ಡಾಂಬರ್ ಕಾರ್ಖಾನೆ ರದ್ದುಪಡಿಸಲು ಆಗ್ರಹ

ಕುರುಗೋಡು: ಇಲ್ಲಿಗೆ ಸಮೀಪದ ಕುಡಿತಿನಿ ವಲಯದಲ್ಲಿ ಸ್ಥಾಪನೆಯಾಗಿರುವ ಡಾಂಬರ್ ಕಾರ್ಖಾನೆ ರದ್ದುಪಡಿಸಲು ಆಗ್ರಹಿಸಿ ಪಟ್ಟಣದಲ್ಲಿ ಬುಧವಾರ ಸಮಾಜ ವಿಜ್ಞಾನ ವೇದಿಕೆ ಘಟಕ ಹಾಗೂ ಸಿಪಿಐ(ಎಂ)ನಿಂದ ತಹಸೀಲ್ದಾರ್‌ಗೆ ಮನವಿ ಸಲ್ಲಿಸಲಾಯಿತು.

ಜಿಲ್ಲಾ ಘಟಕದ ಮುಖಂಡ ವಿ.ಎಸ್.ಶಿವಶಂಕರ್ ಮಾತನಾಡಿ, ಈಗಾಗಲೇ ಕುಡಿತನಿ ಭಾಗದಲ್ಲಿ ಪರಿಸರ ಸಂಪೂರ್ಣ ನಾಶವಾಗಿದ್ದು, ಡಾಂಬರ್ ಕಾರ್ಖಾನೆಯಿಂದ ವಿಷಾನಿಲ ಅನಿಲ ಹೊರಬರುತ್ತಿದೆ. ಜನರ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರಲಿದೆ ಎಂದರು.

ಸಮಾಜ ವಿಜ್ಞಾನ ವೇದಿಕೆ ಅಧ್ಯಕ್ಷ ಕೆ.ವೀರಭದ್ರಗೌಡ ಮಾತನಾಡಿ, ಡಾಂಬರ್ ಕಾರ್ಖಾನೆ ಸ್ಥಾಪನೆಯಿಂದ ಸುಮಾರು 32 ಗ್ರಾಮಗಳು ಶುದ್ಧಗಾಳಿ, ನೀರು ಇಲ್ಲದಂತಾಗುತ್ತದೆ. ನಾನಾ ರೋಗ ಹೆಚ್ಚುತ್ತವೆ. ಶ್ವಾಸಕೋಶ ಕ್ಯಾನ್ಸರ್‌ನಿಂದ ಹಲವರು ಬಳಲಿದ್ದಾರೆ. ಇದನ್ನೆಲ್ಲ ತಡೆಯಲು ಕಾರ್ಖಾನೆ ರದ್ದುಪಡಿಸಬೇಕು. ಜನಪ್ರತಿನಿಧಿಗಳು ಡಾಂಬರ್ ಕಾರ್ಖಾನೆ ಪರ ಇರುವುದರಿಂದ, ಹೋರಾಟ ತೀವ್ರಗೊಳ್ಳಬೇಕಿದೆ ಎಂದರು. ಮನವಿ ಸ್ವೀಕರಿಸಿದ ಉಪ ತಹಸೀಲ್ದಾರ್ ಶೇಷಾವಲಿ, ಜಿಲ್ಲಾಧಿಕಾರಿಗೆ ರವಾನಿಸುವ ಭರವಸೆ ನೀಡಿದರು. ಮುಖಂಡರಾದ ಗಾಳಿ ಬಸವರಾಜ್, ಎ.ಮಂಜುನಾಥ, ಎನ್.ಸೋಮಯ್ಯ, ಹುಲೆಪ್ಪ, ಎನ್.ಹುಲುಗಪ್ಪ, ಯಂಕಮ್ಮ, ಚಂದ್ರ ಸೇರಿದಂತೆ ಇತರರು ಇದ್ದರು.