ಟ್ಯಾಂಕ್‌, ನಲ್ಲಿಗಳಿಂದ ನೀರು ಪೋಲು

ಎಂ.ಕೆ.ಹುಬ್ಬಳ್ಳಿ : ಪಟ್ಟಣದಲ್ಲಿ ಸಾರ್ವಜನಿಕರ ಅನುಕೂಲಕ್ಕೆಂದು ಕುಡಿಯುವ ನೀರಿನ ಟ್ಯಾಂಕ್‌ಗಳನ್ನು ನಿರ್ಮಾಣ ಮಾಡಲಾಗಿದೆ. ಆದರೆ ಇವು ತುಂಬಿ ಹರಿದು ನೀರು ಚರಂಡಿ ಪಾಲಾಗುತ್ತಿರುವುದು ಇಲ್ಲಿನ ಅನೇಕ ವಾರ್ಡ್‌ಗಳಲ್ಲಿ ಕಂಡು ಬರುತ್ತಿದೆ.

ಪಟ್ಟಣದಲ್ಲಿ ವ್ಯವಸ್ಥಿತ ರೀತಿಯಲ್ಲಿ ನೀರು ಬಿಡುವ ಯೋಜನೆ ಇಲ್ಲದೇ ಇರುವುದರಿಂದ ಸಾಕಷ್ಟು ನೀರು ಪೋಲಾಗುತ್ತಿದೆ. ವಿದ್ಯುತ್‌ ಕಡಿತವಾದಾಗ ಮಾತ್ರ ಈ ಟ್ಯಾಂಕ್‌ಗಳಿಂದ ನೀರು ಹರಿಯುವುದು ನಿಲ್ಲುತ್ತೆ ಎಂದು ಅನೇಕರು ತಮಾಷೆ ಮಾಡುತ್ತಾರೆ.

ಇನ್ನು ಮನೆಗಳಲ್ಲಿ ವೈಯಕ್ತಿಕವಾಗಿ ಪಡೆದ ನಲ್ಲಿಗಳಿಗೆ ಅನೇಕರು ಚಾವಿ ಕೂಡಿಸಿಲ್ಲದ ಕಾರಣ ಅವರಿಗೆ ನೀರು ಸಾಕಾದ ಮೇಲೆ ನೀರು ಚರಂಡಿ ಪಾಲಾಗುತ್ತಿದೆ. ಪೋಲಾಗುತ್ತಿರುವ ನೀರು ತಗ್ಗು ಪ್ರದೇಶದಲ್ಲಿ ಸಂಗ್ರಹವಾಗಿ ಅದರ ಸುತ್ತಮುತ್ತವಿರುವ ಜನರಿಗೆ ಸಾಂಕ್ರಾಮಿಕ ರೋಗ ಹರಡುವ ಲಕ್ಷ ಣಗಳು ಕಾಣುತ್ತಿವೆ. ಇದೆ ರೀತಿ ನೀರು ಪೋಲಾಗುವುದು ಮುಂದುವರಿದರೆ ಬೇಸಿಗೆಯಲ್ಲಿ ಪಟ್ಟಣದಲ್ಲಿ ನೀರಿಗಾಗಿ ಹಾಹಾಕಾರ ಆಗುವುದಂತೂ ಸತ್ಯ. ಅದಕ್ಕಾಗಿ ಸ್ಥಳೀಯ ಆಡಳಿತ ಮಂಡಳಿ ನಾಗರಿಕರಲ್ಲಿ ಜಾಗೃತಿ ಮೂಡಿಸುವ ಕೆಲಸವನ್ನು ಮಾಡಬೇಕಾಗಿದೆ. ಪಟ್ಟಣದ ಪ್ರತಿ ಮನೆಗೆ ತೆರಳಿ ನಳಕ್ಕೆ ಚಾವಿ ಕೂಡಿಸುವ ವ್ಯವಸ್ಥೆಗೆ ಕ್ರಮ ಕೈಗೊಳ್ಳಬೇಕು ಎಂದು ಅನೇಕರು ಒತ್ತಾಯಿಸಿದ್ದಾರೆ.