ಬಸ್‌ ನಿಲ್ದಾಣ ಸಂಪರ್ಕಕ್ಕೆ ಅಂಡರ್‌ಪಾಸ್‌

ಬೆಳಗಾವಿ: ನಗರ ಬಸ್‌ ನಿಲ್ದಾಣ (ಸಿಬಿಟಿ) ಮತ್ತು ಕೇಂದ್ರ ಬಸ್‌ ನಿಲ್ದಾಣದ ನಡುವೆ ಪ್ರಯಾಣಿಕರು ಮತ್ತು ಸಾರ್ವಜನಿಕರು ಸಂಚರಿಸಲು ಅನುಕೂಲವಾಗುವಂತೆ ಸ್ಮಾರ್ಟ್‌ ಸಿಟಿ ಯೋಜನೆ ಅಡಿ ಕೆಳ ಸೇತುವೆ (ಅಂಡರ್‌ ಪಾಸ್‌) ನಿರ್ಮಾಣಗೊಳ್ಳಲಿದೆ.

ಸ್ಮಾರ್ಟ್‌ ಸಿಟಿ ವ್ಯವಸ್ಥಾಪಕ ನಿರ್ದೇಶಕ ಶಶಿಧರ ಕುರೇರ ಅಧ್ಯಕ್ಷತೆಯಲ್ಲಿಶುಕ್ರವಾರ ಕಂಟೋನ್ಮೆಂಟ್‌ ಸಿಇಒ, ಟ್ರಾಫಿಕ್‌ ಎಸಿಪಿ ಮತ್ತು ಪಾಲಿಕೆ ಅಧಿಕಾರಿಗಳ ಉಪಸ್ಥಿತಿಯಲ್ಲಿನಡೆದ ಸಭೆಯಲ್ಲಿಈ ಕುರಿತು ಚರ್ಚಿಸಲಾಯಿತು.

ಅಂಡರ್‌ ಪಾಸ್‌ ಕಾಮಗಾರಿ ಆರಂಭಿಸಿದರೆ ಎದುರಾಗುವ ಸಮಸ್ಯೆಗಳು, ನಿವಾರಣೆ ಕ್ರಮ, ಕೆಳ ಸೇತುವೆ ನಿರ್ಮಾಣವಾಗುವವರೆಗೂ ಬಸ್‌ ಮತ್ತು ಜನಸಂಚಾರ ವ್ಯವಸ್ಥೆ, ವಿದ್ಯುತ್‌ ಕಂಬಗಳ ಸ್ಥಳಾಂತರ ಇತರ ಸಂಗತಿಗಳ ಕುರಿತು ಚರ್ಚಿಸಲಾಯಿತು.

ಸಭೆಯ ನಂತರ ಅಧಿಕಾರಿಗಳು ಕೆಳ ಸೇತುವೆ ನಿರ್ಮಾಣ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಬಿಡಿಸಿಸಿ ಬ್ಯಾಂಕ್‌ ಎದುರಿಗಿನ ಹಳೇ ಪಿಬಿ ರಸ್ತೆ ಮತ್ತು ಹಳೆ ಭಾಜಿ ಮಾರ್ಕೆಟ್‌ನಿಂದ ಪ್ರವಾಸಿ ಮಂದಿರದವರೆಗಿನ ರಸ್ತೆಯಲ್ಲಿಈಗ ನಡೆದಿರುವ ಕಾಮಗಾರಿಗಳು ಪೂರ್ಣಗೊಂಡು ಸಂಚಾರಕ್ಕೆ ಮುಕ್ತಾಯವಾಗುತ್ತಿದ್ದಂತೆ ಕೆಳ ಸೇತುವೆ ಕೆಲಸ ಆರಂಭಿಸಲು ತೀರ್ಮಾನಿಸಲಾಯಿತು.