ಹೊಸಪೇಟೆ: ತಾಲೂಕಿನಾದ್ಯಂತ ಹೋಳಿ ಹಬ್ಬವನ್ನು ಸಂಭ್ರಮ- ಸಡಗರದಿಂದ ಸೋಮವಾರ ಆಚರಿಸಲಾಯಿತು.
ನಗರ ಸೇರಿ ತಾಲೂಕಿನ ಮರಿಯಮ್ಮನಹಳ್ಳಿ, ಕಮಲಾಪುರ, ಕಂಪ್ಲಿಯಲ್ಲಿ ಪ್ರತಿಷ್ಠಾಪಿಸಲಾಗಿದ್ದ ಕಾಮಣ್ಣನನ್ನು ಭಾನುವಾರ ತಡರಾತ್ರಿ ದಹನ ಮಾಡಲಾಯಿತು. ಬಳಿಕ ಸೋಮವಾರ ಬೆಳಗ್ಗೆ ಗುಂಪು ಸೇರಿದ ಜನರು ಹೋಳಿ ಹಬ್ಬವನ್ನು ಆಚರಿಸಿದರು.
ತಾಲೂಕಿನಾದ್ಯಂತ ಮಕ್ಕಳು, ಮಹಿಳೆಯರು, ಯುವಕರು ಹಾಗೂ ಯುವತಿಯರು ಬಣ್ಣದಾಟದಲ್ಲಿ ಭಾಗಿಯಾದರು. ಯುವಕರು ಪರಸ್ಪರ ಬಣ್ಣ ಎರಚಿ ಸಂಭ್ರಮಿಸಿದರು. ಬೈಕ್ಗಳಲ್ಲಿ ಓಡಾಡಿದ ಯುವಕರು ಕೇಕೆ ಹಾಕುತ್ತ ಹಬ್ಬದ ರಂಗನ್ನು ಇನ್ನಷ್ಟು ಹೆಚ್ಚಿಸಿದರು.
ಹಂಪಿಯಲ್ಲಿ ಭಾನುವಾರ ರಾತ್ರಿ ಕಾಮ ದಹನ ಮಾಡಿದ ವಿದೇಶಿ ಪ್ರವಾಸಿಗರು ಹಾಗೂ ಸ್ಥಳೀಯರು ಕುಣಿದು ಕುಪ್ಪಳಿಸಿದರು. ವಿದೇಶಿಗರು ಬೆಂಕಿ ಜತೆಗೆ ಸರಸವಾಡುವ ಮೂಲಕ ತಮ್ಮ ಕಲೆ ಪ್ರದರ್ಶಿಸಿದರು. ಬಳಿಕ ಸೋಮವಾರ ಬೆಳಗ್ಗೆ ಹಂಪಿಯ ಬೀದಿಯಲ್ಲಿ ದೇಶ, ವಿದೇಶಿ ಪ್ರವಾಸಿಗರು ಹಾಗೂ ಸ್ಥಳೀಯರು ಜತೆಗೂಡಿ ಹೋಳಿ ಹಬ್ಬ ಆಚರಿಸಿದರು.
ಹೋಳಿ ಹಬ್ಬದ ನಿಮಿತ್ತ ನಗರದಲ್ಲಿ ಅಘೋಷಿತ ಬಂದ್ ವಾತಾವರಣ ಮನೆ ಮಾಡಿತ್ತು. ನಗರದ ಕಾಲೇಜ್ ರಸ್ತೆ, ಹಂಪಿ ರಸ್ತೆ, ಡ್ಯಾಂ ರಸ್ತೆ, ಬಳ್ಳಾರಿ ರಸ್ತೆ ಸೇರಿ ನಗರದ ನಾನಾ ರಸ್ತೆಗಳಲ್ಲಿ ಯುವಕರು ಹಾಗೂ ಮಕ್ಕಳು ಬಣ್ಣದಾಟವಾಡಿದರು. ತಾಲೂಕಿನಾದ್ಯಂತ ಪೊಲೀಸರು ಸೂಕ್ತ ಬಂದೋಬಸ್ತ್ ಕೈಗೊಂಡಿದ್ದರು.