ಬುಡಾದಿಂದ ಅನಧಿಕೃತ ಲೇಔಟ್‌ ತೆರವು

ಬೆಳಗಾವಿ: ಇಲ್ಲಿನ ಅನಗೋಳ ಯಳ್ಳೂರು ರಸ್ತೆಯ ಸರ್ವೇ ನಂ.179ರಲ್ಲಿಅನಧಿಕೃತವಾಗಿ ಖಾಸಗಿಯವರು ನಿರ್ಮಿಸಿದ್ದ ಲೇಔಟನ್ನು ಬುಡಾ ಮಂಗಳವಾರ ತೆರವು ಗೊಳಿಸಿತು.

ಬುಡಾ ಅಧಿಕಾರಿಗಳು ಬೆಳಗ್ಗೆಯೇ ಪೊಲೀಸರ ನೆರವಿನೊಂದಿಗೆ ಬುಲ್ಡೋಜರ್‌ಗಳೊಂದಿಗೆ ಕಾರ್ಯಾಚರಣೆಗಳಿದು, ಅನಧಿಕೃತ ಲೇಔಟ್‌ದಾರರಿಗೆ ಶಾಕ್‌ ನೀಡಿದರು. ಲೇಔಟ್‌ನಲ್ಲಿಮಾಡಿದ್ದ ರಸ್ತೆ ಮತ್ತು ಇತರೆ ನಿರ್ಮಾಣಗಳನ್ನು ತೆರವುಗೊಳಿಸಿದರು.

ಸರಕಾರದ ಆದೇಶದ ಪ್ರಕಾರ ಬುಡಾ ಈ ಕಾರ್ಯಾಚರಣೆ ನಡೆಸಿದ್ದು, ಕೆಲವು ದಿನಗಳ ಹಿಂದೆ 12 ಅನಧಿಕೃತ ಲೇಔಟ್‌ಗಳನ್ನು ತೆರವುಗೊಳಿಸಿ, ಎಚ್ಚರಿಕೆ ನೀಡಿತ್ತು. ಇತರೆ ಕಾರ್ಯನಿಮಿತ್ತ ಕೆಲದಿನಗಳ ಮಟ್ಟಿಗೆ ಕಾರ್ಯಾಚರಣೆ ಸ್ಥಗಿತಗೊಳಿಸಿತ್ತು. ಈಗ ಮತ್ತೆ ಮುಂದುವರಿಸಿದ್ದು, ಉಳಿದ ಅನಧಿಕೃತ ಲೇಔಟ್‌ದವರಿಗೂ ನೋಟಿಸ್‌ ನೀಡಿ ಮುಂದಿನ ಕ್ರಮ ಕೈಗೊಳ್ಳಲಿದೆ.

''ನಾಗರಿಕರು ಅನಧಿಕೃತ ಲೇಔಟ್‌ಗಳ ಬಗ್ಗೆ ಎಚ್ಚರಿಕೆಯಿಂದ ಇರಬೇಕು. ಇಂಥಲ್ಲಿನಿವೇಶನಗಳ ಖರೀದಿಸಬಾರದು. ಇದನ್ನು ಮೀರಿ ಖರೀದಿಸಿದರೆ ಆರ್ಥಿಕ ಹಾನಿಗೆ ಕಾರಣವಾಗುತ್ತದೆ. ಖಾಸಗಿಯವರು ಅನಧಿಕೃತ ಲೇಔಟ್‌ಗಳ ನಿರ್ಮಾಣಕ್ಕೆ ಹೋಗಬಾರದು'' ಎಂದು ಸಹಾಯಕ ಕಾರ್ಯಕಾರಿ ಅಭಿಯಂತರ ಎಂ.ವಿ. ಹಿರೇಮಠ ತಿಳಿಸಿದ್ದಾರೆ.