ನೊಣಗಳ ಹಾವಳಿ ನಿಯಂತ್ರಣಕ್ಕೆ ತಾಕೀತು

ಚನ್ನಮ್ಮನ ಕಿತ್ತೂರು: ನೊಣಗಳ ಹಾವಳಿ ನಿಯಂತ್ರಣಕ್ಕೆ ಸೂಕ್ತ ಕ್ರಮ ಕೈಗೊಳ್ಳುವಂತೆ ಹೊನ್ನಾಪುರದ ಚನ್ನಮ್ಮ ಪೌಲ್ಟ್ರಿ ಫಾರ್ಮ್‌ ಮಾಲೀಕರಿಗೆ ತಹಸೀಲ್ದಾರ ಪ್ರವೀಣ ಹುಚ್ಚಣ್ಣವರ ಕಟ್ಟುನಿಟ್ಟಿನ ತಾಕೀತು ಮಾಡಿದ್ದಾರೆ.

ಸಾರ್ವಜನಿಕರಿಂದ ದೂರು ಕೇಳಿ ಬಂದಿದ್ದರಿಂದ ಪೌಲ್ಟ್ರಿ ಫಾರ್ಮಿಗೆ ಸೋಮವಾರ ಭೇಟಿ ನೀಡಿದ ಅವರು, ನೊಣಗಳ ನಿಯಂತ್ರಣಕ್ಕಾಗಿ ಕೈಗೊಂಡ ಕ್ರಮಗಳ ಬಗ್ಗೆ ಪರಿಶೀಲನೆ ನಡೆಸಿದರು.

ಫಾರ್ಮಿನ ಪ್ರಾಂಗಣದಲ್ಲಿ ಗಲೀಜು ಹೆಚ್ಚಾಗದಂತೆ ನೋಡಿಕೊಳ್ಳಬೇಕು. ಬಿದ್ದ ಮಳೆ ನೀರು ಒಂದೆಡೆ ನಿಂತು ಕೊಳಚೆ ನಿರ್ಮಾಣವಾಗದಂತೆ ಎಚ್ಚರ ವಹಿಸಬೇಕು. ಇಲ್ಲಿ ಕ್ರಿಮಿನಾಶಕ ಸಿಂಪಡಣೆ ಮಾಡುವವರಿಗೆ ಮಾಸ್ಕ್‌, ಕೈಗವಚ ಮುಂತಾದ ಸಲಕರಣೆ ನೀಡಬೇಕು ಎಂದು ಅವರು ಕೆಲವು ಸಲಹೆಗಳನ್ನು ನೀಡಿದರು.

ಉಪವಿಭಾಗಾಧಿಕಾರಿ ಶಿವಾನಂದ ಭಜಂತ್ರಿ ಅವರೂ ಫಾರ್ಮಿಗೆ ಭೇಟಿ ನೀಡಿದ್ದು, ಕೆಲ ಮುಂಜಾಗ್ರತೆ ಕ್ರಮಗಳನ್ನು ತೆಗೆದುಕೊಳ್ಳುವಂತೆ ಎಚ್ಚರಿಕೆ ನೀಡಿದ್ದಾರೆ ಎಂದು ಅವರು ಮಾಹಿತಿ ನೀಡಿದರು.

ಕ್ರಿಮಿನಾಶಕದ ಯಡವಟ್ಟು: ನಾವು ಸಿಂಪಡಣೆ ಮಾಡಲು ಖರೀದಿಸುವ ಸಾವಯವ ಕ್ರಿಮಿನಾಶಕದಲ್ಲಿ ದೋಷ ಕಂಡು ಬಂದಿದ್ದರಿಂದ ಹೀಗಾಗಿದೆ. ತಜ್ಞರನ್ನು ಕರೆಸಿ ವಾಸ್ತವಾಂಶ ಪತ್ತೆ ಹಚ್ಚಿ ಕ್ರಿಮಿನಾಶಕ ಬದಲಾಯಿಸಿದ್ದೇವೆ. ಸದ್ಯ ನೊಣಗಳ ಹಾವಳಿ ನಿಯಂತ್ರಣಕ್ಕೆ ಬಂದಿದ್ದು, ಶೀಘ್ರ ಅಲ್ಪಸ್ವಲ್ಪ ಇರುವ ನೊಣಗಳೂ ಕಡಿಮೆ ಆಗಲಿವೆ ಎಂದು ಫಾರ್ಮಿನ ಉಸ್ತುವಾರಿ ನೋಡಿಕೊಳ್ಳುವ ಕೊಂಡಾರೆಡ್ಡಿ ಹೇಳಿದರು.