ಬೆಳಗಾವಿಯಿಂದ 13 ಕಡೆಗೆ ‘ಉಡಾನ್‌’

ಬೆಳಗಾವಿ : ಬಹು ನಿರೀಕ್ಷಿತ ಉಡಾನ್‌-3 ಯೋಜನೆಯಲ್ಲಿ ಆಯ್ಕೆಯಾಗಿರುವ ನಗರಗಳಿಂದ ಸಂಪರ್ಕ ಕಲ್ಪಿಸುವ ವಿಮಾನಯಾನ ಸಂಸ್ಥೆಗಳು ಹಾಗೂ ವಿಮಾನ ಮಾರ್ಗಗಳ ಪಟ್ಟಿಯನ್ನು ಕೇಂದ್ರ ಸರಕಾರ ಶುಕ್ರವಾರ ಪ್ರಕಟಿಸಿದ್ದು, ಬೆಳಗಾವಿಯಿಂದ ದೇಶದ ಒಟ್ಟು 13 ಸ್ಥಳಗಳಿಗೆ ಸಂಪರ್ಕ ಸಿಗಲಿದೆ.

ಇಲ್ಲಿಂದ ಹೈದರಾಬಾದ್‌, ತಿರುಪತಿ, ಮುಂಬಯಿ, ಪುಣೆ, ಸೂರತ್‌, ಕಡಪಾ, ಮೈಸೂರು, ಇಂಧೋರ್‌, ಜೋಧಪುರ, ಜೈಪುರ, ಅಹಮದಾಬಾದ್‌, ನಾಸಿಕ್‌ ಮತ್ತು ನಾಗಪುರ ಏರ್‌ಪೋರ್ಟ್‌ಗಳಿಗೆ ವಿಮಾನಗಳು ಹಾರಾಟ ನಡೆಸಲಿವೆ. ಸ್ಟಾರ್‌ ಏರ್‌ಲೈನ್ಸ್‌, ಮೆಗಾ ಟರ್ಬೋ ಏರ್‌ಲೈನ್ಸ್‌, ಸ್ಪೈಸ್‌ ಜೆಟ್‌ ಏರ್‌ಲೈನ್ಸ್‌, ಇಂಟರ್‌ ಗ್ಲೋಬ್‌ ಮತ್ತು ಅಲಾಯನ್ಸ್‌ ಏರ್‌ ಸಂಸ್ಥೆಗಳು ಈ ಸೇವೆ ನೀಡಲಿವೆ.

ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಸಂಸದ ಸುರೇಶ ಅಂಗಡಿ, ಈ ಭಾಗದ ಜನರ ಬೇಡಿಕೆ ಈಡೇರಿಸಿದ್ದಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿ, ವಿಮಾನಯಾನ ಸಚಿವ ಸುರೇಶ ಪ್ರಭು, ವಿಮಾನಯಾನ ರಾಜ್ಯಸಚಿವ ಜಯಂತ ಸಿನ್ಹಾ ಹಾಗೂ ಸಹಕರಿಸಿದ ಎಲ್ಲರಿಗೂ ಕೃತಜ್ಞತೆ ಸಲ್ಲಿಸುವುದಾಗಿ ತಿಳಿಸಿದರು.

ರಾಜ್ಯಸಭಾ ಸದಸ್ಯ ಡಾ. ಪ್ರಭಾಕರ ಕೋರೆ ಕೂಡ ಖುಷಿ ವ್ಯಕ್ತಪಡಿಸಿದ್ದು, ''ಪ್ರಧಾನಿ ನರೇಂದ್ರ ಮೋದಿಯವರು ಬೆಳಗಾವಿ ಜನರಿಗೆ ನೀಡಿದ್ದ ಮಾತನ್ನು ಉಳಿಸಿಕೊಂಡಿದ್ದಾರೆ'', ಎಂದು ಪ್ರತಿಕ್ರಿಯಿಸಿದ್ದಾರೆ.

ನಾಗರಿಕರ ಅಭಿಪ್ರಾಯವೇನು?: ಸಾಂಬ್ರಾ ವಿಮಾನ ನಿಲ್ದಾಣದಿಂದ ವಿಮಾನಗಳು ಹೆಚ್ಚಿನ ಸಂಖ್ಯೆಯಲ್ಲಿ ಹಾರಾಟ ನಡೆಸಲಿರುವುದನ್ನು ಜನ ಸ್ವಾಗತಿಸಿದ್ದಾರೆ. ಆದರೆ ಸಿಕ್ಕಿರುವ ನಗರಗಳಿಗೆ ಬೆಳಗಾವಿಯಿಂದ ಎಷ್ಟು ಜನ ವಿಮಾನಯಾನ ಮಾಡುತ್ತಾರೆ ಎಂದು ಪ್ರಶ್ನಿಸಿದ್ದಾರೆ. ಈಗ ಸಿಕ್ಕಿರುವ ನಗರಗಳಿಗಿಂತ ಬೆಳಗಾವಿ ಜನ ಹೆಚ್ಚು ಪ್ರಯಾಣಿಸುವ ಹಾಗೂ ಅವರ ವ್ಯಾಪಾರ ವಹಿವಾಟುಗಳಿಗೆ ಅನುಕೂಲ ಇರುವ ನಗರಗಳಿಗೆ ವಿಮಾನ ಸಂಪರ್ಕ ಕೊಡಬೇಕಿತ್ತು. ಕೇಂದ್ರ ಸರಕಾರ ಬೆಳಗಾವಿ ಜನರ ಹೋರಾಟಕ್ಕೆ ಕಣ್ಣೊರೆಸುವ ತಂತ್ರ ಅನುಸರಿಸಿದೆ ಎಂಬ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.