ಬೆಳಗಾವಿಯಲ್ಲಿ 72 ಬಾರಿ ಸಂಚಾರ ನಿಯಮ ಉಲ್ಲಂಘಿಸಿ 18,800 ರೂ. ದಂಡ ಕಟ್ಟಿದ ಯುವಕ!

ಬೆಳಗಾವಿ: ಇಲ್ಲೊಬ್ಬ ಸ್ಕೂಟಿ ಸವಾರ ಬರೋಬ್ಬರಿ 72 ಬಾರಿ ಸಂಚಾರ ನಿಯಮ ಉಲ್ಲಂಘನೆ ಮಾಡಿ 18,800 ರೂ. ದಂಡ ಕಟ್ಟಿದ್ದಾನೆ! ಈಗ ಆ ವ್ಯಕ್ತಿಗೆ ಸಂಚಾರಿ ಪೊಲೀಸರು ಸಂಚಾರ ನಿಯಮಗಳ ಮಾಹಿತಿ- ತರಬೇತಿ ನೀಡಿ ಕಳುಹಿಸಿಕೊಟ್ಟಿದ್ದಾರೆ.

ಬೆಳಗಾವಿ ನಗರದ ಆರೀಫ್‌ ಜಮಾದಾರ್‌ (28) 2019-20ರ ಅವಧಿಯಲ್ಲಿ ಬೇರೆ ಬೇರೆ ರೀತಿಯಲ್ಲಿ 72 ಬಾರಿ ಸಂಚಾರ ನಿಯಮ ಉಲ್ಲಂಘನೆ ಮಾಡಿದ್ದು, 18,800 ರೂ. ದಂಡ ಕಟ್ಟಿದ್ದಾರೆ. ಇದನ್ನು ಗಮನಿಸಿದ ಸಂಚಾರಿ ಠಾಣೆ ಪೊಲೀಸರು ಅವರಿಗೆ ಸಂಚಾರ ನಿಯಮಗಳ ಬಗ್ಗೆ ತರಬೇತಿ ನೀಡಿ ಕಳುಹಿಸಿದ್ದಾರೆ.

ಈ ಕುರಿತು ಬೆಳಗಾವಿ ನಗರ ಡಿಸಿಪಿ ವಿಕ್ರಂ ಅಮಟೆ ಅವರು ಟ್ವೀಟ್‌ ಮಾಡಿದ್ದಾರೆ, ''ಆರೀಫ್‌ ಪ್ರತೀ ಬಾರಿ ಸಂಚಾರ ನಿಯಮ ಉಲ್ಲಂಘನೆ ಮಾಡಿ ಪೊಲೀಸರ ಕೈಗೆ ಸಿಕ್ಕಿಬಿದ್ದಾಗ ದಂಡ ಕಟ್ಟಿ ಹೋಗಿದ್ದಾನೆ. ಹೆಲ್ಮೆಟ್‌ ಧರಿಸದೆ ಇರುವುದು, ನೋ ಪಾರ್ಕಿಂಗ್‌ ಸ್ಥಳದಲ್ಲಿವಾಹನ ಪಾರ್ಕ್ ಮಾಡಿರುವುದು, ಒನ್‌ ವೇ ಸಂಚಾರ ಹೀಗೆ ಹಲವು ರೀತಿಯಲ್ಲಿಸಂಚಾರ ನಿಯಮ ಉಲ್ಲಂಘನೆ ಮಾಡಿದ್ದ'' ಎಂದು ಡಿಸಿಪಿ 'ವಿಕ'ಕ್ಕೆ ತಿಳಿಸಿದ್ದಾರೆ.