ಉದ್ಧವ ಠಾಕ್ರೆ ಹೇಳಿಕೆ ಖಂಡಿಸಿ ಮನವಿ

ಹುಕ್ಕೇರಿ: ರಾಜ್ಯ ಸರಕಾರ ಬೆಳಗಾವಿಯನ್ನು ಎರಡನೇ ರಾಜಧಾನಿಯಾಗಿ ಘೋಷಿಸಲು ನಡೆಸಿರುವ ಚಿಂತನೆಯನ್ನು ವಿರೋಧಿಸಿ ಮಹಾರಾಷ್ಟ್ರದ ಶಿವಸೇನಾ ಮುಖಂಡ ಉದ್ಧವ ಠಾಕ್ರೆ ನೀಡಿರುವ ಹೇಳಿಕೆಯನ್ನು ಕರ್ನಾಟಕ ನವ ನಿರ್ಮಾಣ ಸೇನೆ ಖಂಡಿಸಿದೆ.

ಈ ಕುರಿತು ಸಂಘಟನೆಯ ಮುಖಂಡರು ಹಾಗೂ ಸದಸ್ಯರು ಪ್ರತಿಭಟನೆ ನಡೆಸಿ ಗ್ರೇಡ್‌ 2 ತಹಸೀಲ್ದಾರ್‌ ಕಿರಣ ಬೆಳವಿ ಅವರಿಗೆ ಮನವಿ ಸಲ್ಲಿಸಿದರು.

ಅಧ್ಯಕ್ಷ ಸುನೀಲ ಪಾಟೀಲ ಮಾತನಾಡಿ, ಉದ್ಧವ ಠಾಕ್ರೆ ತಮ್ಮ ನೇತೃತ್ವದಲ್ಲಿ ಹೊರಬರುತ್ತಿರುವ ಸಾಮ್ನಾ ಪತ್ರಿಕೆಯಲ್ಲಿ ನೀಡಿರುವ ಹೇಳಿಕೆ ರಾಜ್ಯ ಹಾಗೂ ಕನ್ನಡಿಗರ ವಿರೋಧಿ ಹಾಗೂ ಸ್ವಾಭಿಮಾನ ಕೆಣಕುವಂಥ ನಡವಳಿಕೆಯದಾಗಿದೆ. ಕಾರಣ ಇದನ್ನು ಖಂಡಿಸುತ್ತೇವೆ. ಇಂತಹ ವರ್ತನೆ ಮುಂದುವರಿಸಿದಲ್ಲಿ ಉಗ್ರ ಹೋರಾಟ ಮಾಡಲಾಗುವುದು ಎಂದು ಎಚ್ಚರಿಸಿದರು.

ಸುನೀಲ ರಾಠೋಡ, ಮಹೇಶ ಪಾಟೀಲ, ಶಶಿಕಾಂತ ಸೋಲಾಪುರೆ ಹಾಗೂ ನಾನಾ ಗ್ರಾಮಗಳ ಪದಾಧಿಕಾರಿಗಳು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.