಳೆ ಸುರಿದಿದೆ. ಗುರುವಾರವೂ ಮುಂದುವರಿದ ಸತತಧಾರೆಯಿಂದಾಗಿ ಮಲಪ್ರಭಾ ತೀರದಲ್ಲಿರುವ ಹಬ್ಬನಹಟ್ಟಿಯ ಆಂಜನೇಯ ದೇವಾಲಯ ಸಂಪೂರ್ಣ ಜಲಾವೃತಗೊಂಡಿದ್ದು, ತಾಲೂಕಿನ ಇಟಗಿ ಗ್ರಾಮದ ಹೊರವಲಯದ ಐತಿಹಾಸಿಕ ಮರುಳ ಶಂಕರ ದೇವಾಲಯವೂ ಸಹ ಮಲಪ್ರಭಾ ನದಿಯಲ್ಲಿ ಮುಳುಗಿದೆ.

ಮಳೆಯಿಂದಾಗಿ ತಾಲೂಕಿನ ಕಾನನದಂಚಿನ ಗ್ರಾಮಗಳಲ್ಲಿ ಬಹುತೇಕ ಜನಜೀವನ ಅಸ್ತವ್ಯಸ್ತವಾಗಿದೆ. ಪಶ್ಚಿಮ ಭಾಗದಲ್ಲಿರುವ ಕೃಷಿ ಜಮೀನುಗಳಲ್ಲಿ ನೀರು ಶೇಖರಣೆಗೊಂಡು ಭತ್ತದ ಗದ್ದೆಗಳು ಜಲಾವೃತಗೊಂಡಿವೆ. ತಾಲೂಕಿನ ಪೂರ್ವಭಾಗದ ಹಲವು ಕಡೆಗಳಲ್ಲೂ ಗುರುವಾರ ದಿನವಿಡೀ ಮಳೆ ಸುರಿದಿದೆ. ಮಲಪ್ರಭಾ, ಮಹದಾಯಿ, ಪಾಂಡರಿ ನದಿಗಳಲ್ಲಿ ನೀರಿನ ಹರಿವು ಹೆಚ್ಚಿದೆ. ಹಲವೆಡೆ ವಿದ್ಯುತ್‌ ಸಂಪರ್ಕದಲ್ಲಿ ವ್ಯತ್ಯಯ ಉಂಟಾದ ವರದಿಯಾಗಿದೆ.

ಗುರುವಾರ ತಾಲೂಕಿನ ನಂದಗಡ ಗ್ರಾಮದಲ್ಲಿ ಒಂದು ಮನೆಗೆ ಭಾಗಶಃ ಹಾನಿಯಾಗಿದೆ. ಉಳಿದಂತೆ ಯಾವುದೇ ಜೀವಹಾನಿಯಾಗಿಲ್ಲ ಎಂದು ತಹಸೀಲ್ದಾರ್‌ ಕಚೇರಿಯ ಮೂಲಗಳು ತಿಳಿಸಿವೆ,