ವಿದ್ಯುತ್ ತಗುಲಿ ಕಾರ್ಮಿಕರಿಬ್ಬರ ಸಾವು

ಹೊಸಪೇಟೆ: ಇಲ್ಲಿನ ಎಂ.ಜೆ. ನಗರದಲ್ಲಿ ಕುಡಿವ ನೀರಿನ ಪೈಪ್‌ಲೈನ್ ಕಾಮಗಾರಿ ವೇಳೆ ನೆಲದಲ್ಲಿದ್ದ ತಂತಿಯಿಂದ ವಿದ್ಯುತ್ ಪ್ರವಹಿಸಿ, ಕೂಲಿ ಕಾರ್ಮಿಕರಿಬ್ಬರು ಮಂಗಳವಾರ ಮೃತಪಟ್ಟಿದ್ದಾರೆ.

ತಾಲೂಕಿನ ಕಲ್ಲಹಳ್ಳಿ ಗ್ರಾಮದ ಕಣಿಮೆಪ್ಪ (35) ಮತ್ತು ಹೊನ್ನೂರಪ್ಪ (38) ಮೃತರು. ಖಾಸಗಿ ಆಸ್ಪತ್ರೆಯೊಂದರ ಎದುರು ದಿನದ 24 ತಾಸು ಕುಡಿವ ನೀರಿನ ಪೈಪ್‌ಲೈನ್ ಕಾಮಗಾರಿ ಹಿನ್ನೆಲೆಯಲ್ಲಿ ಈ ಕಾರ್ಮಿಕರು ಗುಂಡಿ ತೋಡುತ್ತಿದ್ದರು. ನೆಲದ ಆಳದಲ್ಲಿದ್ದ ಕೇಬಲ್‌ಗೆ ಹಾರೆ ತಾಕಿದೆ. ಈ ಸಂದರ್ಭದಲ್ಲಿ ಹಾರೆ ಹಿಡಿದ ಕಣಿಮೆಪ್ಪ ಅವರ ಮೈಗೆ ವಿದ್ಯುತ್ ಪ್ರವಹಿಸಿದೆ. ಅವರ ರಕ್ಷಣೆಗೆ ಮುಂದಾದ ಹೊನ್ನೂರಪ್ಪ ಅವರ ದೇಹಕ್ಕೂ ವಿದ್ಯುತ್ ಪ್ರವಹಿಸಿದೆ. ಅಸ್ವಸ್ಥರಾದ ಕಾರ್ಮಿಕರನ್ನು ಖಾಸಗಿ ಆಸ್ಪತ್ರೆಗೆ ತಕ್ಷಣ ದಾಖಲಿಸಲಾಯಿತು. ಚಿಕಿತ್ಸೆಗೆ ಸ್ಪಂದಿಸದ ಅವರು ಆಸ್ಪತ್ರೆಯಲ್ಲಿ ಅಸುನೀಗಿದರು. ಅವರ ಜತೆ ಕೆಲಸ ಮಾಡುತ್ತಿದ್ದ ತಿಮ್ಮಯ್ಯ, ಹುಲುಗಪ್ಪ ಮತ್ತು ಬರಮಪ್ಪ ಅಪಾಯದಿಂದ ಪಾರಾಗಿದ್ದಾರೆ. ನಗರದ ಬಡಾವಣೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.