ಓಕುಳಿಯಾಡಿ ಸ್ನಾನಕ್ಕೆ ತೆರಳಿದ್ದ ಇಬ್ಬರು ನೀರುಪಾಲು!

ಇಚಲಕರಂಜಿ :ರಂಗಪಂಚಮಿಯ ದಿನವಾದ ಸೋಮವಾರ ಮಧ್ಯಾಹ್ನದ ವರೆಗೆ ಬಣ್ಣದಾಟವಾಡಿದ ರುಯಿ ಗ್ರಾಮದ ಸಮೀಪವಿರುವ ಪಂಚಗಂಗಾ ನದಿಗೆ ತೆರಳಿ ಸ್ನಾನ ಮಾಡುತ್ತಿದ್ದ ಇಬ್ಬರು ಯುವಕರು ನೀರುಪಾಲಾಗಿದ್ದಾರೆ.

ಇಚಲಕರಂಜಿಯ ಅಷ್ಟವಿನಾಯಕ ಹೌಸಿಂಗ್‌ ಸೊಸೈಟಿ ಪರಿಸರದ ಶುಭಂ ಮಹಾಜನ (21) ಹಾಗೂ ಪ್ರಥಮೇಶ ಸುಬೇದಾರ (18) ನೀರುಪಾಲಾದವರು. ಇವರಿಬ್ಬರೂ ತಮ್ಮ ಸ್ನೇಹಿತರಾದ ರಾಕೇಶ ಮಹಾಜನ, ಸಚಿನ್‌ ಕೋರವಿ, ಹೃಷಿಕೇಶ ಮುಳೆ, ಪ್ರಕಾಶ ಸುಬೇದಾರ ಕೂಡಿ ರುಯಿ ಸಮೀಪವಿರುವ ಪಂಚಗಂಗಾ ನದಿಗೆ ಸ್ನಾನ ಮಾಡಲು ಮಧ್ಯಾಹ್ನ ತೆರಳಿದ್ದರು.

ಶುಭಂ ಮಹಾಜನ ಶರದ ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ 2ನೇ ವರ್ಷದಲ್ಲಿ ಓದುತ್ತಿದ್ದು ಪ್ರಥಮೇಶ ಕಬನೂರ ಹೈಸ್ಕೂಲಿನಲ್ಲಿ ಪಿಯುಸಿ ದ್ವಿತೀಯ ವರ್ಷದಲ್ಲಿ ಓದುತ್ತಿದ್ದ.

ಹಾತಕಣಂಗಲೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ಘಟನಾ ಸ್ಥಳಕ್ಕೆ ಪೊಲೀಸ್‌ ಅಧಿಕಾರಿ ನಿತೀಶ ತರಾಳ, ಗ್ರಾಮಲೆಕ್ಕಾಧಿಕಾರಿ ಆರ್‌.ಡಿ. ಪೂಜಾರಿ, ಹಾತಕಣಂಗಲೆ ಪಿಎಸ್‌ಐ ಶಂಕರ ಚವಾಣ ಭೇಟಿ ನೀಡಿ ತನಿಖೆ ನಡೆಸಿದ್ದಾರೆ.

ಸೋಮವಾರ ತಡರಾತ್ರಿಯವರೆಗೂ ನೀರುಪಾಲಾದವರ ಪತ್ತೆಗೆ ಶೋಧ ಕಾರ್ಯ ನಡೆದಿದ್ದು ಸ್ಥಳೀಯರೂ ನೆರವು ನೀಡುತ್ತಿದ್ದಾರೆ.